جبری گمشدگیوں کے خلاف کوئٹہ پریس کلب کے سامنے وائس فار بلوچ مسنگ پرسنز کا احتجاجی کیمپ آج 5735 ویں روز جاری رہا۔
اس موقع پر بی ایس او کے سیکریٹری جنرل صمند بلوچ، زونل صدر کبیر بلوچ اور دیگر نے کیمپ آکر جبری لاپتہ افراد کے لواحقین سے اظہار یکجہتی کیا۔
تنظیم کے وائس چیئرمین ماما قدیر بلوچ نے کہاکہ وائس فار بلوچ مسنگ پرسنز جبری لاپتہ افراد کی بازیابی اور ماورائے عدالت قتل کیے گئے افراد کے لواحقین کے لیے انصاف کا مطالبہ کرتی ہے۔
بدھ کے روز احتجاجی کیمپ میں اظہار یکجہتی کے لیے آئے وفود سے گفتگو کرتے ہوئے ماما قدیر بلوچ نے کہا کہ رواں مہینہ بلوچستان میں انسانی حقوق کے حوالے سے بدترین ہے۔ اب تک 60 سے زائد افراد کو جبری لاپتہ کیا گیا اور تین افراد ماورائے عدالت قتل ہوئے ہیں۔
انھوں نے کہا کہ بلوچستان میں طویل احتجاج اور مسلسل آواز اٹھانے کے باوجود انسانی حقوق کی صورتحال میں بہتری نہیں آ رہی حکومت کی پالیسیاں اور اقدامات اس حوالے سے مایوس کن ہیں۔
