بی ایس او کے مرکزی سیکریٹری جنرل منیر جالب بلوچ نے اپنے جاری کردہ تعزیتی بیان میں کہا ہے کہ پروفیسر نادر شاہ کی کرونا وباء کے باعث شہادت سے بلوچستان ایک لائق اور محنتی استاد سے محروم ہوگیا۔
ان کا کہنا تھا کہ پروفیسر نادر شاہ پچھلے پچیس برس سے تعلیم کے میدان میں اپنے خدمات سر انجام دے رہے تھے اور بطور ڈگری کالج کے وائس پرنسپل ان کی خدمات قابلِ تحسین ہیں۔ وہ ایک محنتی، فکری اور ایک مخلص شخصیت کے مالک تھے۔
ان کا مزید کہنا تھا کہ پروفیسر نادر شاہ آن لائن کلاسز کے حوالے سے اساتذہ کو ٹریننگ دینے کے فرائض سرانجام دے رہے تھے کہ کرونا کا شکار ہوگئے اور پچھلے ایک مہینے سے زندگی اور موت کی جنگ لڑ رہے تھے۔
منیر جالب بلوچ کا کہنا تھا کہ اگر حکومت کرونا وباء کے بارے میں شروع سے سنجیدگی کا مظاہرہ کرتی اور اس وباء کو روکنے کے لیے مناسب اقدامات کرتی تو شاید آج ہم ایسے شخصیات سے محروم نہ ہو تے لیکن افسوس کہ حکومت کی غیر سنجیدگی کی وجہ سے آن لائن کلاسز کے نام پہ طلباء و طالبات کا مستقبل داؤ پہ لگا ہے تو دوسری جانب قوم ایسی شخصیات بھی کھو رہی ہے۔ حکومت کو چاہیے کہ وہ اس بابت سنجیدگی کا مظاہرہ کرے۔
