بلوچستان کے ضلع کیچ کے علاقے بالگتر میں لاپتہ افراد کی عدم بازیابی کے خلاف احتجاجی مظاہرین نے ایک مرتبہ پھر سی پیک شاہراہ کو بند کر دیا ہے، جس سے ٹریفک کی روانی شدید متاثر ہوئی ہے۔
احتجاج کرنے والے افراد کا تعلق لاپتہ افراد صادق واجداد اور پیرداد عقیل کے خاندانوں سے ہے، جن کے مطابق ان کے پیارے کئی ماہ سے لاپتہ ہیں اور تاحال ان کی بازیابی کے لیے کوئی عملی پیش رفت سامنے نہیں آئی۔
مظاہرین نے بدھ کی صبح بالگتر سھاکی کے مقام پر شاہراہ پر دھرنا دے کر اسے ہر قسم کی ٹریفک کے لیے بند کر دیا۔
یہ پہلا موقع نہیں کہ مظاہرین نے سی پیک شاہراہ کو بند کیا ہو۔ رواں ہفتے کے آغاز میں بھی اسی مقام پر دھرنا دیا گیا تھا، جس کے بعد ضلعی انتظامیہ سے مزاکرات کے نتیجے میں مظاہرین نے مشروط طور پر راستہ کھولا تھا۔
تاہم، مظاہرین کے مطابق انتظامیہ کی جانب سے دی گئی یقین دہانیاں محض زبانی وعدے ثابت ہوئیں اور عملی قدم نہیں اٹھایا گیا۔
راستہ بند ہونے کے باعث کئی گھنٹوں سے گاڑیاں پھنس گئی ہیں، اور مسافروں کو شدید مشکلات کا سامنا ہے۔ تاحال ضلعی انتظامیہ کی جانب سے اس تازہ احتجاج پر کوئی باضابطہ ردعمل سامنے نہیں آیا۔
مظاہرین کا مطالبہ ہے کہ لاپتہ افراد کو فوری طور پر بازیاب کیا جائے یا ان کے بارے میں قانونی طریقے سے اہلِ خانہ کو مطلع کیا جائے۔ انہوں نے کہا کہ جب تک ان کے مطالبات نہیں مانے جاتے، وہ احتجاج جاری رکھیں گے۔
