دیوانے گوں ناکو مراد بکش ءَ
سرھال:بلوچستان مزن شھدربرجاہ ءِ جیڑہ۔
نبشتہ: سفرخان بلوچ
دی بلوچستان پوسٹ
کُوٹی ءِ یک کشے ءَ من ءُ دومی کش ءَ ناکو مراد بکش نشتگ ءُ ھمے وھد ءَ من چہ ناکو ءَ جست کُت،
ناکو بلوچستان مزن شھدربرجاہ ءِ جیڑہ ءِ بابت ءَ تئی ھیال ءُ لیکہ چی انت؟
من ھچ نہ گْوش آں ، ناکو ءِ پسّو
من گوں ھیرانیں نِگاھاں ناکو ءِ نیمگ ءَ چارگ بِندات کت ءُ پد ءَ گْوشت” ناکو من ءَ چہ ترا اے اُمیت نہ بوتگ”۔
چہ من ھمے اُمیت ءَ بدار ، اگاں پیسر ءَ نہ داشتگ گڑا مروچی ءَ پد دارگ ئِے بِندات بکن ، ناکو ءَ درّاینت۔
ناکو تو زان ءَ بلوچے نہ ئے؟
ھو! من بلوچے آں، پرچا زان ءَ ؟ ناکو ءِ پسو۔!
ناکو گُڑا بلوچ ءِ لجّ ءُ ننگ ءِ گپ اِنت ءُ تو گْوشگ ءَ ئے من ھچ نہ گوش آں ۔ بلوچ زھگ ءُ زالبول بے شرپ کنگ بوتگ اَنت، بلوچ زھگ ءُ زالبولانی بْرھنگیں اکس ءُ تامر کشّگ بوتگ اَنت، منی ھیال ءَ اے وھد ءَ بلوچ ءِ ھاتر ءَ بے تواری زنڈیں گناھے ، من دیم گوں ناکو ءَ کُت ءُ گْوشت۔
گوں منی اے گپّاں ناکو ءَ یک برے پد ءَ گوں ھیرانیں نگاھاں منی نیمگ ءَ چارگ بِندات کُت ، ادارُکے ءِ بے تواری ءَ پد ناکو ءَ تھنا اے گپ جت، اے زنڈیں گناہ ءَ ھپتاد سال اِنت کہ من کنگ ءَ آں ءُ اگاں یک برے پد ءَ بکنان ئِے آزمان جھل نہ کپ ایت ۔
ناکو اے بری بلے سرجمیں مھلونک سرپد ءُ پوہ اِنت کہ سرجمیں چیز مھلونک ءِ دیم ءَ چو روچ ءِ رُوژنائی ءَ پدّر اَنت۔ سرجمیں مھلونک پاد اَتکگ ءُ توار چِست کنگ ءَ اِنت ءُ نوں اے مھلونک ءِ بے تواری پُرشتگ الم چیزّے بیت،من یکبرے پد ءَ ناکو گْوشت۔
اے چیزاں ھپتاد سال اِنت مردُمانی دیم ءَ اَنت ، واجہ شیرو مری وتی تامری کلوہ ءِ تہ ءَ اے گپ ءَ پدّر کنت کہ مئے مات ءُ گْوھار نیادی ءَ بھا بوتگ اَنت، زرینہ مری ءَ چینچو سال اِنت کہ بیگواہ اِنت؟ سمینہ ءُ زرملک ءَ چینچو وھد اِنت پاکستانی لشکر ءِ بندی جاھاں بند اَنت ءُ تئی ھیال ءَ اے بابت کس سرپد نہ اِنت، تئی ھیال ءَ کس نہ زانت ؟
درست سرپد اَنت ، درس زان اَنت، ھمک روچ چینچو زھگ ءُ زالبول پاکستانی لشکر ءِ دست ءَ کم شرپ بُوَگ ءَ اِنت ءُ تئی ھیال ءَ اِیشانی بابت ءَ کس سرپد نہ اِنت۔؟ ناکو ءَ دیم گوں من کُرتگ اَت ءُ وتی ھیالاں درشان کنگ اَت۔
من ناکو ءِ دپ ءِ گپ گُڈ اِت ءُ گْوشت، ناکو اے گپ نہ اِنت، یک ءُ دو زالبول ءِ جیڑہ ءُ سدانی کچّ ءَ زالبولانی تہ ءَ پرک اَست۔ آ دگہ جیڑھے ءُ اے دگہ جیڑھے .
جیڑہ یکین اَنت، ھچ جتا نہ انت۔ بس بے تواری ءُ توار چست کنگ ءُ وھد ءِ پرک ھست ، دِگہ ھچ۔
بلے مردماں توکل کتگ ءُ نوں پُر آشوبیں توارے چِست کُتگ ءُ من یکبرے پد ءَ دیم گوں ناکو ءَ کت ءُ گْوشت۔
اے پیمیں توار سک باز چست بوتگ ءُ اے اولی رند نہ اِنت ،بلوچ چونائیگا پیشُک ءِ آس ءِ پیم ءَ اِنت ءُ انچش یک دمان ءَ جمبور بیت ءُ پد ءَ یک نانے نہ پچ اِیت مِر اِیت ءُ پُر بیت۔ اکبر ھان بُگٹی ءِ شھادت ءِ وھد ءَ اِیشاں تیوگیں جھان سر ءَ زُرت ءُ ھمے شال ءِ تہ ءَ چاریں نیمگ ءَ آس روک اَت۔ سرجمیں مھلوک ڈنّ ءَ در اَتک بلے رند ءَ چی بوت؟ ھما کہ تمرد ءُ شرپداریں بلوچ اِت اَنت ءُ آیانی تہ ءَ نیم ءَ وتی سر گوریچاں دات ءُ لھتیں کوھسار جوڑ بوت ءُ تنیگا گوں دژمن ءَ دیم پہ دیم اَنت، بلے ھما کہ ھر وھد ءَ بے توار بوتگ اَنت آ تنی وھدی بے توار اَنت ،بس برے برے چوں پیشک ءِ آس ءِ پیم ءَ جمبور بَہ اَنت ءُ پد ءَ پُر بنت۔ تو دُور مرو ھمے سالے گپ اِنت کہ چہ آواران ءَ یک گْوھارے وتی برات ءِ شوھاز ءَ شال ءَ اتک تھنا بیچارگیں ماما کدیر ءِ ھمراھی ءَ شال ءَ بیگواھیں مردمانی کیمپ ءَ نشتگ اَت ءُ ھمائی ءَ ھم روگ ءِ روچ ءَ یک پولیس کارمندے کم شرپ کنت ءُ آئی ءِ چمّانی رتکگیں ارساں ادارُکے ءِ ھاتر ءَ ھمے پیشک ءِ آس روک کت۔ اِیشاں لھتیں روچ ءِ ھاتر ءَ سرجمیں جھاں سر ءَ زُرت ءُ مردم ھمے جیڑگ ءَ اِت اَنت کہ نوں سرجمیں بندیگ آجو بنت، بلے چی بوت ؟ ادارُکے ءِ ھاتر ءَ چست بوت اَنت ءُ پد ءَ بے توار بوت انت۔
ناکو ءَ وتی گپ بس کت ءُ من دلمانگ اِت آں کہ دِگہ جُستے کنان ئِے داں ھمے ساھت ءَ مئے لوگ ءِ نزّیک ءِ مسیت ءِ مُلّا ءَ بانگ بِندات کُت ءُ من ءُ ناکو دوئیں بے توار بوت ایں ءُ پہ نماز ءِ وانگ ءَ مَسیت ءِ نیمگ ءَ رھادگ بوت ایں ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
