پاکستان فوج کے شعبہ تعلقات عامہ آئی ایس پی آر نے بلوچستان کے ضلع آواران میں آپریشن کے دوران دو افراد کو مارنے کا دعویٰ کیا ہے جبکہ آئی ایس پی آر کے مطابق اس دوران فائرنگ کے تبادلے میں دو فوجی اہلکار بھی ہلاک ہوئے ہیں۔
آئی ایس پی آر کے مطابق بلوچستان کے علاقے مشکے میں سیکیورٹی فورسز کی جانب سے آپریشن کیا گیا۔ آپریشن مسلح افراد کی موجودگی کی اطلاع پر فورسز نے گرفتاری کےلئے کیا۔
آئی ایس پی آر نے دعویٰ کیا ہے کہ مسلح افراد نے ٹھکانوں سے فرار ہونے کی کوشش کرتے ہوئے فورسز پر فائرنگ شروع کردی، آپریشن میں فورسز کی فائرنگ سے دو افراد ہلاک ہوگئے جبکہ فائرنگ کے تبادلے میں فورسز کے دو اہلکار نائیک تاج ولی اور سپاہی اسامہ بھی ہلاک ہوگئے جبکہ ایک آفیسر زخمی ہوا ہے۔
آئی ایس پی آر کے مطابق مارے جانے والوں کے قبضہ سے اسلحہ و بارود برآمد کیا گیا۔
دوسری جانب علاقائی ذرائع کا کہنا ہے کہ مشکے میں کھندڈی کے مقام پر پاکستان فوج نے گذشتہ شب رات گئے انور عرف لالہ ہیبتان نامی شخص کے گھر پر حملہ کیا۔
مقامی ذرائع کے مطابق انور بلوچ اور ان کے بیٹے نے فورسز کے خلاف مزاحمت کی اور جھڑپ میں باپ بیٹا مارے گئے۔
