بلوچستان کے ضلع سوراب میں منگل کی صبح سے پاکستانی فورسز نے ایک وسیع پیمانے پر فوجی آپریشن کا آغاز کیا ہے، جس میں مقامی ذرائع کے مطابق ڈیتھ اسکواڈ کے ارکان بھی شامل ہیں۔
مقامی رہائشیوں کا کہنا ہے کہ علی الصبح فوجی گاڑیوں اور پیدل اہلکاروں نے سوراب کے مختلف علاقوں، بشمول کلی نور آباد، میں داخل ہو کر گھر گھر تلاشی کا عمل شروع کیا۔ انہوں نے الزام عائد کیا کہ فورسز نے خواتین، بچوں اور بزرگوں کو گھروں سے نکال کر مکمل تلاشی لی، جبکہ سادہ لباس میں ملبوس افراد، جنہیں مقامی طور پر ڈیتھ اسکواڈ سے منسلک سمجھا جاتا ہے، بھی آپریشن میں شریک تھے۔
تاحال حکام کی جانب سے اس کارروائی پر کوئی سرکاری بیان جاری نہیں کیا گیا۔
خیال رہے قلات کے علاقے مہلبی میں بھی آج صبح سے فوجی آپریشن کی جارہی ہے جس میں گن شپ و دیگر ہیلی کاپٹر حصہ لے رہے ہیں۔ ذرائع کے مطابق مختلف مقامات پر کمانڈوز بھی اتارے گئے ہیں۔
آپریشن کے باعث تاحال نقصانات کے حوالے سے خبروں تک رسائی ممکن نہیں ہوسکی ہے۔
