ھانل دلپروش بوت۔
نبشتہ کار: جہانزیب بلوچ
دی بلوچستان پوسٹ
سُھب ءِ سر ءَ شَنیکانی توار اَنچو وش اَت کہ بے تاھیریں زِرد ءَ کرارے شکساھگ ءَ اَت، ءُ زھگ ھمے پسانی شنیکاں گوں گْوازی کنگ ءَ اِت اَنت۔ ھمے پیم ھانل ھم چو مُدامیگیں سُھب ءِ وڑ ءَ پاد اتکگ اَت ءُ وتی مکتب ءِ روگ ءِ تیاری ءَ گُلائیش اَت کہ زُوت ءَ زُوت وت ءَ جاڑی بِہ کنت ءُ دیم پہ وانگجاہ ءَ راھی بِہ بیت ۔ دومی نیمگ ءَ ھانل ءِ دزگھارھم اتکگ ءُ ساڑی اِت آں کہ دم پہ ساھت ھانل ءَ توار ءَ اِت آں زُوت کن دیر بوھگ ءَ اِنت ۔ دومی اے ھم یک چیریں گپّے نہ اَت کہ ھانل وانگ ءَ سک شیوار ءُ جُھد ءُ جپّاہ کشوکیں جنِکّے اَت، پمشکا میتگ ءِ تانسریں مردماں آئی ءِ سک توسیپ ءُ ستاہ کُت کہ وانگ ءُ زانگ ءَ ھانل وتی مٹ ءُ بدل وت اِنت ۔
ھمے وڑ ءَ وھد دیم ءَ جُنزان اَت ءُ ھانل ءِ زند ءِ لاری ھم، ھمے داب ءَ دیم ءَ کنزان اَت۔ چیاکہ ھانل ءِ دیستگیں واب یک رُژناھیں باندات ئے ءِ واستہ جہد کنگ اَت داں وتی پُلّیں راج ءَ وشیانی امبارے دات بکن آں، بلے ھانل ءَ اے سما نہ اَت کہ دُژمِن ءُ دُژمِن ءِ کاسگ چٹ پہ مئے راج ءِ ھوناں تُنّیگ اَنت ۔ چو جنگل ءِ آس ءِ وڑ ءَ مئے راج ءِ سرجمیں دیار ءَ سوچ اَنت ءُ منی بے ساھگیں گدان ءَ ھمَ وتی ارجان جن اَنت۔ ھانل ءَ وتی بُنکّی وانگ چہ ءَ تربت ءَ بندات کتگ اَت بزاں اولی تبک (کلاس) داں پنچمی تبّک ءِ ھمدا در بُرتگ اَت ءُ شش داں دہ ماڈل ءِ وانگ جاہ ءَ در بُرت۔ بیگاھاں سنٹر ءَ انگریزی ءِ ھم دَر بُرت۔ سال ءِ ھر چکّاس گوں اولّی نمبر ءَ آئی ءَ پاس کُت ۔ پہ گیشیں وانگ ءَ گُڑا ھانل ءِ واھگ اَت کہ دگہ جاھے بُرواں ۔
ھانل ءَ یک روچے وتی مات ءَ را گشت کہ من دیم ءَ وانگ لوٹ آں ، بزاں دیم پہ شال ءَ رواں ۔گوں اے ھبر ءِ اِش کنگ ءَ آئی ءِ مات ءُ پت سک وش بوت اَنت کہ ھانل پہ َ گیشیں وانگ ءَ شال ءَ روگ لوٹ اِیت۔ چہ مات ءُ پت ءِ موکل ءَ پد ھانل ءِ واھشت ءُ ارمانانی جمبر ساچان اَت ءُ پہ شال ءِ روگ ءَ جاڑی بوت۔ وھدے شال ءَ شُت ءُ داخلہ ئِے زرت ءُ کلاس ئِے گران کت اَنت ، بیگاہ ءِ وھد ءَ سنٹر ءَ ھم شت ءُ اتک۔ ھمے داب ءَ وھد دیم ءَ روان اَت کہ یک روچے ھانل واب اَت گوشی ءَ توار کت ، آ پاد اتک گوشی ئِے چست کت داں آئی ءِ سیادئِے ءُ ھمے گْوشت ئِے کہ تئی مات ءُ پت ءَ گْوشتگ کہ بیا بل وانگ ءَ ۔ ھانل ھیران بوت ءُ ھیالانی تہا کپت کہ منی مات ءُ پت ءَ اے وڑ پرچہ کت ! اَنچو لہتے روچ ءَ پد آئی ءِ لوگ ءِ در ءَ توار کت ءُ لوگ ءِ در کہ ھانل ءَ پچ کت داں آئی ءِ سیادے، گُڑا ھانل ءَ گوں ھیرانی ءَ جُست کُت کہ تو مروچی سُھب ءِ سر ءَ منی نیمگ ءَ ھیر اِنت ! آئی ءَ پسّو دات کہ ھو ھیر اِنت، بلے تئی مات ءُ پت ءَ گْوشتگ کہ ھانل ءَ بیار گوں وانگ نہ لوٹ اِیت۔ اے گپاں ھانل سک دلپروش بوت ءُ آئی ءَ زانت کہ اے زوراکیں چاگرد ءُ مئے دیار ئے دشمن زالبولانی وانگ ءُ آیانی دیمروی کنگ ءَ کدی وش نہ بنت پرچہ کہ اگں یک زالبولے وانیت بزاں سرجمیں راجے وانندگ بیت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
