مردم چوں زندگ بیت؟ – لاشاری بلوچ

68

مردم چوں زندگ بیت؟

لاشاری بلوچ

دی بلوچستان پوسٹ

مردم چوں زندگ بوت کنت ؟
ھما مردم کہ وت زندگ بوگ ءِ جھد ءَ بہ کنت ءُ زندگ بوگ ءَ بزانت کہ من من کے آں ءُ من ءَ چے کنگی اِنت، منی پرز چے اِنت؟

اگاں یک مردمے وت ءَ زندگ بوگ ءِ جھد ءَ مہ کنت گُڑا آ ھچ رنگ ءَ دنیا ءِ تہ ءَ زندگ بوت نہ بیت.
زندگ ھما مردم بوت کنت کہ یک پگرے دار اِیت ءُ وتی زند ءَ پہ راج ءَ نمیران کنت،انچُش کہ ما گند ایں کہ واجہ سید زھور شاہ ھاشمی اِنت کہ پہ راج ءَ چنچو جھد کُتگ ءُ راجدپتر ءِ تہ ءَ زندگ اِنت، پرچا کہ زندگ بوگ ءِ واستا بازیں جھدے ءُ یک پگر لوٹ اِیت ۔۔
ھُشکیں زندگی زندگی یے بوت نہ کنت، مردم کہ پہ وتی راج ءَ کُربان بیت گڑا ھما کربانی مردم ءَ را ابد مان کنت.

ھما مردم کہ وتی جند ءَ گوں راج ءَ بھا کنت گڑا راجدپتر آئی ءَ ھجبر پھل نہ کنت، پرچا کہ سلیں مردم مُدام راج ءِ دیم ءَ ھراب گُشگ بنت، پرچاکہ آ وتی راج ءَ، زبان ءَ ءُ وتی برات ءُ گْوھاراں درامدانی دست ءَ بھا کنت، گلزمین ءُ راج ءَ گوں دگا کنت، پمیشکا آ گداری ءِ نام ءَ زانگ بیت ءُ مردم آئی ءَ لانت ءِ نام ءَ توار پر جن اَنت.

ھما مردم کہ نمیران بنت گڑا آواناں راجدوست گْوشگ بنت کہ آ مدام راج ءِ وشھالی ءِ واستا جھد کن اَنت ءُ وتی نگریں ھوناں گلزمین ءِ دلبد ءَ ریچ اَنت، پرچاکہ آواناں چہ وتی جند ءَ گیش راج ءُ زمین دوست بنت، وتی درستیں واھشتاں پہ راج ءُ زمین ءَ ندر کن اَنت، پمیشکا آ مدام زندگ بنت.

آ چو گدارانی وڑ ءَ وتی ننگ ءُ لجاں درامدانی دست ءَ نیلام نہ کن اَنت بلکیں وتی سراں پہ وتی لج ءُ ننگاں ندر کن اَنت، گڑا ھمے وڑیں مردم نمیران بنت.

نیم راہ ءِ دروہ اِتگیں مردم کدی راج دوست ءُ نمیران بوت نہ کنت پرچاکہ آئی ءَ وتی زند چہ راج ءُ گلزمین ءَ گیش دوست بیت ، پمیشکا آ مدام زندگ بوگ ءِ واھشت ءَ نہ دار اِیت ءُ بس چار روچ ءِ زندگ بوگ ءِ جھد ءَ کنت.

بلوچ راج زندگ بات


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔