شکار مُرگانی ءُ مَرگ منی
نبشتہ : رامین گَرداکی
دی بلوچستان پوسٹ
مئے ھند ءُ دمگ پہ شکار جاھے ءَ سک نامدار اَنت ، اگان سیل سوادے ءَ یکے ءِ سر بہ کپ ایت داں الم پنچ شش شکاری گند ایت کہ ویل اَنت ، بزگیں کپوت ءُ شانتلاں جاہ دیار نیست کہ کجا دمے سارت بہ کن انت کہ ھمے چرّئی والا مارا مہ گند انت ۔
یک وھدے دُروچک ءِ کہ کیت ھمے وڑ انت گیشتر سر زھر اَنت کہ مئے ڈگارانی دانّ اِش چٹ کتگ ءُ ایشانی دوا جنگ اِنت ، ھو بہ جن اِش بیوساں۔
پد ءَ دگہ لھتیں شکاری ھست کہ گش انت ما کرگوشک جن ایں مدام ویل اَنت جنگل ، کوہ ، گیاباناں ، داں ھال ھال یک دو کرگوشگ اِش بچار جتگ ۔۔۔
نوں کسہ اتکگ چُش اِنت کہ شکاری وَ شکار ءَ روگ ءَ اَنت، بلے گیشتر چہ مُرگ ءُ کرگوشگ ءَ مرچاں مئے جنگول (سرمچار) شکار بوگ اَنت بزاں جنگ بوگ ءَ اَنت ، بنداتی وھد ءَ جنگولاں کوھی دمگاں شکار بندش جتگ اَت گیشتر (سیپ تر ) درپ تر ات اَنت، امبری کہ جنگولاں پہ شکار ءَ کس ءَ مہ کن نہ کت مئے چنچو جنگول ھمے وجہ ءَ چہ جنگ بیتگ، اے شکاری نہ انت مرچاں کہ مدام ویل اَنت ، بزگیں شکاری داں مچکدگ ءُ جنگل ءَ نہ گوز انت بلے واجھانی راہ داتگیں شکاریاں گندئے ھمک روچ ھمک وھد ءَ ماں کوہ ءُ گَرّاں برے پہ یک نیمونے ءَ ویل اَنت،مستریں منّانک بلیدہ ءِ اجمل سلوئی انت، مدام پکنک ءُ شکار ءَ ویل اِنت، وارت شراب کہ من شکاری یے آں بلے چونائی ءَ اسل کار ئِے دگرے ، آیا یک مردمے ھمک ساھت شراب ءُ نشہ پد ءَ شپ داں روچ کوہ جنگلاں ویل اِنت، اے زرّاں ءُ ھرچاں کے دیگ ءَ انت ؟ دومی مستریں منّانک واجہ اجمل وتی انسٹاگرام ءَ داتگ ما زامران ءَ زونڈ ءِ چنگ ءَ شُتگ ایں، دنیا ءِ زونڈانی اکس ئِے انسٹی اسٹوری ءَ شنگ ئِے کتگ ءُ پد ءَ دومی نیمگ ءَ ریاستی دلار کہ بلیدہ ءِ نامی ئیں دلار اِنت ءُ مرچی باندا کیچ ءَ جاہ مِنند انت اسگر بلیدھی آ ھم ھمے زونڈانی اکساں وتی اسٹوری ءَ دنت ءُ نبشتہ کنت کہ ،،،منتوار ،، بزاں کہ تو مارا زونڈ وارینت.
ھما اکس ھما چادر ھما ، اے سر زاھریں گپے کہ اجمل ءَ گوں اسگر ءَ سکیں نزیکی داں کجام ھَد اِنت ءُ ھمک ساھت اجمل شرابی کہ کیچ ءَ روت الم ریاستی دلار اسگر ءِ کر ءَ سرے جنت ءُ اجمل ءِ گاڑی ءَ مدام اسگر کارمرز کنت، وت کہ جاھے درکیت داں کس من ءَ زرّےِ دات مہ کنت ، چہ اے گپ ءَ زانگ بیت کہ لھتیں شکاری پہ مُرگ شکار ءَ نہ روت بلکیں آیانی شکار مئے مَرگ اِنت ۔
ایشاں ھچ شکار ءِ شوک یا واھگ کرگوشک ءِ نہ انت، ایشاں جنگولانی جنائینگ ءِ ٹاسک گون اِنت ،ھمے ریاستی شکاریانی وجہ ءَ مئے چنچو جنگول جنائینگ ءُ شھید کنائینگ بیتگ،کمو وھد ءَ ساری کوچگ ءَ شھید نئیم انچیں ریاستی شکاری ءَ جنائینت ءُ شھید کت ۔۔
چہ ما ابید ما شما دنیا ءِ بازیں جنگانی تہ ءَ چمشانکے بہ دے ایں چوشیں ریاستی شکاریاں بازیں تاوان بھرے داتگ ، یمن ءِ جنگ ءِ گْوست ءَ بچار ایں یمن ءِ تہ ءَ یک شپانکے ءَ ھلیجی پوج ءِ یک بلاھیں کیمپےِ تباہ کنائینت کہ اے ارش ءَ سے سد مردم جنگ بوت ،مرچی مئے ھم ھال اتکگ انچو سر بوگ ءَ انت، مارا اے گِر ءُ دار کنگی اَنت داں مستریں تاوانے ءَ چہ بہ بچ اِیں۔۔
آ کس کہ بلوچ جنگولانی تاوان ءَ وش نہ بیت آ وت پہ شکار ءِ نیمون ءَ بھ اے کوہ ءُ کیلگاں نہ روت، اگاں بروت ھمے میتگانی کَشّ ءُ کِراں یا وتی نزیکیں جاہ ءُ دیاراں روت.
کُل شکاریاں گوں دسبندی اِنت کہ بلیدہ زامُران ءِ کوھی دمگاں مہ رو اَنت اگاں کسّے ءَ شکار ءِ واھگ اِنت آ مچکدگ ءُ کوچگی دمگاں وتی شوک ءَ پورا بہ کنت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
