شھید منان جان ءِ کاروان
نبشتہ کار: نوھان نور بلوچ
دی بلوچستان پوسٹ
من ءَ اندازگ بیست روچ بیت کہ من جیڑگ ءَ آں کہ ڈاکٹر منان جان ءِ بابت ءَ دو گال نبشتہ بہ کناں بلے نہ زاناں پرچا گال ھمراہ داری کنگ ءَ نہ اَنت، یک برے من ند زُرت ءُ کاپی ءِ تاکانی سر ءَ ایر کت کہ چیزے نبشتہ کناں داں دہ دمان ءَ ند کاپی ءِ تاکانی سر ءَ ایر اَت کسم بات کہ یک گالردے( جملہ) نبشتہ کت بہ کنت، من ند ءَ را گوں کاپی ءَ ھوار چست کت ءُ پد ءَ کتابانی ھواری ءَ ایر کت، بلے پد ءَ دست اوں نہ جت، من بس جیڑاں بیت آں کہ چہ کجا ءُ چوں نبشتہ کنگ ءَبندات بہ کناں ءُ چے نبشتہ بہ کناں؟
پرچاکہ راجی بامردانی ءُ رھشونانی بابت نبشتہ کنگ انچو ارزان نہ اِنت کہ مردم یکدم دو گال نبشتہ بہ کنت، چوناھا منی جند ءَ را شھیدانی بابت ءَ نبشتہ کنگ ءِ ھچ بستارے نیست کہ من اے بامردانی بابت ءَ نبشتہ بہ کناں، پرچاکہ شھیدانی کرد چوناھا چو روچ ءِ روژنائی ءَ پدر اِنت ءُ دو دانک ءِ مھتاج نہ اَنت.
ھمیش اِنت مرچی بزاں 30 بھاران (جنوری) اِنت من پہ توکلے یکبرے پد ءَ چہ کتابانی سر ءَ ھما ایر کتگیں کاپی جھل ءَ ایر کت کہ مرچی مرگے زندے چیزے نبشتہ کناں اگاں اے دوئیں دانک چپ ءُ چوٹ بنت یا وانگ بنت یا نہ بنت بلے نبشتہ الّم کناں، بلے نوں ند کاپی ءِ تاکانی سر ءَ اِنت، ند گُشگ ءَ اِنت مرچی من تئی ھمراہ آں، تاک ھم وداریگ اِنت کدی من ڈولدار بہ آں، بلے منی دست بُنڈ اَنت ءُ نبشتہ کنگ ءَ ھمراھداری کنگ ءَ نہ اَنت ءُ ھیال سینزدہ سال پیسریگی یاتاں تئی ءَ جنزان اِنت کہ ما وتی دربرجاہ ءَ ھپتمی تبک ءَ وانگ ءَ ات ایں کہ مارا مئے راھدربر( ماسٹر) ءَ گُشت مرچی یک ڈاکٹرے مئے دربرجاہ ءَ پیداک اِنت ءُ شمارا چیزے سر ءُ سوج کنت دانکہ شما سرپد بہ بہ اِت ءُ وت ءَ چہ گند ءُ گسڑیں چیزاں بہ پھریز اِت.
ساھتے ءِ ودار کنگ ءَ پد مارا راھدربر ءَ گُشت بیا اِت مکتب ءِ دیم ءَ برانڈہ ءِ چیر ءَ کتار ءَ بہ نند اِنت، دربرجاہ ءِ کُل نودربر اتک اَنت ءُ کتار ءَ نشت اَنت باریں چونیں ڈاکٹرے کیت ءُ چے گُشگ لوٹ اِیت، ھمے وھد ءَ یک کسان بالادیں مردے چہ آپیس ءَ در اتک ءُ یک پادے ءَ لَنگ کنان اَت ءُ مئے دربرجاہ ءِ مزن راھدربر( ہیڈماسٹر) ءُ ایدگہ راھدربرانی ھواری ءَ اتک ءُ مئے دیم پہ دیم ءِ کُرشیانی سر ءَ نشت، مزن راھدربر ءَ کمو گپ کت گڑا پد ءَ ھمے کسان بالادیں بامرد پاد اتک ءُ گپ کنگ ءَ بندات کت” منی نام منان بلوچ اِنت ءُ من یک ڈاکٹرے آں،من مرچی شمے دربرجاہ ءَ اتکگ آں دانکہ شمارا چہ نادراھی ءَ رکینگ ءِ ھاتر ءَ سر ءُ سوج بہ دے آں، راج ءِ بزگی ءُ واری ھوار دگہ سک باز دانک ئِے ندر کت ءُ نیم ساھتے ءَ پد واتر شُت.
پیسر ءَ من ھمے ڈاکٹر کدی دیم پہ دیم ءَ نہ دیستگ اَت بلے وتی میتگ ءِ مردمانی دپ ءَ الّم ھمے گپ اشکتگ اَت کہ مئے نادراہ جاہ ءَ یک شریں ڈاکٹرے اتکگ نہ زَر ءِ تلب ءَ کنت ءُ نہ دگہ ناز ءُ نکراھے، سکیں مھروانیں انسانے، ھما اِنت اے ڈاکٹر اتکگ مارا چہ ڈنی درمانجاہ ( میڈیکل اسٹور) ءَ درمان ءِ گرگ نہ کپ اِیت، اللہ اے ڈاکٹر ءَ را مدام سوبمند کنات، مئے راج ءِ تہ ءَ اے وڑیں ڈاکٹر بوتیں گڑا ما انچو بزگ نہ بوتگ اِت ایں.
ڈاکٹر منان جان سکیں راجدوست ءُ دردماروکیں بلوچے اَت، یک ڈاکٹرے بوگ ءَ ابید یک راجی رھشونے اَت بزاں بلوچ راجی پارٹی بی این ایم ءِ بنجائی کارگشاد اَت ءُ مدام راج ءَ را راجی سنچ ءُ زانت دیگ ءَ اَت.
ڈاکٹر منان جان کدی اوشت ءِ آماچ نہ اَت، اگاں کجام ھند ءُ دمگ ءَ شُتگ اَت گڑا اَلّم ھما ھند ءَ راجی جنز ءِ دیمروئی ءِ ھاتر ءَ راجی جھدکار ئِے جوڑ کتگ اَت، ڈاکٹر ءِ ھمے کارانی گندگ ءَ ءُ راج ءِ تہ ءَ نامدار بوگ ءَ سرکار ءَ را دوست نہ بوت کہ ڈاکٹر بلوچ راج ءِ چیدگ جوڑ بہ بیت گڑا سرکار ءَ ڈاکٹر منان جان ءَ چہ راج ءَ دور کنگ ءِ ھاتر ءَ سک باز رند ءَ آئی ءِ سر ءَ اُرش کتگ بلے ڈاکٹر انگت چہ آئی ءِ اُرشاں رک اِتگ ، بلے کدی پُشت ءَ چک ءُ پد نہ بوتگ اَت، کدی ترس ءِ آماچ نہ اَت، پرچاکہ راجی جھدکار ءُ رھشون، سرڈگار ءِ آشک ءُ شیدا کدی چہ وتی مھر ءَ دور ءُ گستا بوت کت نہ کن اَنت ءُ مدام سرانی ندر کنگ ءَ جاڑی بنت.
سرکار ءِ اے زُلم زوراکیاں ڈاکٹر ءَ را پروش دات نہ کت ءُ سرڈگار ءِ شیدا انگت گوں دلیری ءَ راجی جھد ءِ دیم ءَ برگ ءَ شپ ءُ روچ جھد کنگ ءَ اَت ،ھمے وڑ ءَ راجکاری( سیاسی) کارانی دیم ءَ برگ ءِ ھاتر ءَ منان جان ماں مستونگ ءُ ھما ھند ءُ دمگاں در کپتگ اَت، ھمے کارانی میان ءَ شھید اشرپ بلوچ ءِ لوگ ءَ بزاں 30 بھاران 2016 ءَ گوں شھید اشرپ بلوچ، شھید نوروز بلوچ، شھید ساجد بلوچ ءُ شھید ھنیپ بلوچ ءِ ھواری ءَ پاکستانی لشکر ءِ دست ءَ شھید کنگ بیت.
نی من اے وڑ ءَ جیڑاں کہ
-:شھید ڈاکٹر منان جان ءِ شھید کنگ ءَ پد آیاں بی این ایم ھمائی ءِ کارانی دیم ءَ برگ ءِ ھاتر ءَ چنچو کتگ ءُ کنگ ءَ اِنت؟
-:شھید ءِ کاروان ءِ ھمراھاں چنچو وت ءَ مھکم کتگ ءُ کنگ ءَ اَنت؟
-: بی این ایم ءَ شھید منان جان ءُ ایدگہ شھیدانی لوٹ داں کجام ھند ءَ سر کنگ ءَ سوبمند بوتگ؟
-: بی این ایم ایوک ءَ ڈاکٹر منان بلوچ ءُ ایدگہ شھیدانی روچانی دارگ ءَ داں اوشت ءِ آماچ( محدود) اِنت یا شھیدانی پَشت کپتگیں کارانی سرجم کنگ ءَ سوبمند بوتگ؟
-: بی این ایم داں بیان دایگ ءُ چاگردی رسانکدار ءَ داں وت ءَ داشتگ یا وت ءَ را بلوچ چاگرد ءِ تہ ءَ گیش مھکم کتگ؟
-: آیاں بی این ایم گیش مھکم بوگ ءَ اِنت یا روچ پہ روچ نزوریانی آماچ بوان اِنت؟
-: بی این ایم ءَ بلوچی راجی جنز دنیا ءِ تہ ءَ کجام ھند ءَ سر کتگ ءُ کنگ ءَ اِنت؟
-: بی این ایم دنیا ءِ تہ ءَ کجام ھد ءَ سپارتکاری ءَ سوبمند بوتگ ءُ بوگ ءَ اِنت؟
-: بی این ایم ءَ وتی نزوریانی گرگ ءَ کجام ھد ءَ داں سوبمند بوتگ ءُ بوگ ءَ اِنت؟
-: بی این ایم ءَ ڈاکٹر منان جان ءِ شھید بوگ ءَ پد چنچو بنجائی دیوان( مرکزی مجلس) برجاہ داشت کتگ، اگاں نہ کتگ گڑا سوب چے اِنت؟
-: آیاں بی این ایم ڈاکٹر منان جان ءِ شھید بوگ ءَ پد اوشت ءِ آماچ اِنت کہ وتی دیواناں سال ءِ سر ءَ ھم کت نہ کنت؟
اے نزوری ھما وھد ءَ ھلاس بنت کہ بی این ایم ءِ رھشون ڈاکٹر منان جان ءِ سر ءُ سوجانی پاسداری ءَ بہ کن اَنت ءُ گیش ادارہ ءَ مھکم بہ کن اَنت.
ھمے وھد ءَ منی مات ءِ لھمیں گالوار منی گوشاں کپت اَنت کہ ابا منی تبیت وش وش نہ اِنت تو چہ ھمسایگانی لوگ ءَ دانگے پیناڈول گولی یے وڑ بہ کن کہ من ءَ تپ ءَ بیوار کتگ، ھمے وھد ءَ من وتی سما ءَ اتک آں داں ند ءَ سرجمیں کاپی ءِ تاک ءَ را لکیر ءَ پُر کتگ ،من ند ءُ کاپی ھما جاہ ءَ ایر کت آں ءُ پہ پیناڈول گولی ءِ ھاتر ءَ ھمسایگ ءِ لوگ ءَ راھادگ بوت آں.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
