جنگ زدہ ملک افغانستان میں پاکستان کے سفیر منصور احمد خان نے کہا ہے کہ پاکستان نے طالبان اور افغان حکومت سمیت پوری دنیا پر واضح کیا ہے کہ اسے افغانستان میں طاقت کے زور پر قبضہ کرنے والی حکومت قابل قبول نہیں۔
پاکستانی سفیر نے جیو نیوز کے پروگرام جرگہ میں سلیم صافی سے گفتگو کرتے ہوئے کہا کہ ہم اشرف غنی کی حکومت کو افغانستان کی نمائندہ حکومت سمجھ کر اس کے ساتھ کام کرنا چاہتے ہیں۔
ان کا کہنا تھا کہ ہم افغانستان میں سیاسی مفاہمت کے ذریعے سب افغانوں کے لیے یکساں قابل قبول حکومت چاہتے ہیں۔
خیال رہے کہ اشرف غنی حکومت کی جانب سے پاکستان پر الزام عائد کیا جاتا ہے کہ وہ (پاکستان) طالبان کو ہر طرح مدد کررہا ہے ۔
گذشتہ روز اقوام متحدہ میں افغانستان کے مستقل مندوب غلام ایم اسحاق زئی نے پاکستان پر طالبان کو محفوظ پناہ گاہیں اور لاجسٹک سپورٹ فراہم کرنے کا الزام عائد کرتے ہوئے اسلام آباد سے مطالبہ کیا ہے کہ وہ مشترکہ مانیٹرنگ اور تصدیقی نظام وضع کرنے میں کابل کی مدد کرے۔
