ساجد کَلم وارسے
نبشتکار: شلی بلوچ
دی بلوچستان پوسٹ
زی دل ءَ گُشت کہ یوٹیوب ءَ بِہ چار ، چاراں چاران ءَ منی سر ریڈیو بلوچستان ءَ کپت کہ آئی ءِ کارمستر ھنیپ شریپ اِنت ، ریڈیو بلوچستان ءِ یوٹیوب تاک ءِ تہ ءَ من ءَ ساجد ھسین ءِ یک نبشتانکے دیم ءَ اتک کہ آئی ءَ سَمی بلوچ وانگ ءَ اَت ، نبشتانک ءِ کسّہ وَ دِراج ءُ مزن اَت بلے منی زھن ءَ ھمے ھبر اَتک کہ ساجد وَ یک ندکارے ءُ اِھوالکارے ، ندکار پرچی ءَ بیگواہ اِنت ؟ یا بیگواہ کنگ بَنت؟
ساجد ءِ اے نبشتانک ءِ سرھال اَت ” درانڈیھی پہ سرے ءُ شگان پہ سرے” ءُ دومی من ھما انت اے جیڑگ ءَ آں کہ ساجد پرچی ءَ درانڈیھ بوت؟ وتی ملک وتی میتگ وتی ھنکین وتی مردم ءُ بلوچستان ءِ زید ءُ موسماں چہ پرچی ءَ چو دور شُت ، مسکت ءُ دبئی ءَ سَر جنان ءَ پرچا وتی سَر ئِے سویڈن ءَ کشّ اِت ءُ وتءَ بیگواہ ئِے کنائینت۔؟
ھمے جیڑگانی تہ ءَ اِتاں کہ بلوچستان چو تامرے ءَ بوت منی چمانی تہ ءَ اکس پیشداران ات۔ انسانی ھکانی لگتمالی، آوار جَنی، لوگانی سُوچگ، مردمانی در پہ دری ءُ اشاں ابید نشہ ، نشہ ءِ بیپاری، دُرستیں اکس چو کسھانی پیم ءَ منی چمانی دیم ءَ آیان اِت انت ،اے ھیال ءِ تہ ءَ من ءَ ھمے ھیال اتک کہ اگاں کسے پہ اے جاورانی سر ءَ نبشتہ کنگ ءَ بہ نند ایت تاں آ چے نبشتہ کنت ؟
انچوش کہ میکسیم گورکی ءِ “مات” ، فینن ءِ “افتادگانِ خاک” ، گارشیا ءِ “تنہائی کے سو سال” ، ایما گولڈمان ءِ “سُرخرو” ءُ دگہ ، زاھر انت کہ انچیں کسہ ءُ داستان نویس ایت کہ اے دُراہ انچیں جاورانی برورد انت۔
بلے بژن مئے گورا باریں چی ءَ ندکار وتی نَدانی کدر ءَ نہ زان اَنت ، پرچی ءَ پہ نویسگ ءَ چکّ ءُ پَد بنت ، پرچی ءَ اے جاوراں وتی کسّھانی تہ ءَ نہ کماینت؟ ھمے جیڑگانی تہ ءَ ناگتی گُش ئے من ءَ ترندیں شھماتے ءَ لگّ اِت ، من وتی دیم تَرّینت تاں جون اَنت کَپتگ اَنت ، تیر سُپتگیں جون اَنت ، ژانگول انت پجارگ اِش ھم گران اِنت، الیاس نزر،کمبر چاکر، سدیک ائیدو، نسیر کمالان، اھمد داد، رزاک گُل، ھاجی رزاک، جاوید نسیر، ھمید شاھین، سبا دشتیاری ءُ دگہ باز انت کہ جنَگ بوتگ اَنت ، بیگواہ کَنگ بوتگ اَنت ءُ کُشتگ ءُ ویرانگاں چَگل داتگ اَنت۔
من پد ءَ جیڑ اِت کہ ایشانی میار چے بوتگ کہ چو بے دردی ءَ کُشگ بوتگ انت ؟ اِیشاں ھمے جاور کہ بلوچستان ءَ اَنت ھمے جاورانی اکس بندی کُتگ ،ھمے کپتگیں جون ءُ ستکگیں گس وتی کسھانی تہ ءَ آؤرتگ اَنت ءُ روتاک ءُ ماھتاکاں شِنگ کتگ اَنت، ایِشاں ھمے پیمیں ژانگولیں جونانی سر ءَ کسہ آؤرتگ کہ راستیں کسّہ بوتگ اَنت، زاھر انت راستیں کسّہ کار ئے ، راستیں جاوراں پدّر کن ئے گُڑا مِرگ وَ لوٹ اِیت ءُ چوناھا باز بَر ءَ راستی ءِ پدّر کنگ ءِ ھاتر ءَ مِرگ الّمی اِنت، چوشکہ سُکرات ءَ زھر ءِ پیالگ ءَ وارت، منسور ھلاج ءِ پاھو ءَ چُک ایت ءُ گورءَ کنت، چوشکہ بھگت سنگھ وتی مرگ ءَ چہ پیش مَرگ ءَ توار جَنت۔ بلے لھتیں گنوک ءُ شیدا انت کہ آیاں گوں ند ءَ مھر اِنت ، کتاباں گوں مھر اِنت آ گیش سرپد بوگ لوٹ انت، گیش زانگ لوٹ انت ، بلے پَد نہ کِنز اَنت بسّ نویس اَنت ءُ نویس اَنت کسّہ کار اَنت ءُ راستی ءَ دیم ءَ کار اَنت ، دنیا ءُ جھان ءَ پیشدار اَنت کہ ما کلم وارس اِیں ما زمین زادگ ایں۔۔۔۔۔۔
ساجد ءَ ھم انچو جیڑ اِتگ ات ءُ سَر گِپتگ اَت ، ھر ھما جاہ ءَ کہ من ءَ پاد بر اَنت ، وتی چاریں کتاب، لیپ ٹاپ ءُ لھتے کلم ءُ کلنڈیں موبائل ئِے زُرتگ ءُ سَر گِپتگ ات، ھمے کشک ءَ روان روان ءَ تاں یورپ ءَ سر بوت بلے نہ زانتگ ات ئِے کہ مارا چو کُردانی وڑ ءَ دنیا ءَ دوست نیست، ھما ساجد انت کہ چہ دو مارچ ءَ گار ءُ بیگواہ اِنت تنیگت کسّے نہ زانت کہ کجا اِنت؟ بلے اینچو ھرکس زانت کہ ساجد وتی نبشتگیں کسّھانی واستا بیگواہ کَنگ بوتگ ، چی ءَ کہ ساجد کلم وارسے، زمین زادگے اشی ءَ دگہ کَے بُرت کنت۔؟
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
