شی شلو
نبشتہ کار: لال اؔبدال
دی بلوچستان پوسٹ
ھستیں اھد ءِ گیدی ءِ ھمک کنڈ ءُ دمگ ءَ ھمک دروشمے لیب ءُ گوازی گندگ ءَ کیت ءُ ھمک راج ءِ وتی لیب ءُ گوازی بنت کہ چہ ایدگہ راجانی لیباں دگری ءُ تپاوت اش ھست انت،ھمک راج ءِ لیب ءُ گوازی کہ ھست انت، آ لیب آ راج ءِ دود ءُ ربیدگانی یک ٹوھیں بھرے زانگ بہ اَنت.
ھمے پیم ءَ بلوچ راج ءِ تہ ءَ باز دروشم ءِ بے مٹیں لیب ھست انت، ھنچوکہ بلوچ ءِ بازیں دود ءُ ربیدگے وھدے ارجان بیتگ ھمے پیم ءَ بلوچ ءِ لیب ھم گار ءُ گارات بیتگ انت، ھمے گاراتیں لیبانی تہ ءَ یک لیبے ھست انت کہ ”شی شلو“ ءِ نام ءَ زانگ بیت انت کہ اے شی شلو یک لیبے ءِ ھمراھی ءَ یک لوٹک ءُ دوایے ھم ھست کہ پہ ھور ءِ بوگ ءَ کنگ بیت،اے لیب ھما وھد ءَ کنگ بیت کہ ھور مہ بیت ءُ ڈکال بہ بیت۔
اے لیب چش بندات بیت انت۔
میتگ ءِ تیوگیں جنک ءُ بچک یکجاہ بنت ءُ پد ءَ ھمے جنک ءُ پچک آرت ءُ ناہ زور انت،پد ءَ ھمے آرت ءُ ناھاں ھور پُنڈین انت،ھمے آرت ءُ ناھاں یک پوپلیں ھنسگے ءِ پشتی نیمگ ءَ لِچّین انت،(پوپلیں ھنسگ ءَ ھمے ھاتر ءَ زور انت کہ ایدگہ رنگے ھنسگانی سر ءَ آرت نہ اوشت اِیت) وھدیکہ ھنسگ ءِ سر ءَ آرت ءُ ناہ لِچّارینگ بنت گڑا پد ءُ رنگ رنگیں چاہ واری کوپانی پرشتگیں ٹُکر ءُ شیشگ زور انت، ھمے ھنسگ ءِ سر ءِ ناھانی سر ءَ گوں ھمے شیشگاں یک سکیں برھداریں شی شلویے بزاں دُتّکے جوڑ کنگ بیت، اے شی شلو ءَ را والی ءُ چلمب،پاتین،گشان،مھرگ، زیور ءُ دگہ بازیں سھتے پِر کنگ بیت،اے شی شلو ءَ را ھنچو گوں براھداری ءَ سمبھینگ بیت کہ ھمک مردم پہ اے شی شلو ءِ چارگ ءَ تلوس ایت،وھدیکہ اے شی شلو تیار بیت گڑا ھمے شی شلو ءَ زور انت ءُ دراھیں جنک ءُ بچک میتگ ءِ سرجمیں لوگاں رو انت، وھدیکہ اے جنک ءُ بچک لوگے ءِ دپ ءَ رو انت گڑا ھمے جنک ءَ کہ شے شلو گون بیت گڑا اے لیب لچھے ءِ اولی بند ءَ گوں الھان کنان ءَ گش ایت ءُ پد ءَ ایدگہ بچک ءُ جنک ھمے لچہ ءَ را جوابی ءَ گوں الھان کنان بنت۔
لچہ چو اے دروشم ءَ انت
شی شلو شالی شلو
دابھاں تُنّ کُش اِیت
بندھاں گژن کُش اِیت
اللہ تو ھورے بدئے
کنڈُکاں پُر بہ کن
وھدیکہ لوگانی مردم اے لچہ ءِ توار ءَ اشکن انت گڑا ھمے زان انت کہ مروچی نوکیں شی شلویے سمبھینگ بوتگ ءُ پہ ھور ءَ دوا بوگ ءَ انت گڑا اے لوگانی مردم پہ شی شلو ءِ چارگ ءَ زر انت ءُ لوٹ انت کہ شی شلو ءَ بچار انت، دانکہ کسے مستاگی نہ دنت آئی ءَ را اے شی شلو ءَ پیش نہ دار انت،پہ مستاگی ءَ مردمانی چِہ کہ وس ءَ بہ بیت دینت، آرت،شکر،برنج،زر ءُ دگہ بازیں چیز ھست کہ پہ مستاگی ءَ دینت کہ دانکہ شی شلو ءَ بہ گند ایں، ھمے رنگ ءَ بچک ءُ جنک اے لچہ ءَ را الھان کنان ءَ گشان ءُ سرجمیں میتگ ءِ لوگاں گول انت ءُ مستاگی گر انت۔
وھدیکہ سرجمیں لوگ ھلاس بنت اے لیبی شی شلو ءَ زور انت ءُ رواں کورے ءِ تہ ءَ ریکے ءِ سر ءَ نند انت ءُ ھمے شی شلو ءَ ریکے تہ ءَ کل ءُ کسارت کن انت ءُ پہ شی شلو ءِ پرس ءِ دارگ ءَ واہ ءُ زاری بیت ، ھمے لیب لچہ ءَ را گش اَنت
شی شلو شالی شلو
دابھاں تُنّ کُش اِیت
بندھاں گژن کُش اِیت
اللہ تو ھورے بدئے
کنڈُکاں پُر بہ کن
اگاں ھمے لیب کنوکاں ھرچی کہ مستاگی دیگ بوتگ گڑا آ ھمے مستاگیاں بر انت ءُ سوداگرانی کر ءَ بھا کن انت ءُ پد ءَ اے پہ وت ءَ ورگ ءُ نوشگی سامان زور انت ءُ اے لیبی دراہ گوں ھوری ءَ نند انت ءُ ھمے ورگاں ور انت،چہ ھمدا لیب ھلاس بیت انت۔
اگاں کسے ءَ اے لیب ءِ بارو ءَ گیشیں سرپدی ھست گڑا آ وتی ند ءَ دوست مہ داریت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
