سعودی عرب کے اعلیٰ وفد کا دورۂ پاکستان: وفد بغیر کسی معاہدے کے واپس

مبصرین کا کہنا ہے کہ پاکستان اور سعودی عرب تعلقات کو معاشی شراکت داری میں تبدیل کرنے کی طرف بڑھ رہے ہیں جو کہ بدلتے حالات اور اسلام آباد کی معاشی مشکلات میں آسانی کے لیے اہم ہے۔

سعودی عرب میں پاکستان کے سابق سفیر ایڈمرل (ریٹائرڈ) ہشام بن صدیق کا کہنا ہے کہ پاکستان اور سعودی عرب کے تاریخی، برادرانہ اور اسٹریٹیجک تعلقات ہیں۔ تاہم دو طرفہ تعلقات میں دفاع سے بڑھ کر معاشی، سفارتی اور مشترکہ منصوبوں میں تعاون کو بڑھانے کی وسیع گنجائش ہے۔

وائس آف امریکہ سے گفتگو کرتے ہوئے ہشام بن صدیق نے کہا کہ وزیرِ اعظم شہباز شریف کے دورۂ سعودی عرب کے فوراََ بعد سعودی وزیرِ خارجہ کی سربراہی میں اعلیٰ وفد کی اسلام آباد آمد سے سنجیدگی ظاہر ہوتی ہے کہ دونوں ملک اپنے تعلقات کو روایتی سطح سے بڑھا کر ہر شعبے میں وسعت دینا چاہتے ہیں۔

پاکستان کی موجودہ حکومت یہ کہہ چکی ہے کہ ملک کی معیشت کو درست کرنا اور معاشی مشکلات پر قابو پانا اس کی ترجیحات میں سب سے اہم ہے۔

اس مقصد کے حصول کے لیے ایک بار پھر پاکستان سعودی قیادت کی طرف دیکھ رہا ہے تاکہ وہ ملک میں معدنیات اور زراعت سمیت دیگر شعبوں میں سرمایہ کاری کے منصوبوں کو تیزی سے مکمل کرنے میں مدد کرے۔

سعودی عرب کے لیے بلوچستان کے حالات

معاشی امور کے تجزیہ نگار عابد سلہری کہتے ہیں کہ سعودی عرب کے وفد کی ہیئت بتاتی ہے کہ دورہ اہمیت کا حامل ہے۔

وہ کہتے ہیں کہ پاکستان میں کان کنی، زراعت، توانائی اور گرین ریفائنری میں سرمایہ کے آسان اور وسیع مواقع موجود ہیں۔

عابد سلہری نے کہا کہ پاکستان کے مفاد میں ہے کہ سعودی عرب یہاں پر سرمایہ کاری کرے جو کہ بلوچستان جیسے شدت پسندی سےمتاثرہ علاقوں میں بھی قابل قبول ہوگا۔

ان کے بقول بلوچستان میں اگر کسی ملک کی سرمایہ کاری مقامی سطح پر زیادہ قابلِ قبول ہوگی تو وہ برادر اسلامی ملک کی سرمایہ کاری ہوگی۔ سعودی عرب کے جھنڈے کے ساتھ کام کرنے والی کمپنی کو شدت پسندی گروہوں کے حملوں کا سامنا نہیں ہوگا۔

تاہم دوسری جانب بلوچ مسلح آزادی پسندوں کی جانب سے چین سمیت دیگر ممالک پر بیانات کے ذریعے واضح کیا گیا ہے کہ بلوچستان میں سرمایہ کاری سے گریز کریں۔

بلوچ لبریشن آرمی کے سربراہ بشیر زیب بلوچ نے گذشتہ سال ستمبر میں اپنے ایک ویڈیو پیغام میں کہا کہ چین سمیت عرب ممالک، یورپ، کینڈا اور ہمارے ہمسایہ ممالک کو معلوم ہونا چاہیے کہ بلوچ اپنے قومی وسائل کی استحصال کو کسی صورت برداشت نہیں کرے گا، ہماری کسی دوسرے قوم سے کوئی دشمنی نہیں ہے اگر کسی نے بلوچ قومی وسائل کی لوٹ مار کی، نسل کشی میں پنجابی اور پاکستان کا ساتھ دیا تو پھر بلوچ یہ نہیں دیکھے گا کہ وہ کتنی بڑی طاقت اور قوت ہے، ان طاقتوں کو گوریلا جنگ اور قومی جذبے کا بخوبی اندازہ ہے، بلوچ کی مزاحمت اور جذبہ انتہائی خطرناک ہوگی اگر کوئی یہاں سرمایہ کاری کرے گا تو سب کچھ ضائع ہوگا۔

سعودی عرب کے لیے پاکستان میں سرمایہ کاری کے مواقع

واضح رہے کہ فروری 2019 میں سعودی عرب کے ولی عہد محمد بن سلمان کے پاکستان کے دورے کے دوران پاکستان میں سعودی عرب کی جانب سے 20 ارب ڈالر کی سرمایہ کاری کے معاہدوں پر دستخط کیے تھے جن میں سعودی عرب کی جانب سے بلوچستان کے ساحلی شہر گوادر میں ریفائنری لگانے کا معاہدہ بھی طے پایا تھا۔ تاہم سرمایہ کاری کے یہ منصوبے تاحال پایہ تکمیل کو نہیں پہنچ سکے ہیں۔

توقع کی جا رہی ہے کہ معدنیات کے شعبے میں سرمایہ کاری کے سلسلے میں بلوچستان میں ریکوڈک منصوبے میں سعودی عرب ایک ارب ڈالر کا سرمایہ لگانے کا جلد ہی آغاز کرے گا۔

ریکوڈک دنیا میں سونے اور تانبے کے بڑے ذخائر میں سے ایک منصوبہ ہے۔

سابق سفیر ایڈمرل (ریٹائرڈ) ہشام بن صدیق کہتے ہیں کہ ماضی میں پاکستانی حکومت کی غیر سنجیدگی کے باعث سعودی سرمایہ کاری اور آئل ریفائنری جیسے منصوبے پایہ تکمیل کو نہیں پہنچ سکے ہیں۔

انہوں نے کہا کہ سرمایہ کاری کے نتیجے میں دیگر سرمایہ کاروں کا اعتماد پیدا ہوگا اور ملک میں نجی شعبے میں سرمایہ کاری آسکے گی۔ اسی طرح سعودی عرب سیکیورٹی کے معاملات میں اپنی استعداد بڑھانا چاہتا ہے جس میں پاکستان انہیں مدد دے سکتا ہے۔