نشہ چہ دُرستاں گنتر انت
نبشتہ کار: مھراب ازیز
دی بلوچستان پوسٹ
بیگاہ ءِ وهد ءَ کہ من رپیک لنگ دیست گڑا من ابکہ بوتاں کہ رَپیک لنگ مرچی وتی لنگی ءِ هوش ءَ نہ انت انچو ترندیں گاماں گوں روگ ءَ انت کہ گش ئے مرچی رَپیک ءِ دل ءِ درسیں مراد سرجم بوتگ انت .
من توار جت …… رَپیک اوشتات …… بلے سک گل ات .
من گشت ……… رَپیک ترا هیر انت مرچی تو چو ترند ترند روگ ءَ ئے ……….؟
گشت ئِے لالا تو سھی نہ ئے ما سُھبی درسیں میتگ ءِ مردم شاه ساهب ءِ دیم ءَ ڈی بلوچ ءَ شتگ ایں؟
من گشت کجام شاه ساهب …..؟
گشت ئِے اهسان شاه ساهب تو زاناں نزان ئیگ ئے ……؟
هاں ……….
گڑا چے بوتگ….. من پرس ات ….؟
گشت ئِے لالا نزاره بوتگ کجام ناچ کجام ڈھل مهلوک ءَ اے گرم ءَ وت ءَ را کشتگ پہ ناچ.
گرا من گشت تو ناچ نہ کت ….
گشت ئِے چِے لالا من پشت کپاں من شر نہ چیت .
آئی ءَ پد گشت دگہ کسے ءَ اھسان ءِ آیگ ءَ پایدگ بیتگ یا نہ بیتگ بلے من ءَ پایدگ بوتگ …….
من گشت چوں …..؟؟
گشت ئِے لالا تو نہ گند ئے من چو ترند ترند ءَ روگ ءَ آں، اد ءَ چار پانزده سد ءِ شیشیہ ءُ کریش زرتگ مرچی من شر دل ءِ سیر ءَ کش آں، من ءَ ناچ تاوان نہ بوت.
آ دگراں هشک ءَ نچ ات نچ ات شت اَنت ءُ لوگ ءَ وپت اَنت، من ءَ هزارے کپے رس اتگ، همیش شیشیہ کتگ انت رو آں،کش آں.
من گشت ….. شوم گرا اے زراں تو لوگ ءَ چکاناں بداتییں ….
گشت ئِے انا لالا اے نشہ چہ چکاں گنتر انت.
سک بژن بوت من ءَ …… اے مئے ورنا چو شگالی انت . مرچی ووٹ لوٹوک ووٹاں گر انت ءُ رو اَنت اسلام آباد ءُ لاھور ءَ اَیش ءُ نوش ءِ زند گوازین انت . مئے کوم همد ءَ گوں نشھاں سر ءُ لیٹ انت داں بہ مر انت . بلے اے کوم انگت هوش نکنت پد ءَ همے لٹِکانی رند ءَ کپتگ انت .
چنت سال انت کہ همیں ووٹانی وهد ءَ کاینت مهلوک ءَ رپین انت ءُ رو انت، بلے من ءَ رَپیک لنگ ءِ یک گپے دوست ….. دگہ کسے ءَ اے ٹگانی آیگ ءَ ناچ پاید بیت یا نہ بیت من ءَ پاید بوت…………. ….. جت ئِے کندگے ءُ پُشتے ماندات ءَ شُت .
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
