بلوچ لبریشن آرمی کے ترجمان جیئند بلوچ نے نامعلوم مقام سے میڈیا میں جاری کردہ بیان میں حب میں دستی بم حملے کی ذمہ داری قبول کرتے ہوئے کہا ہے کہ بی ایل اے کے سرمچاروں نے پیر کی شب، بلوچستان کے ضلع لسبیلہ کے شہر حب میں ساکران روڈ پر واقع ایک گھر کو دستی بم حملے میں نشانہ بنایا، یہ گھر پاکستانی خفیہ اداروں کے کارندوں کے زیر استعمال ہے۔ اس حملے کا مرکزی ہدف سابق ڈی سی اور پاکستانی بیوروکریٹ احتشام الحق تھے۔
انہوں نے کہا کہ احتشام الحق پاکستانی خفیہ اداروں کا ایک متحرک کارندہ ہے اور خفیہ اداروں کی ایماء پر بلوچ قومی تحریک کے خلاف نا صرف خود متحرک ہے بلکہ دوسرے مخبروں کو بھی سہولیات فراہم کرنے اور معاونت کرنے میں ملوث ہے۔
جیئند بلوچ نے کہا کہ بلوچ لبریشن آرمی اس حملے کی ذمہ داری قبول کرتی ہے۔ بی ایل اے اس سے قبل یہ واضح کرچکی ہے کہ ان تمام عناصر سے ہرگز رعایت نہیں برتی جائیگی جو براہ راست دشمن کے ہمرکاب ہوکر بلوچ قومی تحریک کے خلاف متحرک ہونگے اور رکاوٹ بننے کی کوشش کریں گے۔
