رملچّہ
ماجد بلوچ
ھچ مہ گوش گُنگ بہ بو زبان منی
ھچ مہ گوش گُنگ بہ بو زبان منی
دانکہ ارواہ ھست اِنت
جان منی، جہان منی
بس بہ تپاس ھر کس ءَ وتی دیدگانی تہ ءَ
ھر کس ءَ گوں شِیر ءُ شکر بکن
وتی گالانی لزتاں
ھچ مہ گوش گُنگ بہ بو زبان منی
اد ءَ کس نہ بیت ھمبل دائمی
اد ءَ کس نہ بیت ھمراہ یک وڑ ءَ
اد ءَ نہ اوشتیت وھد یک چک ءَ
اد ءَ ھر کسی لوٹ ءُ واھگ بندوک اَنت
گوں یکے دومی ءَ
اے جھان بے لوٹ ءَ نہ کنت کس ءَ گوں سنگتی
اد ءَ پکری سنگت دروہ اَنت
نیم راہ ءَ
گُڑاں گلِگ کن ئے گوں کے ءَ؟؟؟
ھچ مہ گوش گُنگ بہ بو زبان منی
ھر کس کنت وت ءَ درشانوک راستی ءِ
بلے
کس اوپار نہ کنت شرگِداری ءَ
ءُ نہ کنت آسر منزل ءَ پگر گواچینی ءِ
گُڑا!
چوں تو ھر کس ءَ پوہ کن ئے؟؟؟
کہ تئی آشوبی واب پیلو بنت
ھچ مہ گوش گُنگ بہ بو زبان منی
بس بہ تپاس وت ءَ
بس بہ پھم وتی وابانی منزل ءَ
بس بہ سینگار وتی راہ ءِ چیدگاں
بس ھمراہ بہ بو وتی وابانی دائمی
ھچ مہ گوش گُنگ بہ بو زبان منی
ھر کس ھرچی گوشیت
بِلّے گوشیت
بس اوپار کن دُراھیں اڑاں
پہ یک مولے ءَ
ءُ مکسدے ءَ
ھچ مہ گوش گُنگ بہ بو زبان منی
بس بہ پھم ھر کس ءَ
بس گوش بدار ھر کس ءَ
بس بہ تپاس ھر کس ءَ
بس بکن گونڈ بدار لبزاں ءَ وتی
ھچ مہ گوش گُنگ بہ بو زبان منی
بہ بو راستی ءِ رھزن
بہ بو وابانی دشتار
بہ بو دیدگانی جمبر
بہ بو گواتانی سوالی
بہ بو راھانی رھشون
بہ بو شائرانی شَیر
بہ بو گُشندھانی الھان
بہ بو کپوتانی زیمُر
بہ بو تامُرانی جوگی
بہ بو کازماس ءِ واھمُد
بہ بو بانورانی سالونک
بہ بو کوھانی کوھچار
بہ بو پسانی شپانک
بہ بو بَگّانی جَت
بہ بو جنگل ءِ بادشاہ
بہ بو شھرانی پنڈوک
بس بکن
ھچ مہ گوش گُنگ بہ بو زبان منی
لوٹانی لوٹاں بکن سرجم
راھانی راھاں دربر
سنگتانی سنگتی ءَ پیلوش
پکیرانی کاسگاں وتی کن
پہ سرزمین ءِ زمزیلانی سندگ ءَ
پاھو ءَ بِچُک چمّاں کن
ھچ مہ گوش گُنگ بہ بو زبان منی
روچ ءِ جیرّاں ایرموش کن
گوات ءِ دوشاپاں ماندار وتی دلبند ءَ
شپ ءِ تھاری ءَ لگتمال کن
سھب ءِ سمین ءَ امباز کن
جھان ءِ درد ءُ دُراں وتی دل ءِ جنتر ءَ پہ بُدرُش
پہ وتی مادر ءَ
ھچ مہ گوش گُنگ بہ بو زبان منی
توار بہ بو ھر بلوچ پُسگ ءِ
درداں ماندار ھر جنوزامیں دلے
سرجم بکن واباں شھیدانی
آسر بکن لوٹاں بندیگانی
ھچ مہ گوش گُنگ بہ بو زبان منی
کسھاں بیار وتی راجدپتر ءِ
گوں وتی دل ءِ موجاں
وتا شرمندگ بکن وتی دیم ءَ
بہ پھم وتی راجدپتر ءِ ردیاں
بس نوں بزاں بیست ءُ یکمی کرن ءِ نوبتاں
ھچ مہ گوش گُنگ بہ بو زبان منی
ھچ مہ گوش گُنگ بہ بو زبان منی
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
