بیزوس کا ایمازون کے سی ای او کا عہدہ چھوڑنے کا اعلان

44

غیر ملکی خبررساں ادارے کے مطابق جیف بیزوس نے اعلان کیا ہے کہ وہ اس سال کے آخر تک اپنا عہدہ چھوڑ دیں گے اور ان کی جگہ اینڈی جیسی کو ایمازون کا سی ای او بنایا جائے گا جو اس وقت کلاؤڈ بزنس کے نگراں ہیں۔

ایمازون قائم کرنے والے جیف بیزوس کمپنی کے قیام سے لے کر اب تک چیف ایگزیکٹو آفیسر (سی ای او) کی حیثیت سے فرائض سرانجام دے رہے تھے۔

جیف بیزوس نے سی ای او کے عہدے سے مستعفی ہونے کا فیصلہ اس لیے کیا تاکہ وہ کمپنی کے میڈیا اور خلائی پروگراموں سے متعلق بعض اہم منصوبوں پر زیادہ توجہ دے سکیں۔

خیال رہے کہ ایمازون کے بانی جیف بیزوس کا شمار دنیا کے امیر ترین افراد کی فہرست میں دوسرے نمبر پر کیا جاتا ہے۔

کورونا وبا کے دوران جہاں متعدد کاروبار ٹھپ ہوئے وہیں ایمازون کے شیئرز میں اضافہ دیکھنے میں آیا کیونکہ کورونا وائرس کی وجہ سے لوگوں کا رجحان آن لائن خریداری کی طرف بڑھ گیا۔