بلوچانی کلات مان اَنت ؟
جورکان بلوچ
دی بلوچستان پوسٹ
بلوچ ھر نیمگ ءَ زُلم ءِ آماچ اِنت ، منی سر کپت بلیدہ ءِ یک میتگے ھست کہ نام اِنت ئِے ریکؔو اے ھمے جاہ اِنت کہ اد ءَ ھم یک کوھنیں کلاتے ھست ، ھست ناں بلکیں بوتگ کہ نام ئِے ، گوْڑ ءِ کلات ءَ زانگ بوتگ ۔
چو بیت کنت کہ ایشی ءِ بارو ءَ مھلوک شر سرپد بہ بنت ءُ بزانت یا مھلوک بروت بچار ایت ئِے مرچی باندا ایشی ءِ نام ءُ نشان نیست ۔
پرچا نام ءُ نشان ئِے نیست زاناں چون ئِے بوتگ شما ھمے جیڑگ ءَ اِت ؟
بلکیں شما اے بابت ءَ لھتیں مردم سھی ءُ سرپد اِت کہ ھمے واستا ایشی ءِ نام ءُ نشان نیست کہ کلات ءِ جند لس مھلوک ءَ کبزہ کتگ ننگار ھمے جاہ کرتگ اَنت تچک چو ڈگار ءَ ، جُست کنوک کس نیست زمین کبزہ کرتگ ءُ ھمد ءَ مچّ ءُ ڈگار کنگ ءَ اَنت ۔اپسوزی گپے کہ وتی تاریکی جاگھاں وت چُش بہ کنت یک کومے ۔ نابزانتی ءِ ھد انت کہ وتی جند ءَ وت گار کنگ ءَ ایں مارا بلے ھچ سما نیست ۔ اے گوڑ ءِ کلات ءِ کسہ ءَ من پٹ پول کنگ ءَ آں ءُ شریں وڑے ءَ نبشتہ ئِے کناں شما ئِے الم گند اِت، ھیر
ایشی ءِ بابت ءَ دو بتل ھست کہ مئے نیمگ ءَ سک نامدار انت ءُ کارمرز بنت ۔۔ بتل ۔۔
“چوکہ گوْڑ ءِ کلات ءَ بوتگ ھچ جاگہ مبات ”
نوں ھمے ما شما بزانت ایں کہ آیا چے بوتگ گوْڑ ءِ کلات ءَ، اے بتل یک بلاھیں مھنا ءُ مکسدے دار ایت ایشی ءِ پُشدر ءِ کسہ چے انت ،
چو بیت کنت کہ اے بابت ءَ مھلوک بزانت یا مردماں جُست بہ کن اَنت وتی تاریک ءَ کمو باز سرپد بہ بنت اد ءِ مردماں آ گوْڑ ءِ کلات ءِ جند تباہ کتگ ءُ گار کتگ ھما لمبک ئِے پشکپتگ ، ایشانی پھازگ مئے شمئے کار اِنت کہ اے مئے تاریک اَنت مئے پجار انت ۔
اے وَ بوت بلیدہ دگہ روچے منی سر کپت کیچ ءَ ، من شتاں کہ ڈنمب ءِ کلات ءَ چاراں ، انگت یکے ءَ من ءَ گُشت مرو کش ءُ کر ءِ مردم نیل اَنت چارگ ءَ بلے من زد کُت شتاں داں دیست شاھی تمپ ءِ ڈنمب ءِ کلات ھم ھمے وڑ بوان انت کہ گوڑ ءِ کلات بیتگ ، مھلوک زمین ءَ کبزہ کنان ءُ گِران ءَ ۔۔۔ چاریں نیمگ اِش گپتگ لوگ جاگہ مھلوک ءَ بستگ پشکپتگیں ھما جند انت ئِے ایشی ءِ واستا اگاں سُر پُرے مہ بیت ایشی ءِ ھال چش ھمایانی وڑ ءَ بیت کہ آسر ئِے گاری اِنت ۔۔۔ اے ھم چو گوڑ ءِ کلات ءَ گار ءُ بیگواہ بیت ۔۔
ھرچی کنگی انت مارا وت ءَ، سرکار پما ھچ نہ کنت پرچاکہ سرکار وت گوادر ءِ ریلوے ٹریک ءَ ماں سُتکگیں ڈور ءَ گوازینگ ءَ انت ۔ سُتکگیں ڈور بلوچ تھزیب ءِ مستریں بنیاد انت کہ دری مُلکانی پٹ ءُ پولکارانی رد ءَ ھور ءُ سُتکگیں ڈور نمرود ءِ بادشاھی شھر پناہ ءِ جاہ بیتگ کہ ھمد ءَ نمرود ءِ کلات بیتگ اَنت ، سُتکگیں ڈور ھمے جاہ کہ واجہ (حضرت) ابراھیم (علیہ سلام) ءَ آس ءَ دور دنت ، اے جاہ بلوچ ءِ تاریک ءُ تھزیب ءِ مستریں مانزمان اِنت ، اے کہ گار ءُ گور بہ بنت پہ بلوچ ءَ ھچ نہ مان ایت، دومی نیمگ ءَ پد ءَ چیزے وھد انت کہ میری کلات ءَ بزاں سسّی ءُ پنو ءِ اِشک ءِ نشانی کہ گُشگ بیت ءُ تنی وھدی ھست انت اد ءَ ھم لشکر ءِ مزنیں رو ءُ آھے بوگ ءَ اِنت باریں ایشی ءَ شرکنت ءُ سر ءَ ئِے نند ایت وتی سنگر جاہ ئِے کنت یا میری ءِ کلات ءِ باندات ھم چو اے دگہ کلاتانی پیم ءَ بیت
نوں ایشانی رکّینگ مئے ءُ شمئے کار اِنت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
