ایران میں پاسداران انقلاب کے کرنل کو دارالحکومت تہران میں ان کے گھر کے باہر فائرنگ کرکے قتل کردیا گیا۔
ایران کی سرکاری خبر رساں ایجنسی ’اِرنا‘ نے اپنی رپورٹ میں کہا کہ کرنل سید خدائی کی ہلاکت اس وقت 5 گولیاں لگنے سے ہوئی جب وہ شام 4 بجے کے قریب گھر واپس آرہے تھے۔
پاسداران انقلاب نے کہا کہ انہوں نے حملہ آوروں کی شناخت کے لیے تحقیقات کا آغاز کردیا ہے۔
اتوار کو پاسداران انقلاب نے امریکا اور اس کے اتحادی بشمول اسرائیل کی طرف اشارہ کرتے ہوئے اپنے بیان میں کہا کہ ’دشمنوں کا تعلق عالمی تکبر سے ہے، جو اس ’دہشت گردی کے عمل‘ کے ذمہ دار ہیں جس میں کرنل سید خدائی کی ہلاکت ہوئی ہے۔
اپنی ویب سائٹ پر جاری بیان میں پاسداران انقلاب نے کہا کہ کرنل خدائی کو تہران میں مجاہدین اسلام گلی میں واقع ان کے گھر کے باہر دو موٹرسائیکل سوار مسلح افراد نے قتل کیا۔
خبر رساں ایجنسی ’فارس‘ نے رپورٹ کیا ہے کہ ریاستی پراسیکیوٹر نے قتل کی جگہ کا دورہ کیا اور حکم دیا کہ جلد شناخت کرکے قاتلوں کو گرفتار کیا جائے۔
غیر ملکی خبر رساں ایجنسی ’اے ایف پی‘ کی رپورٹ کے مطابق ایران نے کرنل سید خدائی کے قتل کو 2020 میں جوہری سائنسدان محسن فخری زادہ کے قتل کے بعد سب سے ’ہائی پروفائل‘ قتل قرار دیا ہے۔
