یک بِچکندگے ءِ نام سلام جان – گزین بلوچ

یک بِچکندگے ءِ نام سلام جان

نبِشتہ کار: گزین بلوچ

دی بلوچستان پوسٹ

زِندگی ہمُک مرّدُم ءَ ازیز اِنت بلے ھما زند کہ اِنسان وش ءُ وشھال بہ ِبیت، آرا ھچ ءِ گم ءُ سکّی مہ بِیت، وتی ڈیھ ءَ وت واجھی بِہ کنت، گُڑا آ زند ءِ درور ھچبر نہ بیت،

بلے چُشیں زِندے مہ بِیت کہ آ دِگہ کسّے ءِ گلام بِہ بیت.

آود ءَ انسںان چو بَندی ئیں مُرگ ءِ پیم ءَ بند بِہ بیت وتی زند ءِ ھمُک واھشتاں چہ زِبَھر بِہ بیت، کسے ءِ زوراکی ءِ سانکلاں بندیگ بِہ بیت،
اللہ تعالیٰ انسان ءَ را جِھان ءِ توک ءَ وڑ پہ وڑیں کومانی چھرگ ءَ زانگ کُتگ، ما وش بھت اِیں کہ مئے پجّار چہ بلوچ ءِنام ءَ بُوگ ءَ اِنت، بلوچ ھما گیرت مندیں کوم انت کہ آ پہ دری کومانی واست ءَ وتی جان داتگ آیان ءَ وشیں زندے بکش اِتگ چہ دُژمن ءِ دست ءَ آیانی وتن پچ گپتگ ءُ داتگ چوکہ کلیج بَھرین، مسکت،

انڈیا کُلیں مُلکانی واست ءَ وتی نُگرھیں جان اِش داتگ ،گُڑا من وتی سر ءَ گوں پکر ءَ چِست کناں کہ من ھما گیرت مندیں بلوچانی چُکّ ءُ پدریچاں۔

نوں من بلوچ بلوچستان ءِ بارو ءَ چیزے گُشگ لوٹاں کہ بلوچستان پیسر ءَ یک آزاتیں ڈیھے بُوتگ ،بلوچ ءِ جتائیں دود ءُ ربیدگے بُوتگ رند ءَ 27 مارچ 1948ءَ بلوچ سرڈگار ءِ سر ءَ پاکستان ءِ رستریں پوج ءَ پہ جَبر ءُ تاگت ءِ سر ءَ کوازہ کُتگ، بلوچ راج ءَ ھما روچاں وتی ڈیھ ءِ کوازہ ءِ ھلاپ ءَ چِست بُوتگ وتی آزادتی ءِ واست ءَ جنگ ءِ جار جتگ ، آ تمّردیں مرد آگا ابداکریم ءُ آئی ءِ سنگت بُوتگ اَنت، اے ھما جنگ اِنت داں روچ ء مرچیگ ءَ برجاہ اِنت، بلوچ راج ءَ وتی سینگ ءَ شِلسریں تیرانی سگّگ ءَ اِنت.

شھید سلام جان 2007 ءَ بلوچ راجی پوج ءِ کاروان ءِ یک سنگتے جوڑ بیت ، بلوچ راج ءِ درّداں گوں ھور بُوتگ، سلام جان یک وش زُبانیں، یک مھربانیں سنگتے اَت گوں ھمُک سنگت ءَ بِچارتیں کندگ ءَ اَت، پہ جان ءُ دل وتی کاراں دزگٹ اَت، اگاں ما سپر ءَ بہ بوتین اِت اِیں برے برے ما چو جان نہ داتگ گُڑا سلام جان مارا دست ءَ گِپتگ پاد کُتگ کہ بیا رو اِیں منی ھمبلاں اے کار مئے جند ءَ را کنگ لوٹ اِیت، من زاناں سکّ ءَ گرانیں وھدے بلے گوں وھد ءُ جاوراں مارا روگی اِنت ءُ ھمے جاورانی دیمپان بوگی اِنت.اے نگیگیں وھدے پرچاکہ اے جنگ مئے کوم ءِ زندگ کنگ ءِ جنگ اِنت، مُدام شھید سلام جان ءِ زُبان ءَ بس ھمیں یکیں گپ اَت.

شھید سلام جان 6 جون 2015 ءَ آواران مشکئے ءِ دمگ کپّورا ءَ گوں ریاستی ڈیتھ اسکواڈ سردار اَلی ھیدر مھمد ھسنی ءِ ٹولی ءُ پاکستانی پوج ءِ گوما دیم پہ دیم ءَ مِڑیت ءُ شھید بُیت، وتی زمین زادگی ءَ پیشدار اِیت.

مرچی شھید سلام جان ءِ شھیدی ءِ چارمی سال اِنت ، من شھید سلام جان ءَ گوں راجی کُلیں شھیداں سُھر چکیں دْروت ندر کناں کہ آیاں پہ وتی ڈیھ ءِ واست ءَ وتی نُگرھیں جان اِش ندر کُتگ.