شھداد ءِ جنگ ءِ بھر بوگ سمائی پیسلھے
گزین بلوچ
دی بلوچستان پوسٹ
انتینو گرامچیءِ لیکہءَ بہ زیر اِیں ءُ وتی زمینءَ بہ چار اِیں، مرچیگیں اے جاوراں بلوچءِ گورءَ جنگءَ چہ ابید دگہ راہ نیست. شھداد
شھدادءِ شھادتءَ رَند بازیں مردمے وڑ وڑِیں تجزیہ ءُ گپ ءُ تران دیمءَ آرگءَ اِنت ، بازیں کسے اے گوشگءَ انت کہ شھداد یک ایم فِل اسکالرے بوتگ ءُ آئی جنگءِ پیسلہ آئیءِ لاچاری بوتگ ءُ آئیءِ اے لاچاریءِ سوب پاکستانءِ گوں بلوچاں ھرابیں رویہ انت۔
اے گپانی تہءَ ھچ پیمیں راستی یے نیست انت۔ شھدادءِ ایش جنگءِ بھر بوگ، وتی سمائی(شعوری) پیسلھے، شھداد سرپد بوتگ کہ پاکستان ایمنیں جُھد ءُ روایتی سیاسی وڑ ءُ پیم ءَ سرپد نہ بیت، بلوچ سرڈگارءِ گلامیءِ ھلاس کنگءِ گھتریں ءُ شرتریں راہ جنگ اِنت ءُ اگاں بلوچءَ وتی ھستی دارگی انت گڑا اے جنگ مھکم ءُ برجاہ دارگی اِنت.
باز مردم اے گپءَ ھم کنت کہ شھداد یک ایم فِل اسکالرے بوتگ، چہ اے جنگءِ بدلءَ آئی وتی انرجی دگہ تک ءُ پھناتےءَ پہ بلوچءَ شرتر کارمرز کتگ اِت اَنت، بلے راستی ایش اِنت کہ آئیءِ ایم فِل اسکالر ءِ بوگءَ آئیءَ را اے کشک پیش داشتگ.
شھداد گرامچیءِ پکرءِ سرجمءَ منّوک بوتگ، کہ یک استانےءِ ھلاپءَ کہ جھد کن ئے،گڑا آئیءِ وانگی رھبند ءَ سرجمءَ مٹ کنگءِ ءُ وتی یک وانگی رھبندے ءِ جوڑ کنگءِ جھدءَ بکن ءُ راجءَ راستیءِ زانتءَ بدئے۔ پہ ھمے ھاتر ءَ شھدادءَ یک نیمگے پرائیوٹ وانگجاھاں وانینتگ ءُ دومی نیمگءَ بلوچ نودربر گلانی پلیٹ پارمءِ تہءَ بلوچ ورناناں راستیءِ اِلم داتگ۔
شھداد چشیں مردمے نبوتگ کہ آئی ءَ تالیم ادارھانی تہ ءِ گوں بلوچاں ھرابیں رویہ ءُ کمتریءِ اھساس جزباتی بکن انت ءُ آ جزباتی ئیں ردِ ء امل ءَ جنگءِ نیمگءَ بروت. شھداد یک سیاسی درچےءِ پیداور اِنت، آئیءِ سیاسی رُدوم چہ سالاں بُوَان بوتگ.
شھداد انسانی ھکانی گَل ءُ نودربر گَلانی ءَ تہءَ دہ سال گوازینتگ، نودبرانی جیڑہ ءُ انسانی ھکانی پادمال کنگ ءِ ھلاپ ءَ مدام جھد کنگ ءَ بوتگ. ھمے وجہ ءَ شھداد 2015ءَ چہ کیچءَ آوار جنگ بیت ءُ لھتیں وھد آ پاکستانءِ ٹارچرسلءَ بند کنگ بیت ءُ مدتےءَ پد چہ کیچءَ یل کنگ بیت بلے آ پد ءَ وتی وانگءُ جھد ءِ سپرءَ کراچیءُ اسلام آبادءَ برجاہ داریت.
اے سرجمیں سپر، کتہ کاری( تجربہ)، وانگ(مطالعہ )آئی ءَ اے آسر ءَ سر کن اَنت ءُ آ وتی ایم فلءَ میان یل دنت دیم پہ کوھاں رھادگ بیت.
شھداد ءُ اھسانءِ پیمیں ورنا کہ مرچی سلاہ بندیں جھد کنگءَ اَنت، آئیءِ سوَب ایش نہ اِنت کہ اسلام آبادءَ بلوچاں سیٹ دیگ نہ بیت یا کہ بلوچستان مزن شھدربرجاہ ءُ شھدربرجاہ کم اَنت یا کہ بلوچ نودربراناں اسکالرشپ دیگ بوگءَ نہ اِنت، شھداد ءُ اھسان پہ ھمے ھاتر ءَ سلاہ بندیں گلانی جھدءِ بھر جوڑ بوتگ اَنت کہ آیاں وتی زمینءِ گلامی، راجءِ سرءِ زوراکیءُ دگرے زورگریءُ واجھیءِ گْرانیں درد ءُ مارشت بوتگ اَنت.
دانکہ بلوچءِ زمین گلام اِنت شھدادءُ اھسان پیمیں ورنا ھرچ دورءَ دیمءَ کاینت ءُ اے جنگءَ برجاہ دار اَنت، دانکہ اے زمینءِ سر ءَ دری زوراک ساڑی اِنت، دانکہ بلوچءِ ھَستانکی ترسءِ تہءَ اِنت ءُ دانکہ بلوچ وتی سرزمینءِ واجہ وت نہ بیت، اے جنگ برجاہ بیت ءُ ھرچ دورءَ شھداد ءُ اھسانءِ پیمیں ورنا اے جنگءِ برجاہ داروک بنت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
