من انگت ودارِیگ آں
نبشتہ کار: لیاقت بلوچ
دی بلوچستان پوسٹ
زندگی ھُشکیں درچکے گوں وتی مُرتگیں واھشت۔۔۔۔۔۔۔۔۔بُرّ ءُ گوازان اِنت ۔ ھمے درچک ءِ پن کہ سبز بوتگاں نوں ھُشک اَنت ، وھدے گْوات کشّ اِیت گوں گْوات ءِ ھمراھی ءَ زیمر جن اَنت ءُ چہ منی جبین ءَ سِد اَنت ءُ دُور ماں دِگہ جھانے ءَ رَو اَنت،گْوش ئے منی ھُشک ءُ بے چاڑیں بالاد ءَ را ھچ واھگ ءُ تماہ نیست بس یک اجب رنگیں آس ءُ انگرّے اندر ءَ ھست ءُ من ءَ بُن دیان اِنت، ھمے آس ،ھمے درچک ءِ سبزگی دْرست توئے۔۔۔۔۔۔۔۔۔۔۔۔۔!!
اگاں تو بال کن ئے۔۔۔۔۔۔۔۔۔۔۔؟
گُڑا منی بے ھاٹیگیں بالاد ءَ تئی داتگیں نِشانی گوں گْوات ءِ زیمر ءَ ساز بنت ءُ زندگی زمین ءِ مھلبیں ھاکانی باھوٹ بیت۔
کُجا کہ چم کپ اَنت گُڑا ھمے گُمان بیت کہ منی ھچ ھستمانی (وجودے) یے ھم نہ بوتگ،پمیشکا من نوں وتی بُت ءُ بالاد ءِ اندر ءَ ھِچّے نہ آں ءُ منی اندر ءَ دْرست تو بوتگ ئے اگاں تو در کپ ئے گڑا من یک آسے ءَ بُن گِران ءُ پہ دائِمی ھلاس بَہ آں ءُ چہ وتی ھلاسی ءَ رند من جیڑ آں ءُ ھیالانی بے گْوازیں زِر ءَ اُوژناگ کن آں داں ھمے گِند آں زِندگی ءِ بھاریں نوبتانی واب پہ بے مانائی پْرشتگ ءُ من چہ وت ءَ درآمد درچک ءِ ساھِگ ءَ نشتگ آں کہ اناگاہ ءَ یک مُرگے چِر چِرک کنان ءَ درچک ءِ ٹُلّ سر ءَ نِشت ءُ بے توار بوت،من دِل ءَ ھمے مار اِت کہ درچک گُنگ اَنت ءُ گَپ جت کُرت نہ کن اَنت ،پمیشکا چو بنی آدم ءَ دور یک ھُشکیں درچکے ءِ سر ءَ نِشتگ ءُ وتی دُگنیا ءَ باریں چے جیڑ اِیت ءَ زوت بال کنت ، دِگہ ھم باز مُرگ کیت ءُ روت بلے! من ھمے گرم ءِ ٹاک ءُ نیمروچاں تئی ودار ءَ ھمے درچک ءِ ساھگ ءَ اتکگ ءُ نِشتگ آں۔ باریں تو کدی کائے۔۔۔۔۔۔۔۔۔۔۔؟؟
ھمے درچک وتی زردیں تاکاں ریچ اِیت ءُ نوک سبزکیں تاک جنت ءُ گوں ابَرم ءِ رنگاں لیب کنت بلے! تئی داتگیں یات ھما اَنت ءُ ھچبر نہ مٹّ اَنت باریں چینچو سال پِر گْوستگ ءُ چنچو موسم مٹّ بوتگ بلے من انگت ودارِیگ آں کہ تو کد ھمے بے تاکیں درچک ءِ ساھِگ ءَ کا ئے؟
چی ءَ کہ اے بے تاکیں درچک منی ءُ تئی ھما ھیالانی دُگنیا ءِ یک بھرے کہ من ءُ تو ھوری ءَ گْوازینت پمیشکا من ھرچی بِہ لوٹ آں بلے آ زپت ءُ شھدیں زھیر ءُ تْرانگ کدی شموشگ نہ بَہ اَنت۔
مرچاں تو باریں گوں کئی ھیالاں ھمگْرنچ ءُ دگنیا ءِ کُجام کورچاتیں کُنڈ ءَ کپتگ ءُ گوں ھیالاں سر ءُ چیر ئے ؟
من زان آں تو بے ھیال ئے کہ ھما بے تاکیں درچک ءِ بُن ءَ تئی ودار ءَ یکّے نِشتگ ءُ وتی دِل ءَ سھڑینگ ءَ اِنت۔۔۔۔۔۔۔۔۔۔۔کہ تو کائے۔۔۔۔۔۔۔۔۔۔۔
بلے! یک کرنے گْوستگ کہ گوں تئی یاتاں زِند گْوازینگ ءَ آں ، بِہ گِندئے روچے نہ روچے منی ھیال ءَ بِہ کپ ئے ءُ سر جنان ءَ ھمے ھُشکیں درچک ءِ ساھگ ءَ وت ءَ سر بِہ کن ئے کہ من ءُ تو ھمُک بیگاہ نشِتگ ءُ دیوان کُتگ۔
من انگت تئی ودارِیگ آں ءُ بیا ھما ھلک ءُ میتگ۔۔۔۔۔۔۔۔۔۔، درچک ءُ دار۔۔۔۔۔۔۔۔۔۔۔۔۔۔۔۔کُل تئی زھیراں گوں مونجا اَنت۔۔۔۔۔۔۔۔۔۔۔۔۔۔، دْرستانی چم ارسیگ اَنت۔۔۔۔۔۔۔۔۔۔۔۔۔۔۔۔۔۔، ھمے میزریں درچک اُوں اچ تو پد ھُشک اَنت،چہ ترا پد تو بِہ گِندئے سرپد مہ بَہ ئے۔۔۔۔۔۔۔۔۔۔۔۔۔چنچو زِمستان ءُ تیر ماہ گْوستگ،بلے من روچ۔۔۔۔۔۔۔، ساھت ءُ دمانانی ھِساب گْور اِنت کہ بے ترا گْوازینتگ آں ءُ من ھمے گْوستگیں روچاں چہ بِگر دانکہ روچ ء مروچی تئی ھیالاں گوں جیڑ آں،چہ چمّانی بازیں گریوگاں ارسانی کانیگ ھُش اِتگ۔۔۔۔۔۔۔۔۔۔۔ ،منی جبین ءَ تئی دُوری ءِ آس ھر ساھت ءُ دمان جمبول اِنت کہ اِیر ماد بُوَگ ءِ نام ءَ نہ زانت،پمیشکا من ھاوند ءِ در ءَ کہ دست پہ دُوا ءَ چِست کُتگ اَنت گُڑا نام تئی زُوان ءَ وِرد بوتگ کہ ھدا منی وابانی بانور۔۔۔۔۔۔۔۔۔۔۔۔۔۔۔منی زِند ءِ ھمسپر چہ من ءَ دیر اِنت کہ جتا ءُ گِستا اِنت نہ زان آں کد واتر کنت کہ من انگت ودارِیگ آں؟
اگاں اے زِند ءَ بے وپائی کُت گُڑا نہ زان آں۔۔۔۔۔۔۔۔۔۔۔۔۔۔۔۔۔۔۔۔۔
پمیشکا یکرندے پد ءَ ترا پہ مھر گْوش آں بیا بیاکہ نوں موسماں وتی رنگ مٹّاتگ۔۔۔۔۔۔۔۔۔۔۔۔۔۔۔، کَورانی سارتیں آپ شھد ءُ بینگّ اَنت۔۔۔۔۔۔۔۔۔۔۔۔۔، مُرگانی زیمریں چِڑکّہ من ءَ تئی ھیالاں گیج اَنت گُڑا من دِگہ دُگنیایے ءَ روان ءُ وت ءَ چہ شموشکار بَہ آں بلے تو کدی شموشگ نہ بَہ ئے، پمیشکا گْوش آں۔۔۔۔۔۔۔۔۔۔۔!! بس یکرندے واترّ کہ منی ھمراھی ءَ ھما میتگ۔۔۔۔۔۔۔۔۔، ھُشکیں درچک۔۔۔۔۔۔۔۔۔۔۔کُل دشت ءُ گِریشگ انگت تئی ودارِیگ اَنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
