ساجد ھُیسن ءِ نام ءَ پہ یک پچیں نمدی یے
نبشتہ کار: عزیز بلوچ
دی بلوچستان پوسٹ
دورت ءُ درھبات ئے ، ھرکجا ئے دْراہ ءُ سلامت باتئے۔
ساجد ھیسن تئی بیگواھی ءَ من ءَ تانکسر نہ کتگ پرچاکہ نا من تئی سنگت بوتگ آں ءُ نیکہ من ءُ تو لبزانکی رد ءَ یکے دومی ءَ پجّا کار ایں بلے ھما روچ ءَ کہ تئی بیگواہ بُوَگ ءِ ھال اِشکتگ گُڑا من جیڑاتگ کہ ترا ترانگاں بدے آں کہ بگند ئے ترا یات نہ بیت ءُ اسل ءَ تئی گُمان ءَ ھم بوت نہ کنت، من ترا چوں پجّا کار آں، بگند ئے تو ھمئے جیڑاگ ءَ ئے۔ گُڑا اِشکن.
اولی رند ءَ من ترا چہ یک وتگڑیں نامے ءَ یک آزمانکے بلوچی ءَ نبیستگ ات۔ آ آزمانک ھما وھد ءَ نبشتہ کتگ ات کہ منی چماں چاگردی رسانکدار (سوشل میڈیا) ءَ اناگت ءَ بلوچستان ٹائمز ءِ سائٹ کپتگ ات ءُ ایشی چارگ ءُ وانگ ءَ پد من بازیں نبشتانکے کہ آ بلوچی ءُ انگریزی ءَ نبشتہ ات انت ءُ ندکار تو ات ئے، گوں ھماں نزیکی بوت۔ گڑا منی دل ءَ را یک ناسرجمیں ھُبے ءَ گْور جت ءُ جُھد کت کہ وتی نبیستگیں بلوچی نبشتانکاں ءُ انگریزی نکاناں ھمئے رسانکداری تاک ءَ پہ دیمتر ءَ روان بدے آں۔ ھما روچ ءَ من ترا چہ آشنا بیت آں، ھما ساھتاں منی ءُ تئی یک اِبرمی نزیکی ءُ آشنائی یے بوت ءُ آچ ھما کنکشن ءَ من ترا ایُوک بس تاکاری، بلوچیءُ انگریزی نبیستگیں نبشتانکانی وانگ ءَ پجّا آورتگ ءُ من ھما اِنت کہ ترا پجّا کاراں۔
ساجد ھُسین اے وھد ءَ کہ من نوک چہ بلوچستان ٹائمز ءَ آشنا بیتگ اِت آں گڑا من ءَ اے وھد ءَ ھبر اوں نہ بیتگ کہ ایش تاک ءِ سرشونکار تو بیت کن ئے۔
ایش تاک ءِ اسٹینڈرڈ ءُ رسانکدری بالادے ٹپاسگ ءَ رند من ءَ یک ھیالے ءَ پہ پٹ ء ُپُول کنگ ءُ شوھازگ ءَ ڈالچار کُت، وھدے من اے تاک ءِ رسانکدری بالاد گوں چاگردی رسانکدار بلوچیءُ بلوچستان ءِ گیش بابت ءَ شِنگ بیتگیں ایدگہ تاک ءُ ماھتاکاں ھمدپی کُت تاں یک گِستائیں ءُ پدّریں آسر ءَ سر بیت آں کہ اَلم ءَ اے تاک کہ بلوچستان ٹائمز ءِ نام ءَ لس مھلوکی ءُ چاگردی رسانکدار ءَ وھد پہ وھد بلوچی ءُ انگریزی ءَ اپڈیٹ بوگ اَنت ایشر ءَ یک زانتکار، رسانکداری رھبند ءُ ھُنراں چہ آشنائیں ءُ بلادیں مردمے شونکاری کنگ ءَ اِنت۔
من ءَ تاں یک وھدے ءَ گُماں اوں نہ بیتگ کہ ایشی ءَ را بلوچے ودْینگ ءَ اِنت بلے بلوچی آزمانک ءُ نکاناں کہ دیستگ ات گڑا یِکم بوتگ آں اسل ءَ بلوچستان ٹائمز ءَ بلوچ ءِ شونکاری کنگ انت ءُ دل ءَ گل بیتگ آں کہ باید اِنت چوشیں تاک ءُ میگزین گیش ءَ چہ گیش چاگردی رسانکدار اِیر کنگ بہ بنت۔
ساجد ھُسین شمئے جُھد ءِ برورد ءَ من وتی تنُ آپیں ھُبے ءِ پروشگ ءَ پہ گواچنی ءَ سک ءَ واھگدار بیتگ آںکہ کد بیت منی نبشتانک اوں اے تاک ءَ شنگ بہ بنت، چوشکہ من وت تاں یک مزنیں وھدے ءَ گوں انگریزی نبشتانکانی نبشتہ کنگ ءِ راھبند ءَ جُھد ءُ کوشست ءَ بیتگ آں کہ کد بیت من اوں بلوچستان ٹائمز ءَ چھاپ بیتگیں نبشتہ کارانی پیم ءَ نبشتہ ءِ وڑ ءُ پیم ءَ ھیل بکناں۔
اگاں چوش سرپد بُبو کہ من چہ تئی ھُمک پیمیں نبشتہ کتگیں ءُ ساچشتی مواداں پہ سدّک شیدائی یے بیتگ آں ءُ منی نبسیگ ءِ سکین ءِ توک ءَ تئی زنڈیں دستے ھوار انت۔ مرچی اگاں من بلّدیں ءُ نامی ئیں ندکار ءُ نبشتہ کارے نہ آں بلے الم ءَ نوک گام ءُ نوک باھندیں نبشتہ کارے ءِ جُھت ءَ پجّارگ بگند ئے بہ باں ءُ سدکاں کہ تئی سر ءُ سوجانی پکار انت، بس اِنا مکن۔
ھمئے شوھازگی ءِ مساپری ءَ من لھتیں انگریزی نبشتانک کہ آ بلوچستان ٹائمز ءُ دگہ لھتیں روتاکاں چھاپ بیتگ اِت انت، وانت ءُ ھِیرتی ٹپاس ات اَنت کہ آیاناں تو نبیستگ اَت، من چہ تئی نبشتانکاں بازیں ھُنر ءُ نبشتھی راھبندے تاں یک مُدتے ءَ دربرگ ءِ جُھد کت، پرچاکہ منی زانگ ءِ رد ءَ تئی کجام اوں انگریزی ءَ چھاپ بیتگیں نبشتانک ءَ مردم بچار ایت تاں روتاکی ھُمک رنگیں نبشتہ کارانی نکاناں کم نہ اَنت، تئی نبشتہ کنگ ءِ درشانداب، انگریزی ءَ لبزانی کمایگ ءُ کارمرز کنگ، رسانکداری ازم ءِ بالاد کُل وتی مٹ وت اَنت۔
ساجد باور بکن تئی نبشتانکانی وانگ ءَ چہ ھُمک کس ءَ را ھمے سرپدی رس ایت کہ تو باز وانیندگ ءُ کواھسیں ندکارے ئے، بلے منی ستر جُھد ءُ کوشست ءَ پد من انگت ءَ تاں انگریزی ءَ جُوانیں رنگ ءَ نبشتہ ءِ لیکوڑ در نہ بُرتگ۔
بلے چہ تئی وانگ ءَ پد من یک اَلم ءَ چیز درُبرتگ کہ نبشتہ ءُ نبیسگ ءِ ھاتر ءَ وانگ الُمی انت ءُ یک جُوانیں ندکار ءُ شرگدارے ءِ بوگ ءِ ھاتر ءَ ایشانی بُنکی اِزم ءِ دربرگ ءِ پَکار اِنت۔
پمیشکا تئی ھُمک ساچشتی رنگ منی نزّ مردم ءَ ھمے سِکین ءَ دنت کہ ھِمکس گیش وان ئے تاں امنچُوک جُوانتریں ءُ ڈولداریں نبشتہ کارے جوڑ بیت کن ئے۔
ساجد بلوچ ترا یک ھبرے گشگ لوٹاں، اگاں ترا باور بیت من یک مدتے ءَ تاں نبیسگ ءَ دْور بوگ ءَ رند کجام اوں وھد ءَ کہ تئی چہ ساچشتی نکاناں دوچار کپتگ آں تاں منی توک ءَ پد ءَ نبشتہ ءُ نبیسگ ءِ ھُب ءِ ودّان بوتگ ءُ منی توک ءَ یک شّریں تاککار بوگ ءِ ھم ھُنر پاد اتکگ انت ءُ من سرپد بیتگ آں تو باز وانتگ ءُ پمیشکا تو کجام اوں زبان ءَ کہ نویس ئے، بلوچی بہ بیت یا انگریزی پہ وانگ ءُ پٹ ءُ پول ءَ مردم ءَ الم ءَ تاں یک کچ ءُ کساسے ءَ ڈالچار کن ئے۔۔
ھمئے وھداں وتی منّ ءَ بازیں وانگ ءُ بلدی ءَ پد من یک آزمانکے بلوچی ءَ نبیستگ ات ءُ دل ءَ گَل اتوں کہ ایشی ءَ را تئی سر ءَ روان ئِے دے آں بلے وھدے کہ من اے آزمانک پہ شنگ ءَ راہ دات تاں لھتیں روچ ءَ پد منی ای میل ءَ پسّوے اتکگ اَت ءُ آ بلوچستان ٹائمز ءِ نیمگ ءَ چہ سرشونکار ءَ راہ داتگ بزانکہ ساجد ھُسین تو راہ داتگ ات کہ آ اے پیم نبشتہ اَت
“تئی توک ءَ آزمانک نویسی ءِ بُود ھست، اے روان داتگیں آزمانک تکنیکی رد ءَ کمے نزور اِنت، اکس کشی، نداراگ سازی، کارست، چیدگی ھُنر، اسلوب ءُ پلاٹ ءُ لھیتں دگہ لبزانکی گالبند نبشتہ ات کہ ایشانی سر ءَ کار بکن ءُ دیمتر ءَ جُوانیں آزمانک نویسے جُوڑ بیت کن ئے”۔
چہ ھما آزمانک ءَ رند ھما اِنت کہ من آزمانک نویسی ءُ درانگازی ءِ بُنکی ھنر ءَ دربرگ ءِ جُھد ءَ آں کہ کد بیت من بلوچستان ٹائمز ءَ پہ شھکارایں ءُ بے دروریں آزمانکے نبشتہ کت بکناں، چوشکہ ساجد ھسین تئی کسھی ساچشت اَنت بلے نی کہ کساس ماھے بیت، نا زاناں اے منی بدبھتی انت، بلوچستان ءِ تاکاری.ءِ بدنسیبی انت یا بزّگیں ءُ گاریں بلوچانی کَسمت انت بلوچستان ٹائمز ءِ تاک ءَ یک ھبرے شِنگ بیتگ کہ سرشونکار ساجد ھسین بزانکہ تو چہ سوئیڈن ءُ 2 مولمان (مارچ) ئیگ انت بیگواہ ئے ءُ تنیگت ءَ تئی بابت ءَ ھچ وڑیں ھال اوں نیست۔ بے بلا چو مہ بات۔
ساجد ھُسین اے ھبر راستے، تو اسلی ءَ گارئے، یا پہ وھدے ءَ وتی گیگ ءُ گیوار بوگ ءَ جاھے شُتگ ئے ءُ وت ءَ سلف آسولیشن کتگ، چوناھا جھانی وائرس ءَ انچیں چاگردے پیداک کتگ، ھُدا بکن تو گار مہ بہ ئے۔ وت.ءَ اداروکے ءَ پہ گِستا بکن ئے۔
ساجد ھُسین من نی یک دراجیں وسوسے ءَ مانگش ایتگ آں کہ من وھدے یک آزمانکے نبیس آں گڑا آ کے بیت من ءَ بُگُش ایت،
“اے آزمانک ءَ آزمانک نویسی ءِ کُلیں ھک ادا کتگ انت۔”؟
تو وَ بیگواہ ئے۔ ماھے ءَ چہ ترا برز اِنت، انگت ءَ تئی ترک ءُ توارے ھم نیست۔بلے زان ئے ساجد ھُسین من ءَ اُمیت انت تاں من آزمانکے نبیس آں ءُ روان دیاں، تو بندی جاھاں چہ آزات بہ ئے ءُ من ءَ گُش ئے گِیش نبشتہ بکن ءُ من پہ اے ھبر ءَ پھر بنداں گُشاں کہ ساجد تو بلوچی آزمانک نویسی ءِ پڑ ءَ یک مزنیں ءُ درپشناکیں نامے ئے، ساجد پہ تو بازیں کارے پشت کپتگ کہ ترا کنگی انت۔ تو کا ئے ءُ تاکاری ءِ پڑ ءَ وتی گیشیں تجربگاں چہ بلوچاں آشنا کن ئے۔ ساجد تئی پہ ساھتے ءَ بے توار بوگ سجھئیں بلوچی لبزانک ءُ تاکاری ءَ پہ توانے زانگ بیت۔ نی بیا کہ ترا وھدے بیت گار ئے۔۔۔
منی آزمانک سرجم انت بلے مھتل انت تو کہ کا ئے من ترا روان ئِے دے آں ۔۔
تئی کستر عزیز بلوچ
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
