بلوچ یکجہتی کمیٹی نے اپنے جاری کردہ بیان میں مستونگ سی ٹی ڈی پولیس کے ہاتھوں پانچ افراد کی ماروائے عدالت قتل کی سخت الفاظ میں مذمت کرتے ہوئے کہا کہ بلوچستان میں ایک مرتبہ پھر پرامن سیاسی جدوجہد کی آغاز کے ساتھ ہی ریاست نے بلوچ سیاسی کارکنان اور بے گناہ افراد کو نشانہ بنانا
شروع کر دیا ہے۔
ترجمان نے کہا کہ مستونگ میں پولیس نے جعلی مقابلے میں پانچ بے گناہ لاپتہ افراد کو ٹارگٹ کلنگ کا نشانہ بناتے ہوئے ماروائے عدالت قتل کیا جو اس بات کا غمازی ہے کہ بلوچستان میں ایک مرتبہ پھر قتل و غارت شروع کرنے کی منصوبہ بندی ہو رہی ہے۔
انہوں نے کہا کہ مستونگ میں جعلی پولیس مقابلے کا ڈرامہ رچاتے ہوئے پہلے سے ہی گرفتار پانچ بے گناہ لوگوں کو ماروائے عدالت قتل کیا گیا جو ایک سانحہ کے ساتھ ایک بڑا المیہ بھی ہے۔
ترجمان نے کہا کہ ایک دہائی کے زائد عرصے سے بلوچستان میں سیاسی کارکنان، صحافی، عام افراد اور تمام شعبے زندگی سے تعلق رکھنے والے افراد کو اسی طرح نشانہ بنایا جاتا رہا ہے۔
جعلی پولیس مقابلوں میں قتل کا یہ پہلا واقعہ نہیں بلکہ بلوچستان کے طول و عرض میں ایک دہائی سے زائد عرصے سے یہ سلسلہ جاری رہا ہے، بلوچستان میں جب بھی اپنے لوگوں کیلئے آواز اٹھنا شروع ہو جاتا ہے تو ریاست کی طرف سے ایسے حربے استعمال میں لائے جاتے ہیں جس کا مقصد سیاسی کارکنان کی آواز کو خاموش کرانا ہے۔
بی وائی سی کے ترجمان نے ملک کے اعلی عدلیہ سمیت تمام سیاسی و انسانی حقوق کے جماعتوں سے اپیل کرتے ہوئے کہا کہ بلوچستان میں ایک مرتبہ پھر سیاسی کارکنان کو نشانہ بنانے کا راستہ تیار کیا جا رہا ہے جس پر پاکستان کے تمام سیاسی رہنماؤں اور پارٹیوں کو ان مظالم پر آواز اٹھانی چاہیے تاکہ بلوچستان میں ہونے والے انسانی حقوق کی پامالیوں کو روکا جاسکے.
ترجمان نے کہا کہ بلوچ یکجہتی کمیٹی پانچ بے گناہ افراد کی ماورائے عدالت قتل کے خلاف بلوچستان میں احتجاج کی کال دینے کا اعلان کرتی ہے۔
