(چاردہ مئی اتاء جان ءُ زھرہ بلوچ)
نبشتہ / ایس ڈی بلوچ
انسان وھدے کہ دنیاءَ وتی اولی گاماں ایر کنت ماتءِ لاپءَ چہ لگُشیت ءُ دنیاءَ دور کنت گُڈا وت گریوگ ءَ بیت ءُ مردم ءُ مھلوک ءَ وش کنت ءُ کندین ایت زھگ جنکءِ بیت یا کہ بچک ءِ مات پت برات گھار سیاد ءُ وارس درست چہ گلا بال بنت۔
ھرکس ہمے یکین نیک دوائیا کنت کہ زھگ نیک شرین انسان ءِ بات۔
زھگ ءِ ودی بوھگ ءَ مات ءُ مردم سپت ہم جن اَنت ۔۔
بچیگ مئے رُدیت پُل ئِے بیت
چو دودا ءَ میار جلے بیت
ہمے وڈا
بلے وھدے کہ بچ ورنائیءَ مات، پت، برات ءُ گھار، سیاد ءُ وارثاں کہ یل دنت ءُ پدا داہمی جاہ ءَ کہ روت گڑا ہما کندوکان گریوائین ایت کہ ودی بوھگ ءَ کندیتگ اَنت۔
وڑ وڑیں انسان دنیا ءَ کئیت ءُ روت لاتے مرگ ہم مردمان تاھیر بکشیت ءُ لاتے زند۔
بلے بیا مرچی چاردہ مئی دوھزار ھژدہ ءِ کسہ آں کاریں
ھو چاردہ مئی دوھزار ھشدہ چو ھژدیائیں مار ءَ دجیت منارا
ملا فاضُل ءِ ھنکین ءَ رُستگ ءُ مزن بوتگیں دو ورنا کہ اتاء جان ءُ زھرہ جان ءِ نام ءَ مئے دیما اَنت ءُ دل ءَ نکش اَنت
اتاء جان یک شرین انسانی ءَ ابید یک شرین سرپدیں ءُ بلوچ کومی جھدے دوزواہ آں چہ ہم یکی اَت۔
اتاء جان یک مھروانیں ھمبل ءُ براتی اَت کندگ، مزاک، تر ءُ گرد ءُ شکارے ہمراہی درست گوں اتاء جان ءَ بندوک اَت گُشے کہ بے اتاء ءَ ھرچیز نا سرجم اِنت۔
گُشے کہ ھرچیزے وشی گوں اتاء جان ءَ بندوک اَت
ھئو اتاء جان ءَ بندوک اَت۔
گُشے کہ اتاء جان نھنگ ءِ سبز آپ ءِ وڑا زیب دار اَت ھرچ وڑا بچارے سبز آپ ہما وڑ وشتر ءُ زیب دار تِر اِنت اتاء جان ہم ہمے وڑ۔۔۔
بلے بیا کہ اتاء جان ءِ ھمراہی ءَ مئے چمانی چراگ مئے باندات ءِ اُمیت (بی۔ایس۔او آزات) مند زون ءِ کستریں صدر بانُکیں گھار زھرہ بلوچ ہم اتاء جان ءِ ہمراہی ءَ مارا چورہ کنتءُ روت زھرہ بلوچ بی ایس او آزات ءِ یک وانندہ ءُ سرپدیں بلوچ زالبولی اَت بلوچ راجءِ بانداتے اُمیت اَت بلے وائے بد نسیبی ۔
مُلا پاضُل ءِ مند ءَ پہ بلوچ راج ءَ شھید واجہ چیرمین گلام مھمدبلوچ، شھید دلجان بلوچ، شھید ابدلمالک بلوچ، شھید وارث بلوچ، شھید جمیل بلوچ، شھید آتپ بلوچ ءُ دگہ بازیں مَل میڑوک ودی کتگ ءُ پہ ھاک ءَ کُربان بوھگ ءَ ھِچ چک ءُ پد نہ بوتگاں چہ ہماآں یکے زھرہ بلوچ اِنت ۔
زھرہ بلوچ ءِ روگءَ مارا دردیگ الم کُت بلے زھرہ بلوچ ءِ کُربانی آں مئے سوچ ءُ پکر گیشتر مزبوت ءُ مُنزم کُت زھرہ بلوچ ءِ شھیدی ءَ سال ءِ سرجم اِنت مرچی گُشے من گیشتر مزبوت ءُ منزم آں۔
شھید زھرہ بلوچ ءِ کاروان گوں تیزی ءَ دیما روان اِنت اوشت ءُ جلگءِ وڑا نہ اِنت۔
روچ ہپتگ ءُ ماہ ءِ سرا زھرہ بلوچ ءِ کاروان ءِ ھمبل شھید بنت ءُ رونت زھرہ بلوچ ءَ کاروان ءِ ھالان سر کن اَنت ۔
مدام کے مئی کئیت بس ٹپاں نوک کنگ ءِ ہمراہیءَ بلوچ جھدءَ ہم نوک کنت۔
چاردہ مئی دوھزار ھژدہ ہم بلوچ ءِ جھد ءَ دگہ نام ئے بکشیت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
