حماس نے 24 یرغمالی اور اسرائیل نے 39 فلسطینی قیدی رہا کر دئیے

صدر بائیڈن نے ایک پریس کانفرنس میں یرغمالوں کی رہائی کا خیر مقدم کرتے ہوئے کہا کہ یہ ایک طویل سفر کی محض شروعات ہے ۔ اور اب کل ا ور اس کے بعد آنے والے دنوں میں مزید یرغمالوں کی رہائی عمل میں آئے گی۔ انہوں نے کہا اگلے چند دنوں میں ہمیں توقع ہے کہ درجنوں یرغمال اپنے خاندانوں میں واپس آجائیں گے۔

اس سے قبل وزارت کے ترجمان ماجد الانصاری نے کہاتھا کہ رہا کیےجانے والے اسرائیلی یرغمالوں میں دس تھائی اور ایک فلپائنی شہری سمیت 13 اسرائیلی شہری شامل ہیں ، جن میں سے کچھ دوہری شہریت کے حامل ہیں۔

فلسطینی قیدی جنگ بندی کے معاہدےکے تحت رہا کیے جانے والے کل 150 میں سے پہلے39 قیدی ہیں ۔

قطر یرغمالوں کی رہائی میں ایک کلیدی ثالث تھا۔

ریڈ کراس کی بین الاقوامی کمیٹی نے بھی رہائی کی تصدیق کی ہے جس نے یرغمالوں کو مصر منتقل کیا ہے۔

یرغمال عورتوں اور بچوں کا اسرائیل بھیجنے سے پہلے طبی معائنہ ہو ا ہے، انہیں اسرائیلی اسپتالوں میں لے جایا جائے گا اور ان کے خاندانوں سے دوبارہ ملاپ کروایا جائے گا۔

ترجمان قطری وزارتِ خارجہ کے مطابق غزہ میں امداد کی ترسیل بھی جلدشروع ہو گی اور امید ہے کہ یہ معاہدہ تشدد کے خاتمے کا باعث بنے گا۔

خبر رساں ادارے ‘رائٹرز’ کے مطابق اسرائیلی فوج نے کہا ہے کہ غزہ میں فوجی اہلکار جنگ بندی لائن کے اندر موجود رہیں گے۔ تاہم انہوں نے اسرائیلی فوجیوں کی پوزیشن کی وضاحت نہیں کی۔

حماس نے بھی کہا ہے کہ جنگ بندی کے دوران کوئی کارروائی نہیں کی جائے گی۔ حماس کے ترجمان ابو عبیدہ نے ایک ویڈیو پیغام میں کہا ہے کہ تمام محاذوں پر اسرائیلی فورسز کے ساتھ عارضی جنگ بندی رہے گی۔

عارضی جنگ بندی کے لیے معاونت کرنے والے ملک مصر کا کہنا ہے کہ رفح کراسنگ سے جنگ بندی کے دوران غزہ میں یومیہ ایک لاکھ 30 ہزار لیٹر ڈیزل اور گیس کے چار ٹرک پہنچیں گے اور اس کے علاوہ امدادی سامان کے 200 ٹرک بھی روزانہ غزہ روانہ ہوں گے۔

اسرائیل نے حماس کے خلاف جنگ کا اعلان اس کے بعد کیا تھا جب سات اکتوبر کو عسکریت پسند گروپ نے سرحد پار حملہ کر کے کم از کم 1200 لوگوں کو ہلاک اور 240 کو اغوا کر لیا تھا۔

اس جنگ میں حماس کے زیر انتظام علاقے کے حکام کے مطابق اسرائیلی حملوں میں 13 ہزار سے زیادہ فلسطینی ہلاک ہوئے اور غزہ میں بڑے پیمانےپر نقصان ہوا ۔