بلوچستان نا ضلع پنجگور ٹی نادرست سلاء بند بندغ تا جلہو ٹی مُسہ بندغ کسکر، جلہو کروکاک اسہ بندغس دزگیر کریسہ تینتون دریر۔ جلہو نا ذمہ واری ءِ بلوچ سلاء بند گَل ”براس“ ارفے۔
حوال آتا رِد اٹ پنجگور نا تحصیل گوارگو ٹی استو دو بجہ نا وختا خلق جمعدار احمد ہیتک ٹی درزن ئسے آن زیات سلاء بند بندغاک نغمان پنی بندغ نا اُراغا جلہو کریر، جلہو نا وختا کوٹی اسیٹی رحمدل پنی ءِ خلیل احمد، محمد صادق، نسیم، یاسر و ایلو بندغاک ساڑی ئسر۔
علاقائی حوالکار آتا پاننگے سلاء بند بندغاک بھلو کچ اسیٹی چُنکو بھلو سلاء کاریم ئٹی ایسر ہراڑان یار محمد نا مار رحمدل پنی ءِ خلیل احمد، آدم نا مار محمد صادق، فقیر نا مار نسیم جاگہ غا کسکر، و فقیر محمد نامار یاسر ءِ سلاء بند بندغاک دزگیر کریسہ تینتون دریر۔
لیویز نا پاننگے بھاز آ فیرنگ، راکٹ و ایلو خاخری سلاء تا کاریم اٹ ہتنگان اُرا خاخر ہلکونے ہراڑان اُرا ءِ بھاز نسخان رسینگانے۔
جلہو نا ذمہ واری ءِ چار بلوچ آزاتی خواہوک آ سیوتی گَل بلوچ راجی آجوئی سنگر (براس) نا حوالکار بلوچ خان منیسہ پارینے براس نا سرمچاراک پنجگور نا علاقہ گوارگو نا خڑک ”ہیتک ڈن ءِ سر“ ئٹ اندر ءُ حوال اس رسینگ نا رِد ئٹ ریاست نا ٹہیفوک ڈیتھ اسکواڈ نا وتاخ آ چھاپہ اس خلیسہ اوفتا کارندہ غاتے خلکر۔
بلوچ خان مُستی پارے کہ جلہوٹی فوج نا جوڑ کروک ڈیتھ اسکواڈ نا کسر شونی کروک یار محمد نا مار رحمدل پنی ءِ خلیل احمد، آدم نا مار محمد صادق، فقیر نا مار نسیم جاگہ غا خلنگار و منہ وخت مُست سلاء بٹوکا فقیر محمد نا مار یاسر ءِ سرمچاراک دزگیر کرینو۔ آپریشن ئٹ براس نا سرمچاراک ڈیتھ اسکواڈ کارندہ غاتا سلاء تے ہم دوئی کریر و اوفتا گاڑی ءِ تباہ کننگا۔
حوالکار پارے دا جُلہو براس نا برجاء غا آپریشن ”آسریچ“ نا بشخ ئسے ہرانا مسخت آتیٹ پاکستانی فوج و ایجنسی تا ہڈ تروک گندہ کار آ بندغ تون ٹہیفوک ڈیتھ اسکواڈ گَل تیا جُلہو کریسہ اوفتے ایسر کننگے۔ و نن بلوچ ورناتیان خواست کینہ او پاکستانی فوج و ایلو ادارہ تا بَچ آتیٹ بریسہ اوفتا کمکار یا بشخ مفس و تینا گواچن آ دژمن ءِ سرپد مریر۔
بلوچ خان نا پننگے ڈیتھ اسکواڈ نا کارندہ غاک تینا رکنگ کن زالبول و اُراتے مُونا ایترہ ہراڑان اوفتا لغوری پاش مریک۔ پاکستانی فوج نا پاننگا بلوچ مخلوق ءِ خَلوک آ بندغاک ہچ ءُ وڑاسیٹ بلوچ پاننگ مفسہ انتیکہ اندا بندغاک پاکستانی فوج تون اوار مریسہ زالبول تے بے گواہ کننگ، اُراتے ہُشنگ تون اوار ہر وڑ اٹ بلوچ کش کاریم تیٹ اوار ءُ۔
براس حوالکار نا پننگے پاکستانی فوج یا اوڑتون ہڷ و تس کروک بندغاک ہچ ءُ وڑ اسیٹ بشخنگپسہ انتیکہ دافتے مالو ہم پاننگانے کہ اوفک بلوچ تحریک نا مونا ہڑانگ شاغپس ولے اوفک تینے پد بٹتور، پنجگور جُلہو دُن انگا بندغ آتیکن اسہ کُلہو ئسے کہ بلوچ سرمچار ہر جاغہ اوفتیا جلہو کننگ کیک اندن نن سرمچارک زوت تیوی بلوچستان ئٹ آپریشن آسریچ ءِ پین شابیتی تریسہ قومی غدار تیا ترندو جُلہو کرون۔
