بلوچ اسٹوڈنٹس آرگنائزیشن (پجار) کے مرکزی ترجمان نے اپنے بیان میں کہا ہے کہ تنظیم مستونگ زون کے زونل آرگنائزر وقاص بلوچ کی جبری گمشدگی کی سخت الفاظ میں مذمت کرتی ہے۔
ترجمان نے کہا کہ وقاص بلوچ کی گمشدگی ایک افسوسناک واقعہ ہے، جو انسانی حقوق اور طلبہ آزادیوں پر سنگین حملہ ہے۔
انہوں نے کہاکہ وقاص بلوچ ایک باشعور، متحرک اور پُرامن طالبعلم رہنما ہے، جو ہمیشہ تعلیمی اداروں میں طلبہ کے مسائل کو اجاگر کرنے، علم کے فروغ اور طلبہ کے حقوق کی جدوجہد میں پیش پیش رہا ہے۔ ایسے نوجوانوں کو لاپتہ کرنا کسی بھی مہذب معاشرے کے لیے ناقابلِ قبول اور ناقابلِ برداشت عمل ہے۔
مزید کہاکہ بی ایس او پجار ایک نظریاتی، جمہوری اور پُرامن طلبہ تنظیم ہے، جو ہمیشہ آئینی و سیاسی جدوجہد پر یقین رکھتی ہے۔ ہماری جدوجہد دلیل، مکالمہ، اور شعور کے ہتھیاروں سے لیس ہے، نہ کہ تشدد یا انتشار سے۔
انہوں نے کہاکہ ہم ریاستی اداروں سے مطالبہ کرتے ہیں کہ وقاص بلوچ کو فی الفور منظرِ عام پر لایا جائے۔ ان کی فوری اور بحفاظت بازیابی نہ صرف ان کے اہل خانہ بلکہ تمام طلبہ برادری کے لیے باعثِ اطمینان ہوگی۔
ترجمان نے کہاکہ اگر وقاص بلوچ کو جلد از جلد بازیاب نہ کیا گیا تو بی ایس او پجار آئندہ کے لائحہ عمل کے تحت ملک گیر احتجاجی اقدامات اٹھانے پر مجبور ہوگی، جس کی تمام تر ذمہ داری ریاستی اداروں پر عائد ہوگی۔ تنظیم اپنے تمام جمہوری و قانونی آپشنز استعمال کرنے کا حق محفوظ رکھتی ہے۔
بیان کے آخر میں کہاکہ بی ایس او پجار یہ واضح کرتی ہے کہ ہم جبری گمشدگی جیسے غیر انسانی اور غیر آئینی عمل کے خلاف ہر محاذ پر آواز بلند کرتے رہیں گے، اور ایسے مظالم کے خلاف خاموشی کو مجرمانہ غفلت تصور کریں گے۔
