بلوچستان کے علاقے صحبت پور میں زمین کے تنازع پر فائرنگ سے 3 ہلاک اور 5 زخمی ہوگئے جبکہ ڈیرہ مراد جمالی میں خاتون کی لاش برآمد ہوئی ہے۔
صحبت پور میں سال نو کے پہلے دن زمین کے تنازع پر فائرنگ سے 3 افراد ہلاک اور 5 زخمی ہوگئے۔
صحبت پور کے علاقے کھالانی میں زرعی زمین کے تنازع پر کھوسہ قبیلے کے دو طائفوں چھٹانی اور مانجھانی کے مابین لڑائی ہوئی۔
فریقین کے مسلح افراد نے مورچہ زن ہو کر ایک دوسرے پر جدید اور خودکار اسلحہ سے فائرنگ کردی جسکے باعث علاقہ جنگ کا میدان بن گیا۔
پولیس کے مطابق دو طرفہ فائرنگ کے دوران گولیاں لگنے سے مانجھانی گروپ کے تین بزگر منظور حسین، حق نواز اور غلام حسین جنکا تعلق لاشاری قبیلے سے بتایا جارہا ہے، ہلاک ہوگئے جبکہ موج الدین اور عبدالمجید کھوسہ سمیت پانچ افراد زخمی ہوگئے۔
فریقین کے مابین کئی گھنٹوں تک فائرنگ کا تبادلہ جاری رہا۔
اطلاع ملتے ہی پولیس نے بھاری نفری کے ہمراہ جائے وقوع پہنچ کر فائربندی کرائی اور لاشیں تحویل میں لیکر پوسٹ مارٹم کے لیے سول اسپتال منتقل کر دی ہیں، جبکہ زخمیوں کو اسپتال میں طبی امداد دی جا رہی ہے۔
دوسری جانب ڈیرہ مراد جمالی میں ایک خاتون کی لاش پٹ فیڈر کینال سے برآمدہوئی ہے۔
بتایا جا رہا ہے کہ مذکورہ خاتون کو دو ہفتے قبل ڈیرہ مراد جمالی میں اس کے منگیتر نے قتل کر دیا تھا۔
خاتون کی لاش پٹ فیڈر کینال بیدار پل کے قریب نہر سے ملی ہے سٹی پولیس نے لاش کو نہر سے نکال لیا۔
پولیس نے لاش پوسٹ مارٹم کیلئے سیول ہسپتال ڈیرہ مراد جمالی منتقل کر دیا گیا ۔
وہاں لورالائی کے علاقے ناصر آباد میں ٹریکٹر کی ٹکر سے موٹر سائیکل پر سوار دو سگی بہنیں موقع پر جاں بحق ہو گئیں، جبکہ ان کا بھائی حادثے سے محفوظ رہا۔
حادثہ ناصر آباد کے علاقے میں پیش آیا، جہاں ملا افضل اللہ داد زئی کی بیٹیاں اور ان کا بھائی موٹر سائیکل پر سفر کر رہے تھے ۔ ٹرن ٹریکٹر کی تیز رفتاری کے باعث حادثہ پیش آیا، جس میں دونوں بہنیں موقع پر ہی جاں بحق ہو گئیں ۔ حادثے کے وقت بھائی محفوظ رہا۔
بلوچستان کے علاقے گنداواہ میں فائرنگ، ایک شخص جاں بحق جبکہ دوسرا زخمی ہوگیا ہے ، ملزم واردات کے بعد فرار ہوگیا۔
اطلاعات کے مطابق گزشتہ روز گنداواہ کے علاوہ گھیلا شار میں ملزم نے فائرنگ کر کے عبدالمجید کو قتل جبکہ ان کے داماد محمد حنیف کو زخمی کر دیا اور فرار ہو گئے ، نعش اور زخمی کو فوری طور پر ہسپتال منتقل کر دیا گیا جہاں لاش ضابطے کی کارروائی کے بعد ورثاء کے حوالے کر دی گئی ہے اس سلسلے میں مزید کارروائی متعلقہ انتظامیہ کر رہی ہے۔
دریں خضدار یوسی گزو میں گرگی مینگل قبیلے کے دوگروہوں میں فائرنگ کا تبادلہ میں دو سگے بھائی کی مہر اللہ اور نعمت اللہ مینگل زخمی ہوگئے۔ جنہیں علاقائی لوگوں نے مقامی ہسپتال پہنچا دیا ۔
