بلوچستان کے ضلع کیچ کے علاقے تمپ میں پاکستانی فورسز کی فائرنگ سے ایک خاتون سمیت بچہ شدید زخمی ہوا ہے۔
علاقائی ذرائع کے مطابق تمپ کے علاقے کلاھو میں فورسز چوکی سے ایک گھر پر شدید فائرنگ کی گئی جس کے نتیجے میں زلیخہ زوجہ عیسیٰ شدید زخمی ہوگئیں جبکہ ایک بچہ بھی فائرنگ کے نتیجے میں زخمی ہوا ہے جس کے ہاتھ میں گولی لگی ہے۔
واقعے کے خلاف علاقہ مکین فورسز کیمپ کے سامنے سراپا احتجاج ہے۔ حکام نے تاحال اس حوالے سے کوئی تفصیلات فراہم نہیں کی ہے۔
خیال رہے اس نوعیت کے واقعات اس سے پہلے پیش آچکے ہیں جہاں عوام کو جانی نقصانات سے دوچار ہونا پڑا ہے۔
گذشتہ شب تربت کے علاقے بلوچی بازار میں حکومتی حمایت یافتہ گروہ (ڈیتھ اسکواڈ) ارکان نے ایک گھر کو دستی بم حملے میں نشانہ بنایا جس کے نتیجے میں صاحبہ خاتون اور شاہدہ نامی خواتین شدید زخمی ہوئیں۔
