ڈائریکٹر جنرل لیویز فورس بلوچستان عبدالغفار مگسی نے ضلع چاغی میں مسلح افراد کے ہاتھوں سرکاری اسلحہ چھن جانے کے باعث چار لیویز اہلکاروں کو نوکری سے برطرف کردیا۔
ذرائع کے مطابق چاغی لیویز کے چار اہلکاروں سے گزشتہ دنوں ایک حملے میں مسلح افراد نے اسلحہ چھین لیا تھا جس کے بعد ڈی جی بلوچستان لیویز نے چاروں اہلکاروں کو نوکری سے برطرف کردیا۔
لیویز حکام کا کہنا ہے کہ غفلت برتنے والے اہلکاروں کو تادیبی قوانین 2015 کے تحت سخت کارروائی کا سامنا بھی کرنا ہوگا۔
واضح رہے کہ حالیہ دنوں میں ڈائریکٹر جنرل بلوچستان لیویز فورس نے اہلکاروں کو ہدایت کی تھی کہ وہ چوکیوں پر حملہ کرنے اور اسلحہ ضبط کرنے والی مسلح تنظیموں کا مقابلہ کریں، بصورت دیگر جن اہلکاروں نے مسلح افراد کو اپنا اسلحہ حوالے کیا انہیں نوکری سے برخاست کردیا جائے گا۔
اب تک بلوچستان کے مختلف علاقوں میں کئی لیویز اہلکار اس قسم کے واقعات کے باعث اپنی نوکریاں کھو چکے ہیں۔
یہ بات بھی قابل ذکر ہے کہ حالیہ دنوں میں بلوچستان کے مختلف علاقوں میں لیویز چوکیوں پر چھاپے اور سرکاری سامان کی ضبطگی کے واقعات بڑھتے جا رہے ہیں۔ اس سے قبل زہری سمیت دیگر علاقوں میں لیویز تھانوں پر قبضوں کے بعد حکام نے متعدد اہلکاروں کو برطرف کیا تھا۔
ان واقعات کی ذمہ داری اکثر بلوچ آزادی پسند مسلح تنظیمیں قبول کرتی رہی ہیں تاہم ان تنظیموں کا کہنا ہے کہ وہ اہلکاروں کو بلوچ ہونے کی بناء پر جانی نقصان نہیں پہنچاتے۔
