کالار بے مُراد نہ اِنت
نبشہ کار: لیاقت بلوچ
دی بلوچستان پوسٹ
کالار بے مُراد نہ اِنت ، کالار مُرادیگ اِنت، مُراد ءِ شھیدی ءَ مرچی دوبر کالار ءِ نام زِندگ کُتگ. ایکو ءَ کالار ءِ اِنّا بلکِن ءَ سجیں بلوچستان ءِ نام ئِے زِندگ کُتگ. کُجام وھد ءَ مئے مھرستانیں زمیں ءَ یک ترُمپے ھون رِچیت، گُڑا بلوچستان ءِ نام گوں راج دپتر ءَ نوک بیت. ہمے رتکگیں ھونانی برورد اِنت کہ بلوچستان مرچی ءَ تاں ابد مان اِنت ءُ زندگ اِنت..
مُراد ءَ وتی زندگی گوں گماں پمیشکہ ھمگرنچ کُتگ اَت کہ راج چہ گُلامی ءُ بزگی ءِ گم ءُ گڈتیاں در بئیت ءُ ھمے زمزیل ءَ چہ آجو بہ بیت کہ آ بلوچ سرزمین راج دپتر ءَ گار کن اَنت. مُراد ھر کُجا بُہ بُوتین اَت پہ دُژمِن ءَ یک بیمے اَت.
مُراد، مُرادانی منزل ءَ سر بوگ ءِ واستا زِندگی ءِ وشی گمانی بھر کُتگ اَت کہ مھرستان ءِ مردُمانی گم لاچاری بزگی نیست گاری گار بِہ بیت. مُراد تو پرچا چو زُوت مارا تھنا کُت ئے؟ زندگی وتی رنگ ءَ را چنچو زوت مٹ کُت..
مُراد سکیں مھروانیں ءُ زمین دوستیں ھمبلے اَت، چَہ کسانی ءَ گوں راجی گماں ھمگرنچ اَت، جھد کنان اَت، آئی ءَ باریں اے کسانیں مُدّت ءں تہ ءَ پہ وتی رُژنائیں منزل ءَ چنچو مُراد جوڑ کُتگ . گیدی ءِ توک ءَ منزلانی واستا جھد کنوکیں مردم درستیں گمانی دیمپانی ءَ کن اَنت. ھمے پیم ءَ مُراد ءَ باریں چنکس گم دیستگ .
مُراد ءِ برات، گُھار ءُ مات چنچو زھیر وار اِت اَنت کہ مراد ءَ گوں زھیر واریں چماں بِگند اِیں، بَلے شومیں ملکموت ءَ موہ نہ دات کہ مُراد ءَ چہ دْرستاں گِستا کُت ئِے، کالار ءِ لیب جاہ چنچو زھیر وار اَنت، چنچو مردم جاہ مرچی مُراد ءَ مارگ ءَ اَنت، راجی شھیدانی ھون کدی گار نہ بیت. کالار مرچی پہ جنگی بچاں پُشت ءَ پشت نہ کپتگ، مُراد ءَ پد ءَ نامے نوک کُتگ.
مُراد گوں ارمانیں دلے ءَ شُت مُراد سنگت ءِ درد ءَ باز پوہ بوت ،مُراد وتی ھمراھانی واستا چنچو کربانی داتگ، گُلزمین ءِ نرمزاریں بچانی سر ءِ بُرز کنوک ءِ نام مدام بُرز بیت. ما کسان ات اِیں کہ مراد ءَ ھر وھد ءَ بلوچستان ءِ بابت ءَ گپ ءُ تران کُت، لیب جاھاں بِگر تاں وانگجاھاں مُراد ءَ ھر نودربر ءَ گوں وشی ءَ ھمے درس ئِے داتگ کہ گُلزمین چنچو بزگ اِنت، ھون ءِ جوھاریں ھار تچان اَنت، بلے ما انگت واب اِیں. سرزمیں ءِ پاھازوکیں سنگت کوھاں نِشتگ اَنت ءُ سکی بزگیاں وتی جان ءَ پمیشکہ جاہ دیگ ءَ اَنت کہ باندا بلوچ راج یک آزاتیں راجے بِہ بیت ءُ وت واجھی مئے راج ءِ دست ءَ بہ بِیت.
راجانی زِندگ دارگ ءِ واستا کُربانی الّمی اِنت، پہ راجانی آزاتی ءُ زِندگ دارگ ءَ ھر وھد ءَ گوں گلزمین ءِ نرمزاریں بچاں وتی ھیسیں سر ندر کُتگ اَنت ءُ مرچی ما ھماھانی سر ءَ پزلھر بند اِیں.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
