شھید اکیل جان پنام میران – میر جان

شھید اکیل جان پنام میران

میر جان

دی بلوچستان پوسٹ

مروچی من یک انچیں کردے ءِ سر ءَ نبشتہ کنگ ءِ جھد ءَ کنگ ءَ آں بلے آ کرد توسیپ ءِ مھتاج نہ انت- آ یک انچیں کردے ِ کہ امینچو آئی ءِ بابت ءَ نبشتہ بکناں من دم بر آں یا منی ند ءِ سیاھی ھلاس بنت بلے اے کردار ءَ ھچ رنگ ءَ سرجم ءَ نبشتہ کت نکناں- گوں وتی نا سرجمیں لبزاں اے کردار ءِ بابت ءَ نبشتہ کنگ ءِ جھد کنگ ءَ آں –

اے کردار شھید اکیل جان پنام میران انت،شھید اکیل جان بلوچ راجی جنز ءِ جوانیں ءُ زمہ واریں سنگتے بیتگ،جوانیں شھری سنگتے اَت،شھری چیرجنگی (گوریلا جنگ) ءَ باز جوانیءَ پُھ بیتگ- انچو کار کتگ ئِے کس ءَ سما نہ بیتگ پد ءَ واتر شھر ءِ تہ ءَ تر ءُ تاب کتگ ئِے ِ – شھید میران یک راز دار ءُ مستقل مزاجیں سنگتے ِ بیتگ- مسلسل جھد سر ءَ باور کنوکیں سنگتے بیتگ-
من ءُ شھید میران جان 2012 ماں شھید ءِ  ھنکین بزاں کیچن ءَ دوچار کپت ایں – ایشی ءَ چے پیش ھم منی ءُ اکیل جان ءِ ھال اھوال ھست اَت بلے ما یک ءُ دومی نہ دیستگ اَت-  اولی رند ءَ من کامریڈءَ دیست من زانت کہ اے ورنا ءَ گوں زمین ءُ راج ءَ سک باز مھر انت- شھید سکیں مھروانیں سنگتے ات-

یک برے من ءَ یات انت تربت ءَ من دو روچ واستا شھید اکیل جان ءُ شھید جھانزیب جان ءِ نیمگ.ءَ جل اِت آں – گڑا ما دیم ءَ پہ سپرے ءَ رھادگ بیت ایں کار ءِ ھاتر ءَ دو ءُ سے روچ ءَ داں سپر اَت- مئے کار وھدے کہ بیت گڑا ما دیم پہ وتی ھنکین ءَ شت ایں – شھید ھم گوں سنگتاں گل ءِ کارے ءَ دگہ نیمگے ءَ شت-

کامریڈ اکیل جان یک جنگی کماندارے اَت- مدام گل ءِ کارانی ھاتر.ءَ سپرانی تھ ءَ اَت- برے مند، برے تمپ، برے دشت، برے بلیدھ ءُ زامران- مدام گَشت ءَ اَت-

وھد جنزان ات… منی ءُ مھروانیں میران جان ءِ مدام  ھال اھوال برجم اَت- یک روچے شھید ءَ منبءَ ھال کت کہ منی لمبر چیزے وھد ءَ بند بیت…. من چہ نیٹورک ءَ در کپاں… دیم پہ وتاک نیمگ ءَ جنز آں –

چیزے روچ ءَ پد من ءَ ھم اوتاک ءِ نیمگ ءَ کارے ِ کپت- گڑا من ھم شت آں سائجی اوتاک ءَ- من کہ ا وتاک ءَ سر بیت آں گنداں کامریڈ ھم ساڑی انت گڑا سنگتاں گوں سلام ءُ دروت بیت ءُ نند نیاد بیت- مگرب وھد اَت- سنگت ھرکس وتی کاراں گلائش اَت- ننگری ورگ اڈ کنگ ءَ اِت اَنت لھتیں سنگت دارُک چِنگ ءَ شت، لھتیں آپ آرگ ءَ، یک دیمے پہ گاٹ ءَ شت بلے کامریڈ میران مئے دیوانءَ ساڑی ات- مارا َ مئے ھنکین بابت ءَ جست ءُ پرس کت ءُ جنز ءَ دگہ بازیں چیزانی سر ءَ من ءُ کامریڈ بھس کت- وھد ھلاس بیت- شام وھد بیت ما ورگ وارت- بی بی سی ءِ وھد بیت سنگت کُل دیوان جاہ ءَ ساڑی بیت اَنت – بی بی سی چالو بیت – سیاہ چاھے ھم سنگتاں آؤرت ءُ دیمءَ ایر کت- بی بی سی ءَ پد سنگتاں تبسرہ کت… دیوان ھلاس بیت… ھرکس وتی واب جاہ ءِ نیمگ ءَ شت- من ءُ شھید میران جان ھوار بیت ایں ءُ دیم واب جاہ ءَ نیمگ ءَ شت ایں – تیوگیں شپ من ءُ کامریڈ نشت ایں بسترانی سر.ءَ دیوان کت-

ھمے داب ءَ ما ھم داں شش ماہ ءَ اوتاک ءَ جل ات ایں – اوتاک نندگ ءَ وھد کہ سرجم بیت اَنت گڑا من در کپتاں شتاں دیم پہ وتی ھنکین ءَ نیمگ.ءَ –

چیزے روچ ءَ پد شھید ھم گل ءِ کارانی ھاتر.ءَ وتی ھنکین ءَ اتکگ ات- گوں من ھال اھوال کت – کندگ ءُ مسکرا کت ئِے ِ بلے من نزانت کہ اے منی ءُ کامریڈ میران اِنت گڈی دیوان ءُ گڈی ھال اھوال انت-

دومی روچ ءَ مگرب وھد.ءَ ھالے ِ شنگ بوت کہ تربت دمگ چاھسر ءَ مچکدگءَ زور گریں لشکر.ءَ انگیر کتگ گوں سرمچاراں جنگ ءَ اِنت-  دو کلاکءَ پد ھال شنگ بیت کہ کماندار میران جان گوں دگہ چار شیریں سربازاں ھوار شھید کنگ بیتگ-