شهید دُرجان پُل ءِ کسانیں یاتے
هیات گُل
دی بلوچستان پوسٹ
دُرّو ترا یات بیت یک روچے من تو واجُل شِکار ءَ شُت اِیں،، یک ڈبّی یے تیر کُٹّینت، بلے یک مُرگے هم نہ جت،من ءُ واجُل ءَ تئی سر ءَ سک کند اِت، پرچا کہ مے شِکاری تو اِت ئے..
اڑے بے هیال آں، تو ءُ واجل ءَ من ءَ گوں لنگیں پاد ءَ دو لیٹ هم دات، بلے گپّے زان ئے؟؟ من ءَ تُشے هم سما نہ بوت کہ من گوں لنگیں پاداں لیٹ وارتگ،پرچا کہ شُمے وڑیں مِهروانانی همراھی ءَ اے وڑیں لیٹ تاهیر دے اَنت، شُما من ءَ دهمکی هم دات کہ اگاں لوگ ءَ تو نام بہ گپت گُڑا ما دوئیں ترا ٹینٹیں رِدے لٹّ گِر اِیں.
هیر من شُمے کرّ ءَ وَ هَو کُت، بلے دُرّو پُل پَهِل کن کہ دپ دارَگ نہ بوت، من مولُک هال دات کہ درّو ءَ ڈبّی یے تیر جتگ ءُ مُرگ یکے هم نہ کپتگ.
مرچی سنگتے ءَ هال کُت کہ شِکار ءَ رو ایں، من هما دمان ءَ تئی ترْانگ ءَ کپت آں، اے سهت ءَ شِکار ءِ روَگ پہ من گُش ئے کُنٹگ چکاریں پندے ءِ روَگ اَت..
دُرّو ترا دگہ هالے ھم دیَگ لوٹاں، ترا چہ پد واجُل ءَ شِکار یل داتگ، مزاک ءُ مسکرائی هم شمُشتگ ، اگاں من بہ گوْش آں کہ مردُمی کٹ ّءَ چہ شُتگ هم رَد نہ باں..
دُرّوو پُل من زاناں اَچ ما سک گِلہ ئے ءُ مے همراھیءَ شِکار ءَ هم نیا ئے گوں، بلے بس پہ یک دمانے واتر کن کہ واجُل ءَ کمّے کُنّت کن ایں کہ بگند ئے کمے تاهیر بہ گیپت…..
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
