چاگردی رسانکدار ءِ براہ
نبشتہ کار :جابر مُراد
دی بلوچستان پوسٹ
ھست اَت یک وابیں چاگِردے ءِ تہ ءَ چندے نوجوان ءُ آھانی کار بس ھمیش اَت کہ کجا نا کجا مارا چاگردی رسانکدر (سوشل میڈیا) ءَ نوکین گپّے دیم ءَ بئیت ءُ ما ھما گپ ءِ سر ءَ مسکرا بہ کن ایں ءُ مئے وھد بہ گوز ایت، اے روچ بہ روت ءُ دومی روچ ءَ دگے نوکیں چیزے دیم ءَ بئیت، ھمے ھساب ءَ اشانی سپر برجاہ اَت ۔
مُدام اشانی جُھد بس ھمیش اَت کہ نوک ءَ چہ نوک تریں چیزے مئے دیم ءَ بئیت ءُ چہ نوکیں چیزانی دیم ءَ آیگ ءَ پیسر اشانی واھگ اِش اَت کہ آ جیڑہ بس اے مہ بیت کہ مارا آئی ءِ تہ ءَ شرّی کنگ ءُ دگر ءِ درد ورگ ءِ اژدری بہ بیت، دگہ جیڑہ تُری ھرچی بہ بیت بَس یکے دومی مردم ءِ ایر جنگ ، دگر ءَ زاہ ءُ بد کنگ یا دگر ءِ گھارانی ازّت ءِ پادمالی کنگ ، ھلانکہ آ مردم اے چیز ءِ ھم لوٹوک تانکہ مئے جند ءِ زات ءَ ابید دگہ ھرچی بیت بہ بیت بس نوکیں چیزے مئے دیم ءَ بئیت، جند ءِ زات ءَ بزاں من ءُ منی ھاندان ۔
اشانی زمہ واری بس ھمیش اَت کہ چاگردی رسانکدار ءَ نوکیں چیزانی درگجیگ ءُ آھانی سر ءَ شرپ ءِ ھند ءَ ابید دگہ ھرچیز گوں بے سمائی ءَ کنگ ،!
اے کار اشانی روزگار جوڑ بیتگ اَت بازیں مُدّتے ءَ رند یک روچے اشانی تہ ءَ یکّے سُھب ءَ پاد اَتک ءُ گشاد گشاد ءُ گوں گوانکو ءَ سر پُٹ بیت ءُ اد ءَ کوکار کُت ءُ اود ءَ کُوکار کُت بلے اے روچ ءَ آئی نوکیں جیڑھے دست نہ کپت ءُ آئی ءَ ھمے مار اِت کہ مرچی پورا منی چیزے گار اِنت، آئی ءَ ھچ وشّی آیگ ءَ نہ اَت آ شُت جان ءِ شُشت داں مات ءَ چاہ آورت ءُ دیم ءَ ئِے دات ءُ آ پد ءَ چاگردی رسانکدار ءَ چاران بیت کہ باریں چی بیتگ داں آئی ءِ گوانکو ءَ توار کُت ءُ پون ءِ چست کنگ ءَ گوں ھُشک بیت آ پون کنوک آئی زامات اَت کہ بیا وتی گھار ءَ بر من تئی گھار ءِ سون داتگ اَنت گڑا اے مرد ابکہ ءُ ھیران بیت جیڑہ چے اِنت کہ زامات ءَ چُش کتگ ءُ آئی ءَ جُست وتی دپ ءَ آورت کہ جُست کن آں کہ تو چوش پرچا……داں آئی ءِ زامات ءَ پیسر ءَ گوشت کہ دگرانی ازّت ءَ ھما جاگہ ءَ کہ تو جاک ءُ سلوات کتگ ءُ کند اِتگ، تو ھمود ءَ سرے بہ جن ترا الّم تئی پسہ رس اِیت.
آئی ءَ گوانکو دیم ءَ کُت داں گند اِیت کہ منی گُھار ءِ تامُر چاگردی رسانکدار ءِ براہ جوڑ بیتگ۔
آ مرد ءَ زان اِت کہ کے اَت ؟
آ مرد من اِت آں پرچا من اِت تاں ؟ پرچا کہ منی کار ھمیش اَت ……….آ مرد تو ھم بیت کن ئے اگاں تئی کار ھمیش اِنت ،،،،؟
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
