کوئٹہ بلوچستان کی مختلف قومی شاہراہوں پر گزشتہ 24 گھنٹوں کے دوران 44 ٹریفک حادثات پیش آئے جن کے نتیجے میں 77 افراد زخمی ہوگئے۔
میڈیکل ایمرجنسی ریسپانس سینٹر کی رپورٹ کے مطابق سب سے زیادہ حادثات ژوب اور خضدار کی شاہراہوں پر رپورٹ ہوئے، این-50 ژوب پر 11 حادثات میں 22 افراد جبکہ این-25 خضدار پر 10 حادثات میں 15 افراد زخمی ہوئے۔
اسی طرح این-25 مستونگ پر 4 حادثات میں 5 افراد زخمی ہوئے۔ این-25 قلات، این-50 زیارت و ژوب اور این-65 سبی پر دو، دو حادثات رپورٹ ہوئے جن میں مجموعی طور پر 12 افراد زخمی ہوئے۔
مزید برآں، این-25 لسبیلہ، وندر، سرانان، این-50 شیرانی اور سوراب سمیت این-8 کیچ، این-85 پنجگور، واشک، بارکھان اور این-40 نوشکی پر بھی ایک، ایک حادثہ پیش آیا جن میں 20 افراد زخمی ہوئے۔
رپورٹ میں بتایا گیا ہے کہ ان حادثات کی بڑی وجوہات تیز رفتاری، سڑکوں کی خستہ حالی اور ٹریفک قوانین کی خلاف ورزی ہیں۔
شہریوں نے حکومت سے مطالبہ کیا ہے کہ قومی شاہراہوں کی حالت بہتر بنائی جائے اور قوانین پر سختی سے عمل درآمد کرایا جائے تاکہ قیمتی انسانی جانوں کا ضیاع روکا جا سکے۔
