آواران ءِ شھیداناں سُھرچکیں دْروت
نبشتہ کار: کمال بلوچ
دی بلوچستان پوسٹ
من ءَ گیر اِنت ،من چہ دشت ءِ مُچّی ءَ(جلسہ )ءَ چیزے روچ ءَ پد ماں گَل ءِ کارانی ھاتر ءَ دیم پہ سپرے ءَ درکپت آں ءُ ڈاکٹر منان گوں سنگتاں ھمود ءَ راجی جُنز ءِ درگت ءَ لس مھلوک ءِ گون ءَ گِند ءُ نِند کنگ ءَ اَت،اے وھد ءَ پاکستانی لشکر ءِ زُوراک ءُ زُورانسری روچ پہ روچ ودّان ءُ گیش بُوَاں اَت، پمیشکا دِگہ بس ءُ گاڑیاں سپر کنگ پہ راجی جُھد کارے ءَ تاوان بار اَت،گُڑا ما موٹر سائیکل ءِ سر ءَ دیم پہ آواران ءِ نیمگ ءَ وتی سپر بندات کُت، اے سپر ءَ دِگہ لھتیں سنگت اوں ھمراہ اَت۔ جُنزگ ءِ وھد ءَ ما شھید واجہ ڈاکٹر منان، شھید ساجد جان ءُ آ سنگت رُکست کُت اَنت ءُ دیم پہ سپر ءَ راہ گِپت اِیں، اے وھد سال ساچان(اگست)دو ھزار چاردہ ۲۰۱۴ اَت۔
اگاں من اے مُچّی ءِ بابت ءَ چیزے دانک بِہ گْوش آں، گُڑا اے ھبر سد درسد راست اِنت کہ بازیں سیاسی جادُوگِراں پہ وتی رِپک ءُ ھُنر، ھیلا سازیانی ڈبّگ ءُ چیر دیگ ءِ ھاتر ءَ زر ءُ کلدار ھرچ کُتگ پہ اےدابیں راجی مُچّی ءِ اڑ دیگ ءَ بلے پد ءَ ھم بےسوب بوتگ اَنت، بلے شھید واجہ ڈاکٹر منان ءُ آئی ءِ ھمکارانی جُھد ءُ جپا ءِ برکت ءَ اے راجی مُچّی ءَ تانسریں دشت ءَ بھر زُرتگ ءُ ھمراھداری اِش کُتگ، کُجام ھم تک ءُ پھنات ءِ سر ءَ ھبر بکن ئے، دشت ءِ لس مھلوک ءَ پہ اے راجی مُچّی ءَ ھمکاری کُتگ،اے راجی مُچّی بی ایس او آزاد ءِ نمیرانیں رھشُون ءُ گْوستگیں بُنجاھی کارگُشاد (سیکریٹری جنرل ) رزا جھانگیر (شے مُرید ) ءُ بلوچ نیشنل موومنٹ دمگی رھشُون امداد بُجیر ءِ یات ءَ برجم دارگ بوتگ ،اے گپّانی گْوشگ ءِ مول ءُ مراد ھمیش اِنت کہ چہ پاکستانی لشکر ءِ زُلم ءُ زُوراکی ءَ ابید مرچی ھم بلوچ راج گوں راجی جُھد ءَ ھمگرنچ ءُ ھوار اِنت ۔
ھمے پیم وھدے ما سپر کنان ءُ جاھے ءَ سر بوت اِیں، گُڑا پہ دم ءِ بال ءَ کنگ ءَ ما شپ ءَ آرام کُت ۔
دامگ(نیٹ ورک) ھستگ اَت، سنگتے ءَ پَون کُرت ءُ ھند ءُ دمگ ءِ ھال گِپت،چہ ھال گیرگ ءَ مارا ھمے ھال ءُ اھوال رس اِت کہ شھید شھید رزا جھانگیر ءِ آرپیں کماش واجہ شھید بکتیار، ناکو مزار ءُ دِگہ لھتیں گُلزمین ءِ پُسّگ سید ملا ھیسائی زیارت ءِ سر ءَ اِبابت ءِ وھد ءَ آئی ایس آئی ءِ داشتگیں سِلکاراں شھید کُتگ اَنت۔
بی ایس او آزاد ءِ نمیرانیں رھشُون رزا جھانگیر ءِ شھیدی ءَ سال توام نہ اَت کہ آئی ءِ کماش واجہ بکتیار ھم شھید کنگ بوت۔
اے مردمانی ماں ابابت جاہ ءَ شھید کنگ ءِ مستریں مکسد ھمیش بوتگ اَت کہ بلوچ چاگِرد ءِ تہ ءَ یکرندے پد ءَ دین ءُ مذھب ءِ نام ءَ بھر ءُ بانگے پیداک بکن اِیں ، بلے بےسوب بوت اَنت ،چیاکہ بلوچ راج ءَ سما کُتگ ءُ سرپد اِنت کہ اے کُلیں چِست ءُ ایرانی بُن کَے اِنت ، پمیشکا اے دابیں رِپک ءُ ھُنرانی بام ءَ داتگ، ھمے مردم کہ اے مردماں تیر بارانی ءَ پد شھید کن اَنت گُڑا تچک ءَ دیم پہ پوجی بُنجل (کیمپ ) ءَ رو اَنت ۔ چرے ھبر ءَ ساپ پدّر اِنت کہ اے آئی ایس آیس ءُ حافظ سَئید ءِ جوڑ کُرتگیں مردم اَنت کہ پہ چندے زر ءِ ھاتر ءَ وتی جند ءِ راج ءِ ھلاپ ءَ کار کنگ ءَ اَنت،بلے بلوچ راج چہ وھد ءَ ءُ راجدپتر ءَ پوہ ءُ سرپدیں راجے ، چیاکہ اے دُژمِن وتی جند ءِ ناشرکاریاں آئرا اے سَبک داتگ ءُ دومی نیمگ بلوچ راجی رھشون ءُ جُھدکاراں گِس پہ گِس راجی آجوئی ءِ کلوہ سر کُتگ ءُ سرپدی داتگ کہ گُلامی ءِ زند زندے نہ اِنت، اگاں ما پہ آجوئی ءِ بالینگ ءَ جُھد ءُ کُوشست نہ کُت گُڑا مئے باندات کدی روژنا نہ بیت کہ آ واب ما زِرد ءِ اندر ءَ سمبئنتگ ،پمیشکا بلوچ راج ءِ شیّوار ءُ سرپدی ءَ دُژمِن ءِ کُلیں رِپک ءُ پندل گوں ھاکاں ھوار کُتگ اَنت۔ نیکہ ٹَکّ ءُ مذھبی چِست ءُ ایراں سوب کُتگ، نیکہ بلوچی ءُ براھوھی، دُژمِن ءِ تانسریں رپکّانی بندیکّ سِستگ ءُ گار بوتگ، پمیشکا زُلم ءُ زُوراکی ءِ آھن گْوارگ ءَ اِنت کہ من بلوچ ءِ راجی جُھد ءَ ایرموش ءُ ھلاس بکن آں، بلے چُش کدی نہ بیت، بلکیں بے سوبی آئی ءِ تالہ ءُ بھت ءَ نبشتگ اِنت ۔
مرچی دُژمِن ءَ بلوچستان ءِ ھر ھند ءُ میتگ ءَ ریاستی ڈیتھ اسکواڈ اَڈ داتگ داں بلوچ ءِ دْروشم ءَ وتی جند ءِ آجوئی لوٹوکیں براتاں بِہ جنت ءُ شھید بِہ کنت ، بلے اے زانگ لوٹ اِیت کہ بلوچ ءِ چاگِرد ءِ اے دابیں سِلکاراں کدی وتی نہ کنت ، بلکیں آیاں مُدام اِیر جنت ءُ ڈوبار اِیت ۔ ھمے وڑ ءَ پہ آیاں راجدپتر ءَ چو ائیدو ءَ کدی نیک ءُ وژنامی نہ بیت، بلے اے درگتءَ
دگینا ءَ را زانگ لوٹ اِیت کہ بلوچ ءِ ورنا ، پیر ءُ کماش زھگ ءُ زالبول پرچا زندانی ءُ شیھد کنگ بُوَگ ءَ اَنت، چیاکہ انسانیت ءِ رد ءَ پہ دُگنیا ءَ ھژدری بیت کہ آ ایردستیں راجانی توار بِہ بنت ءُ آیاں چہ زُوراکانی زُوراکی ءَ بِہ رکّین اَنت۔
ھمے وڑ ءَ پہ بلوچ راج ءَ ھم اے وھد ءِ لوٹ ءُ گزر اِنت کہ آ گوں تِپاکی ءَ دیم پہ وتی مُرادانی مِنزل ءَ جُنزان بِہ بیت ءُ آشوبی لوٹاں پیلو بِہ کنت، چیاکہ اے گپ ءَ من سدّکاں شھیدانی رِتکگیں ھون الّم رنگ کاراَنت، زیبائیں بلوچستان آجو بیت ، بلے پہ راج ءِ ورنایاں اے ھژدری اِنت کہ وتی ھر ساھت ءَ بچار اَنت ءُ راجی کاراں گیش ارزِشت بِہ دے اَنت، اگاں نا وھد پہ کس ءَ مھتل نہ بیت۔
بلوچ راجی جُنز بلوچ شھیدانی داتگیں کُربانیانی برورد اِنت کہ مرچی بلوچ ءِ توار ماں سرجمیں دُگنیا ءَ سر بوتگ،بلے تھنا پہ توار ءِ سر بُوَگ ءَ ما وتی آجوئی ءَ گپت نہ کن اِیں،پمیشکا مارا اے ھبر چارگ لوٹ اِیت کہ جُھد گوں ھمراھداری ءَ ھوار زانت ءِ کلیں تاکت پہ راجی آجوئی ءِ کار گِرگی اِنت۔
اے درگت ءَ شھید واجہ بکتیار مئے پجّار اِنت کہ وتی بچّ شھید رزا جھانگیر ءِ لاش ءَ گوں وتی لوگ بانک بی بی ارز ملک ءِ ھمرائی ءَ کُوپگ دنت ءُ ماں ماتیں گُلزمین ءِ باھوٹ کنت ۔
مروچی شھید واجہ بکتیار ءِ کُربانی ءُ آئی ءِ بھادری بلوچ راجدپتر ءِ تہ ءَ نبشتہ اِنت ،ھر بلوچ آئی ءِ بھادری ءِ سر ءَ پھر بند اِیت ۔ شھید ناکو بکتیار ،شھید ناکو مزار شھید امیت بلوچ ،شھید سَئید بلوچ ،شھید نیاز بلوچ، شھید داد جان ءُ شھید اللہ بکش ءِ داتگیں کُربانی بلوچ راجدپتر ءَ دائِمی گیر آرگ بنت۔ اے بابت ءَ بلوچ ورنایاناں لوٹ اِیت کہ وتی شھدانی داتگیں کُربانیاں بْوان اَنت، آیانی سر ءَ نبشتہ بکن اَنت ءُ دُگینا ءَ را سرپدی بِہ دے اَنت کہ پاکستان ءِ زُلم ءُ زُوراکیانی داستان بلوچ سرڈگار ءِ سر ءَ اے داب ءَ اَنت ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
