مستونگ اور گردونواح میں موسلادھار بارشوں کا سلسلہ جاری ہے جس سے موسم خوشگوار ہو گیا تاہم نشیبی علاقے زیر آب آ گئے اور مرکزی شاہراہوں پر پھسلن کے باعث متعدد حادثات پیش آئیں۔
ریسکیو ذرائع کے مطابق ان حادثات میں 19 افراد زخمی ہوئے جنہیں فوری طور پر طبی امداد فراہم کی گئی، ریسکیو 1122 کی ٹیمیں جائے حادثہ پر پہنچ گئیں جبکہ شدید زخمیوں کو شہید نواب غوث بخش رئیسانی میموریل اسپتال منتقل کر دیا گیا۔
محکمہ موسمیات کے مطابق بارشوں کا سلسلہ مزید جاری رہنے کا امکان ہے جبکہ متعلقہ حکام نے شہریوں کو دورانِ سفر احتیاط برتنے کی ہدایت کی ہے۔
دوسری جانب کوہلو شہر اور گردونواح میں وقفے وقفے سے بارش کا سلسلہ جاری ہے جس کے باعث سردی کی شدت میں اضافہ ہو گیا ہے۔ شہری جہاں سرد موسم کا لطف اٹھا رہے ہیں وہیں احتیاطی تدابیر اپنانے کی اپیل بھی کی جا رہی ہے۔
دوسری جانب ڈیرہ بگٹی شہر اور اس کے گردونواح میں بھی بارشوں کا سلسلہ جاری ہے جس سے موسم مزید خوشگوار اور سرد ہو گیا ہے، مقامی شہریوں نے گرم کپڑوں اور دیگر حفاظتی تدابیر اختیار کرنا شروع کر دی ہیں۔
محکمہ موسمیات کے مطابق بارشوں کا سلسلہ آئندہ چند روز تک جاری رہنے کا امکان ہے۔
ادھر پشین شہر اور گردونواح میں بھی بارشوں کے باعث سردی میں اضافہ ہو گیا ہے تاہم شہریوں کو سوئی گیس کے کم پریشر کی وجہ سے مشکلات کا سامنا کرنا پڑ رہا ہے خاص طور پر گھریلو امور اور کھانے پکانے میں دشواری ہو رہی ہے۔
مقامی افراد نے متعلقہ حکام سے مطالبہ کیا ہے کہ گیس پریشر کو فوری بحال کیا جائے تاکہ عوام کو ریلیف مل سکے۔
