شھید واجہ جی ایم ءُ آئی ءِ سیاسی سپر
سپرھان بلوچ
دی بلوچستان پوسٹ
زالم ءُ مزلوم ءِ میان ءَ بس یک رشتھے بیت آ رشتہ زلم ءِ ۔ راجدپتر ءَ زالم ء ُ کبزہ گیرانی نشانی دنیا ءِ کنڈ کنڈ ءَ ا یر انت ھندوستان ءَ جیانوالہ باگ ء ُ یا الپریڈ پارک بہ بیت یا بلوچ سرزمین ءِ تہ ءَ مرگاپ ء ُ سوراپ بہ بنت اے زالم ء ُ سامراج ءِ انچیں نشانی انت کہ داں جھان ھست انت اے نشانی لس مھلوک ءِ دل ءِ سر ءَ ایرانت ۔ کہ اود ءَ راجانی ورنا ء ُ رھشوناں وتی تنگوئیں سربکشاتگ انت ء ُ وت ءَ را راجدپتر ءِ تہ ءَ ابدمان کرتگ مروچی راجدپتر ءِ تہ ءَ چشیں مردمانی لڑ سک مزن انت ۔ بھگت سنگ چندرسبھاش بوس شیکر آزاد ء ُ پیدرل کاستروڈاکٹر چی گیورا امیلکار کیبرال دگہ بازیں مردمانی رنگ ءَ وت ءَ را راجدپتر ءَ زندگ کرتگ ۔ اگاں راجدپتر ءِ تہ ءَ زور گیر ء ُ زالم ءِ نشانی جیانوالہ باگ ء ُ الپریڈ پارک ءِ نام گرگ بیت گڑا الم مرگاپ ءِ ھم نام گرگ بیت ۔ بگندئے مرگاپ سکیں لس جاگھے پیسر ءَ نہ بوتگ بلے راجدپتر ءِ تہ ءَ ایشی یک انچیں جاگھے وتی ھاتر ءَ ایر کت کہ امریکہ گانگرس ء ُ یورپی یونین ءَ ھم مرگاپ ڈسکس بوت ء ُ داں جھاں ھست انت مرگاپ زالم ء ُ زلم ءِ نشانی ء ِبابت ءَ راجدپتر ءِ تہ ءَ ایر بیت ۔
سامراج ء ُ زالم ءِ نام کہ ھر وھد ءَ کہ گرگ بیت گڑا الم مئے مھلونک ءِ دیم برٹش سامراج ءِ نام دیم ءَ کیت پرچا کہ برتانیہ ءَ دوسد سال اے زمین ءِ ٹکر ءِ سر ءَ راج کتگ ء ُ زلم ء ُ زوراکی ءِ بلائیں کچے ءَ ُنشانی اد ءَ ایرکتگ ۔
وھدے دنیا سر ءَ دو مزنیں جنگ (جنگ ءِ اَزیم) بنت دنیاءِ بازیں زورآوریں ملک ء ُ راجانی پوزیشن انچش نزور بیت کہ آئی وتی پادانی سر ءَ اشتات کت نہ کن انت کجام جاگھے ءَ کہ آیانی زلورت کم بنت ء ُ آوتی اوداوتی کالونی ءَ ھلاس کن انت ھمے رنگ بر سگیر ءِ تہ ءَ آیانی دیم ءَ رکاوٹ ء ُ تکانسری سک باز بنت یک نیمگ کانگرس ءِ پولیٹیکل جدوجھد ء ُ دومی سبھاش چندر بوس ءِ سروکی مزاھمتی آرمی کہ آ برتانیہ ءِ سرجمیں لوٹاں پیلو کنگ ءَ نیل انت گڑا برتانیہ ءِ تھت ءَ وتی اے ھند ء ُ دمگاں وتی اسر وسوک ءِ برجم دارگ ءِ ھاتر ءَ پاکستان ءِ پیمیں ملکے اڈ دنت کہ آئی پد پاکستان گوں پندلاں بیست ء ُ ھپت مارچ نوزدہ سد ء ُ چل ء ُ ھشت ءَ بلوچ سرزمین ءِ سر ءَ کبزہ کنت آئی پد بلوچ ءَ ھر وھد ءَ پاکستانی زلمء ُ زوراکی ءِ ھلاپ ءَ آواز چست کتگ ء ُ مزاھمت بندات کتگ 1948ءَ مزاھمتی تھریک بہ بیت یا 1958ء ُ 1962ء ُ1971ءِ مزاھمتی تھریک بہ بنت بلوچ ءَ ھر وھد ءَ پاکستانی زلم ء ُ کبزہ ءِ ھلاپ ءَ آواز چست کتگ ء ُ وتی آجوئی ءِ ھاتر ءَ جدوجھد کتگ پاکستان ھر وھد ءَ برے مذاکرات ء ُ برے نیکراہ ءِ نام ءَ بلوچ رھشون رد داتگ ء ُ آیانی تھریک کمے مدت ءِ ھاتراھاموش کتگ بلے بلوچ راج ءَ ھر وھد ءَ پاکستانی گلامی نہ منتگ ء ُ آئی ھلاپ ءَ جدوجھد بندات کتگ پاکستان ءِ زلمانی داستان مارا بلوچستان ءِ تہ ءَ ھر وھد ءَ گندگ ءَ کیت آ زلپکار الی بھٹو ءِ دور ءِ ھکومت بہ بیت ایوب ھان ء ُ زیا الھک یا مشرپ ء ُپیپلز پارٹی ء ُ مسلم لیگ (ن) ءِ وھد بہ بنت ۔
بلے ھمک گلا میں راجانی پیم ءَ کہ ھمک راجانی تہ ءَ ورنا دراتکگ انت ھمے ڈول بلوچ سرزمین ءِ سر ءَ ھم ھمے رنگیں ورنا دراتکگ ء ُ آیاں راجی آجوئی ءِ سکین داتگ ء ُ بلوچ راج سرپد کتگ کہ تو پاکستان ءِ گلام ئے ۔
ھپتاد ءِ دھک ءَ وھدے کہ بلوچستان ءَ پوجی لشکر کَشی وتی زوراں گوں بلوچ نسل کشی ءَ کنگ ءِ تاں یک نیمگ مند ءِ دمگ ءَ پرزند ءِ ایوب(شھید گلام مھمد)شھید پدا ءِ ھمرائی ءَ وتی پاد بی ایس او ءِ تہ ءَ ھیر کتگ اِش لوگ پہ لوگ ءِ بلوچ آجوئی سکین دات اِش ۔ اے وھد ھپتاد ء ُ چار ءِ وھد ات کہ شھید پدا جان مند ءَ ٹیچری ءِ ھاتر ءَ وانینگ اتکگ ات واجہ گلام مھمد آئی ھمرائی ءَ بی ایس او ءِ کارانی ھاترءَ یک پاد ءَ اشتاتگ ات ء ُ بی ایس او مند زون ءِ کارگشاد بوت ۔
وھدے ھمرائی ءَ ھرچیز مٹ بواں بوت انت زولپکار الی بھٹو ءِ دور ھکومت ھلاس بوت ء ُ ڈکٹیٹر زیا الھک ءِ دور بندات بیت بھٹو دور ھکومت ءَ وتی سرجمیں زور جت اَنت پہ بی ایس او ء ُ بلوچ راجی جنز ءِ ھلاس کنگ ءَ بلے ہچ نہ بوت آئی بی ایس او ءِ سنگت وارنٹ کت اَنت آیانی لوگ چانپہ جت انت پہ بی ایس او ءِ سنگتاں لوگ ءِ روگ ھم مشکل بوتگ ھر وھد ا پولیس ء ُ لیویز ءِ مردم آیانی لوگ ءَ اشتوک بوتگ انت بلکیں لوگ ءَ کاینت واجہ گلام مھمد ءِ لوگ ءِ مردم گش انت پولیس ء ُ لیویز انچش واجہ گلام مھمد ءِ رند ءَ کپتگ انت واجہ ءَ وتی لوگ ءَ اتک کرت نہ کتگ واجہ برے یک سنگت ءِ لوگ ءَ بوتگ بلے واجہءَ وتی کاراں چہ پشت نہ کنزتگ ۔ ھمے ڈول ءَ;46; 1981ءَ واجہ ءَ میٹرک ءِ چکاس پاس کرت ء ُ وانگ ءِ ھاتر ءَ ماں کراچی شت ء ُ اود ءَ ھم وتی سیاسی کار یل نہ کت اَنت 1982ماں بی ایس او کراچی کارگشاد بوت ء ُ کراچی ءِ تہ ءَ بی ایس او ءَ را شریں وڑ ء ُ ڈولے ءَ پال کت ۔ وھدے کہ 1984ءَ دوئیں بی ایس او آیانی انزمامی کونسل سیشن بوت واجہ گلام مھمد سند ءِ سوبائی سدر بوت پد ءَ 1986 ءَ بی ایس او ءِ ھشمتی کونسل سیشن بوت واجہ بی ایس او ءِ بنجائی جونئیر وائس چیئرمین بوت ۔ کونسل سیشن ءَ پد بی ایس او ءِ رھشون ء ُ چہ بی ایس او ءَ پارگ بوتگیں مردماں بلوچ ءِ ھاتر ءَ یک ماس پارٹی ءِ مارت ء ُ آئی ھاتر ءَ کار بندات کت کہ آ بلوچ ءِ ترجمانی ءَ بہ کنت ء ُ بلوچ جنز ءِ رکینت بہ کنت اے وھد راج دوستیں اگاں گل ءِ ھست اَت آ تھنا بی ایس او بوتگ ء ُ بی ایس او پد ءَ وانندھانی گلے بوتگ ء ُ گل پدا ھچ پیم ءَ یک پارٹی ءِ لوٹاں پورا کرت کت نہ کنت ء ُ یک مستریں تاوانے ھمے بوتگ کہ اگاں چہ بی ایس او ءَ چونیں ورنا ءِ پارگ بیت آ وتی ھاتر ءَ چشیں پارٹی ء ُ ادارہ ءِ نہ گند انت آیانی سیاسی چست ء ُ ایر زوال بنت ء ُ آ اسٹبلشمنٹ بھر جوڑ بنت یا درملک ءَ رو اَنت ء ُ پارٹی ءِ نہ بوگ ءِ وجہ ءَ بلوچ ءِ سیاسی چست ء ُ ایرنہ بوگ ءِ برابر ءَ بنت یک نیمگ ءِ بلوچ ماس پارٹی ءِ جوڑ کنگ ءِ کوشست ءِ دومی نیمگ ءَ بی ایس او ءِ وتی تہ ءَ یک دومی ءِ گوما زھر ء ُ کھری انچش مزن بوگ ءِ تاں کہ بی ایس او ءَ را پد ءَ دو ٹکر ءَ اش کرت یک نیمگ ءِ کھور ھان ء ُ دومی نیمگ ءَ ڈاکٹر یسین بوت ۔ وھدے کہ کھور ھان وتی ھاتر ءَ دگہ بی ایس اوے جوڑ کت کہ آئی نام بی ایس او رسھب کت ء ُ واجہ گلام مھمد بی ایس او ءِ سینئر وائس چیئرمین بوت ء ُ اے ھمے وھد ات کہ واجہ گلام مھمد ءَ چیئرمین ءِ نام پر بیت ۔
1987 بنداتی ماھانی تہ ءَ بی ایس او ء ُ بلوچ راج وتی پارٹیءِ واب سرجم کرت ء ُ، ءِ بن ھشت ءِ ایر کنگ بوت ء ُ بلوچ راج ءَ وتی باندات ءِ چہ تھارمائی ءَ درآھگ ء ُ رژنائی ءِ واب ءَ گندگ ات بلوچ ورنا ء ُ کماش ھر کس ءِ دپ ءَ “ایک سرخ سمندر” بی ایس او مئے جان انت بی ایس او ھمک بازار ء ُ دکان ءَ چہ بی ایس او مشئلے جوڑ کتگیں چادر ء ُ گشان ءَ پُر ات اَنت ھمک ورنا ء ُ کماش زھگ ء ُ زالبولانی سر ءَ بس بی ایس او ءِ چادر ء ُ گشان ات اَنت ۔
بلے مپاد پرستیں لیڈر ء ُ رھشوناں بلوچ ءِ اوست ءِ پروشگ ءِ دیر نہ جت وھدے1988ءَ جنرل زیا الھک ءِ اناگہ ءَ مرگ بیت ءُ اے زان انت کہ نوں الیکشن بنت مالک ءُ ھئی ٹولہ ھمے پیسلہ کن انت کہ ما اے پیم سک نزور انت اگاں مارا مزبوت بوگ انت ما پارلیمنٹ ءَ برواں پارٹی دیوان ءَ پارلیمنٹ ءِ ایجنڈا ءَ ایر کن انت بلے ھما وھد ءَ واجہ گلام مھمد ء ُ شھید پد اے گپ ءِ منگ ءَ تیار نہ بنت ء ُ پارٹی ءِ اجلاس ءَ واک آوٹ کن انت ۔ ء ُ دو مئی ءَ شھید پداءَ آئی دکان ءِ تہ ءَ شھید کن انت ۔ پد ءَ مالک ھئی ٹولہ ءِ دیم رکاوٹ کم بنت ء ُ پد ءَ آٹولہ نواب اکبر ھان بگٹی ھمرائی اتھاد کن انت پارلیمنٹ ءَ رونت ء ُ وزرات زور انت ء ُ نند انت ۔
ء ُ پدا 1989ءَ بلوچستان نیشنل موومنٹ ءِ بن ھشت ءِ ایر کنگ ء ُ بلوچ سرزمین ءِ آجوئی ءِ ھاتر ءَ جدوجھد کنگ پد ءَ بازیں نام نھاد رھشونانی بلوچ آجوئی ءِ جنگ ءَ را یکسر ءَ پیلو نہ کنگ ء ُ دوتل دوپوستی ءَ کنگ ء ُ گپ دگہ بہ کن ء ُ کار دگہ بہ کن بلے بلوچ ورناھاں وتی راہ یل نہ دات ء ُ آیاں زانت بلوچ ءِ راہ بس یکیں انت آ بلوچ ءِ آجوئی ءِ جنگ ء ُ آئی بابت ءَ جدوجھد انت 1999ءَ بلوچ سرزمین ءِ سر ءَ سیاسی ء ُ مزاھمتی جدوجھد پد ءَ بندات بوت 2002ءَ واجہ ڈاکٹر اللہ نزر بلوچ تربت ءَ بی ایس او مھراب ءِ سیشن ءِ تہ ءَ ھمے ایجنڈا ءَ ھیر کنت ء ُ کہ مارا گیرپارلیمانی سیاست کنگ انت ء ُ مارا پارلیمانی پارٹیانی پلہ مرزی یل کنگ انت بازیں اکتلاپاتانی دارگ ءَ رند واجہ ڈاکٹر اللہ نزر وتی ھمراھاں گوں درکیت دگہ بی ایس اوے اڈ کنت کہ آئی نام ءَ بی ایس او آزاد کنت پد ءَ وھد ے کہ بی این ڈی پی ء ُ بلوچستان نیشنل موومنٹ ءِ وتی انزمام ءِ پرس “کانفرس” ءَ کن انت کہ ما انزمام کتگ مئے پارٹی ءِ نام نیشنل پارٹی انت واجہ گلام مھمد ء ُ شھید لالہ منیر گوں وتی ھمراھاں ھما بابت ءَ پرس “کانفرس” کن انت بی این ایم وتی جاگہ ھست انت ھرکس ھرجاگہ ءَ روت شت کرت کنت ء ُ پد ءَ بی این ایم ءِ سیشن ءَ کن انت چہ بلوچستان نیشنل موومنٹ ءَ پارٹی ءِ نام ءَ بلوچ نیشنل موومنٹ کن انت ء ُ سیاسی لوٹاں دیم ءَ ایرکن انت ھما لیکہ کہ شھید پد ءَ کہ داتگ ات کہ بلوچ ءَ اگاں آجوئی دنت آ گیر پارلیمانی سیاست انت پد ءَ ھما لیکہ ءَ زندگ دار انت ء ُگیرپارلیمانی سیاست ءِ جار ءَ جن انت ء ُ آ ھمے گش اَنت پارلیمنٹ بلوچ ءِ درد ءِ دوا نہ انت بلوچ ءِ ھک مشین ء ُ گنٹہ نہ انت بلوچ ءِ ھک بس تھنا آجوئی انت ء ُ پارلیمانی سیاست بلوچ ءَ آجوئی نہ دنت پاکستان مگربی ملکانی پیم ءَ مھذبیں ملک ءِ نہ انت تو آئی ادارھانی تہ ءَ بہ نند ء ُ وتی ھک ءِ گپ ءَ بہ کنت آپاکستانی ادارھانی کچ شر زانتگ کہ آیاں کہ ٹھینوک ء ُ دیم کاروک ءِ داں تئی سرے سر ءَ دست ایر مہ بیت تو ھچ کرت کت نہ کن ئے ء ُ چش ھم بوت کت نہ کنت ترا یکے وت داوت بہ دنت کہ بیا منی پاداں بہ گڈ ۔
بلوچ راجی جھد ھما وھد ءَ گیش مزبوت بوت کہ واجہ شھید گلام مھمد ء ُ شھید سنگت سنا شھید جلیل ریکی ء ُ دگہ بازیں سنگتاں بلوچ نیشنل پرنٹ ءِ بن ھشت ایرکت ۔ بلوچ نیشنل پرنٹ ءِ بندات ءَ پد واجہ گلام محمد گوں وتی ھمراھاں بلوچ سرزمین ءِ سر ءَ چشیں جاگھے یل نہ دات کہ اود ءَ بلوچ آجوئی ءِ کلوہ نہ برت ء ُ بلوچ ءَ آجوئی ءِ سکین نہ داتگ ڈیرہ بگٹی ءَ بگر داں گوادر ءَ بیا کراچی ءَ بگر داں شال ءَ برو ھر کجا واجہ گلام مھمد لوگ پہ لوگ بوتگ بلوچ ءِ آجوئی ءِ سکین داتگ لیاری ء ُ مند ء ُ تربت پنجگور چشیں چار راہ ء ُ پرس کلب ءِ نیست کہ واجہ گلام مھمد نہ شتگ پاکستان ءِ چمانی دیم ءَ اے نہ گشتگ کہ پاکستان اے جنگ تو مئے سر ءَ مسلت نہ کتگ بلکیں اے جنگ ءِ بندات ما وت کتگ اے بلوچ ءِ آجوئی ءِ جنگ انت ایشی ءَ را تو داشت کت کرت نہ کن ئے ۔ چہ ھمے کمنٹمنٹ ءَ پاکستان ءَ وتی تہ ءَ ترس بندات کرت ء ُ پاکستان ءَ واجہ گلام مھمد ء ُ آئی سنگتانی پروش ءِ دیگ ءِ ھاتر ءَ ھر وڑیں کوشست بندات کت آیانی ھلاپ ءَ وتی پروپکنڈائی مشینری کار ءَ جت اَنت آیانی ھلاپ ءَ دروگیں ایپ آئی آر کت ء ُ آیانی لوگ چانپہ جت اَنت بلے انگت واجہ گلام مھمد وتی کمنٹمنٹ نہ پروشت یک برے2007ءَ پاکستان ءَ واجہ گلام مھمد چست کت ء ُ آئی ءَ را شش ماہ ءَ داں بیگواہ کت آئی ءَ را وڑ وڑیں ٹارچر کت شش ماہ ءَ پد انسداد دھشتگردی ءِ کیس ءَ پولیس ءِ ھوالہ کت ء ُ واجہ ءِ پروش دیگ ءِ ھاتر ءَ پاکستان ءَ وتی سرجمیں پندل ساز ات اَنت وتی پروپکنڈائی مشینری نیشنل پارٹی ء ُ دگہ بازیں ٹولیانی نیمگ ءَ ھمے پروپکنڈا تیز کنگ بوت کہ واجہ آئی ایس آئی مردم انت آ گرگ بیت پد ءَ یل کنگ بیت ۔ آئی جند ئے سنگت انچش پروپکنڈا ءِ شکار بوت اَنت واجہ ءَ را گوادر ءَ دیوان ءِ تہ ءَ ھمے گشگ بوت کہ واجہ تو آئی ایس آئی ءِ مردم ئے تو انگت آجوئی ءِ گپ ءَ کن ئے واجہ چمانی ارس درکاینت ھمے پسو ءَ دنت کہ اے گپ ءَ من وھد ءِ سر ءَ ایر کناں وھد ھر چیز ءَ پدر کنت پد ءَ ھما وھد ءَ ھرچی پدر کت مروچی درس پدر انت کہ آئی ایس آئی ءِ مردم کہ انت ء ُ کہ بلوچ ءِ نسل کشی ءَ گوں پاکستان ءَ ھوار انت ء ُ کہ بلوچ نیشنل لسٹ کہ انت ۔
3اپریل 2009 ءَ اے گپ سرجم ءَ ھما وھد ءَ پدر بوت کہ وھدے پاکستانی پوج ءَ واجہ گلام محمد ء ُ آئی سنگتاناں چہ واجہ کچکول الی ایڈوکیٹ ءِ چیمبر ءَ چست کت ء ُ پد ءَ آیانی جون ماں نو اپریل ءَ مرگاپ ءِ دلبند ءَ دور دات انت ۔ بگندئے پاکستان ءَ ھمے مارات کہ من واجہ ءَ شھید کن آں بلکیں جھد ھلاس بیت آئی نزانت کہ گلام مھمد بلوچانی تہ ءَ یک لیکھے جوڑ بوتگ ۔ ۔ ۔ کہ آئی شھادت ءَ رند بلوچستان ءِ تہ ءَ پاکستانی (جھنڈا) بیرک تھنا داں ایپ سی ء ُ آرمی کیمپ ءِ تہ ءَ جنوک بیت ء ُ پاکستانی ترانہ ءِ نام نشان چہ بلوچستان ءِ تہ ءَ گار بیت ۔ ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
