بلوچستان کے علاقے قلات میں پاکستانی فوجی ہیلی کاپٹروں کی نیچی پروازیں جاری ہیں۔
مقامی ذرائع کے مطابق، فوجی ہیلی کاپٹر منگچر ڈیم اور موگند کے علاقوں کی جانب آمد و رفت کر رہے ہیں، جبکہ علاقے میں فورسز کی نقل و حرکت میں نمایاں اضافہ دیکھا گیا ہے۔
یاد رہے کہ آج قلات میں پاکستانی فورسز کو پے در پے پانچ دھماکوں اور گھات لگا کر کیے گئے حملوں کا نشانہ بنایا گیا۔ ان حملوں میں متعدد اہلکار ہلاک اور زخمی ہوئے۔
ذرائع کے مطابق، جب پاکستانی فورسز کا قافلہ علاقے میں پیش قدمی کر رہا تھا تو قافلے میں شامل ایک گاڑی کے قریب دھماکہ ہوا۔ اس کے بعد، فورسز کو سیکیورٹی فراہم کرنے والے عارضی مورچوں میں موجود اہلکاروں کو نشانہ بنایا گیا۔ تیسرا دھماکہ اس وقت ہوا جب فورسز کے اہلکار ایک مقام پر جمع تھے۔
دھماکوں کے نتیجے میں کم از کم آٹھ اہلکاروں کے ہلاک اور زخمی ہونے کی اطلاعات موصول ہوئی ہیں، تاہم عسکری ذرائع نے دو اہلکاروں کی ہلاکت اور چار کے زخمی ہونے کی تصدیق کی ہے۔
