مغربی بلوچستان ایران کے جنوب مشرقی علاقے سیستان میں نامعلوم مسلح افراد کے حملے میں سپاہِ پاسداران انقلاب کے تین اہلکار ہلاک ہوگئے ہیں۔
ایران کی سرکاری خبررساں ایجنسی ایرنا کے مطابق مسلح حملہ آور ایک کار میں سوار تھے۔ انہوں نے نیک شہر کاؤنٹی سے تعلق رکھنے والی باسیج ملیشیا کی دو کاروں پر منگل کی سہ پہر چار بجے کے قریب حملہ کیا۔
سپاہ پاسداران انقلاب نے اس حملے میں اپنے تین اہلکاروں کی ہلاکت کی تصدیق کی ہے اور کہا ہے کہ ایک اہلکار زخمی ہوگیا ہے جبکہ مسلح حملہ آوروں کی شناخت کے لیے تحقیقات کی جارہی ہے۔
قرارگاه قدس نیروی زمینی سپاه جنوب شرق در اطلاعیهای اعلام کرد: در پی حمله یک پژو ۴۰۵ به دو دستگاه خودروی ناحیه مقاومت بسیج شهرستان نیکشهر در سیستان و بلوچستان سه پاسدار کشته شدند
— ایران اینترنشنال – خبر فوری (@IranIntlbrk) September 29, 2020
کالعدم مذہبی تنظیم جیش العدل سے تعلق رکھنے والے مسلح جنگجو ماضی میں ایرانی سکیورٹی فورسز پر متعدد حملے کرچکے ہیں اور ایرانی سکیورٹی اہلکاروں کو اغواء کرنے کے واقعات بھی پیش آچکے ہیں۔
اسی علاقے میں فروری 2019ء میں ایک بس پر خودکش بم حملے میں پاسداران انقلاب کے 27 اہلکار ہلاک ہوگئے تھے۔
