پدائی منصب جان
نبشتہ کار:سورگری بلوچ
دی بلوچستان پوسٹ
شھید منصب جان تو زمین زادگے اَت ئے،ھو بلے اے ھم راستی یے کہ مئے راج ءَ را چہ بُنیاد ءَ یک انچیں نادْراھی یے ءَ گورجتگ کہ چہ بُن ازل ءَ مردگ پرست جوڑ بوتگ ،یانکہ جوڑ کنگ بوتگ۔۔۔۔بلے ھچبر وتی شھیدان ءَ زندگ ءَ شرپ ءُ ازِت نہ داتگ ،وھدے کہ راجی بامرد پہ وتی ھک ءِ پد جنی ءِ ھاتر ءَ وتی گِراں بھائیں جاناں ندر کن اَنت، نوں ما وتی راجی بامردانی ساڑاھگ ءَ بس نہ کن اِیں، مرُدگ پرستی ءِ مستریں درور ھمیش اِنت۔بلے منصب جان تو وتی گلامیں راج ءِ اے بے مھری ءُ نا سرپدی ءَ سرپد اَت ئے،بلے تو مُدام وتی دیوانانی توک ءَ ھمے گُشت کہ اے راج ءِ مزنیں ڈبہ مئے ءُ شمئے بڈ ءَ اِنت، اے راج مارا برداشت کنگی اِنت، پرچاکہ مئے راج چہ بن ازل ءَ مُدام کوزہ گِیرانی دست ءِ چیر ءَ بوتگ ،پمیشکہ گلامی ءُ بازیں زنگے مئے راج ءِ تہ ءَ ھَوار بوتگ ءُ بنت ھم ۔۔۔۔بلے منصب جان مردم ءَ را ھما وھد سک باز درد بیت گِند ئے مردم وتی ھم گنگل ءِ ھمبلانی بے مھرُی ءَ بہ گِند اِیت ۔۔۔بلے تو وتی دوستانی ھم بے مھری سک ءَ باز برداشت کُت اَنت، بازیں گپ، بازیں کسہ انچیں بنت کہ مردم لوٹیت کہ چاگردی رسانکدر ءَ شنگ ءُ تالاں مہ بنت، بلے مرچی من مجبور آں کہ دو لبز نبشتہ بکن آں، بہ گِند ئے منی اے ھبرانی نبشتہ کنگ ءَ کسے ءِ دل آزاری بہ بیت، مُردنی منی واھشت ھمیش اِنت کہ آ جیڑہ ءُ جاورھال شھید منصب ءِ وڑیں سنگتے ءِ سر ءَ اتکگ اَنت، آئی برداشت کُتگ ،بگند ئے دگہ ھمبلے ھمے شَیانی دیمپانی ءَ کمار کُت مہ کنت ۔۔۔دانکہ دگہ ھمبلے ءِ گوم ءَ اے وڑ کنگ مہ بیت….منصب جان من ءَ ھما گپ تنیگ ءَ ھم یات اِنت گِند ئے من ءُ تو ھما تھاریں شپ ءَ نشتگ ءُ دیوان کنگ ءَ اِت اِیں، گُڑا آ گپ اتک کہ سنگتانی ءُ پارٹی ءِ بزگی ءُ نیستی ءِ سر ءَ گُڑا من ءُ تو ھمے بارو ءَ سک باز گپ ءُ رپ کُت، گُڑا من تئی گُدانی چِل دیست آں، ترا گُشت کہ پُل تو وتی گُداں بدل بکن چوں چِل ءِ بوہ ءَ کنگ ءَ ئے ھھھھھھھ، تو ھم کندگے جت ءُ پد ءَ مُلور بُوت ئے، من ھم وتی ھبر ءِ کنگ ءَ سک پشومان بُوت آں{ بلوچی ءَ گپّے جن اَنت کہ تُک وھدے زمین ءِ سر ءَ کپت گُڑا پد ءَ چَٹگ نہ بیت} تو گُڑا من ءَ ھمے پَسّو دات کہ جگر من ءَ دگہ گُد گون نہ انِت، پمیشکا تو ھم سرپد بوت ئے کہ من وتی گپ ءِ کنگ ءَ سک ملامت بوت آں، بلے منی وش کنگ ءِ ھاتر ءَ تو مزنیں ٹَھکے جَت، بلے من ءَ انگت ھم بے چاڑ اَت آں، پد ءَ ترا پُرس اِت ،ترا 4/5 ماہ بیت تو اِد ءَ ئے، انگت تو گُش ئے من ءَ دگہ گُد گوں نہ اِنت؟
تو سک مُلور بوت ئے، من ھمے پھم اِت کہ تو مزنیں جیڑگے ءِ تہ ءَ کپت ئے،ساھتے ءَ رند تو ھمے گُشت کہ من ءَ پنچ سال بیت من ءَ تنیگ ءَ نوکیں گُد نبوتگ ۔۔۔۔۔۔۔۔ تئی ھمے گپ ءِ اُش کنگ ءَ گوں من چٹ ءَ دگہ وڑ بوُت آں، منی چمانی ارس در اتک اَنت، سک بے تاھیر بُوت اُوں ،بلے تو دوبر ھچ نہ گُشت، انچو بے توار بوُت ئے.
من باز جیڑت باھد اِنت کہ چُش مبوتین اَت، بلے اے ھبر ھم انچو ارزشت نداریت کہ ما جنگ ءِ تہ ءَ مارا گُژنگی ءُ تُنگی، بے گُدی کُلیں سکی ءُ سوریانی دیمپان بُوَگی اِنت، اے کُل جَنگ ءِ بھر اَنت، کربانی تھنا مِرگ ءِ نام نہ اِنت، کربانی ھمیِشی ءَ گُش اَنت کہ پہ وتی منزل ءَ سر بُوَگ ءِ ھاتر ءَ ترا اے دْراھیں چیزانی دیمپان بُوَگی اَنت ءُ ھر وڑیں جاورھالانی گوں بھاُدری ءَ برداش کنگ ءِ نام انِت کُربانی۔ انکلابی مردم ، ھما مردم ءَ را گُش اَنت کہ آ اے کلیں سکی ءُ سوریاں چہ پد ھم وت ءَ بِدار ایت ءُ دیم پہ وتی منزل ءَ جنزان بکنت۔۔۔۔
ھو منصب جان تو انکلابی ءِ سنگتے اَت ئے،تو زمین زادگے اَت ئے،اے جُنز ءِ تہ ءَ تو دُژمن ءَ چہ ابید وتیگانی ھم بے مھری برداشت کُت اَنت، ھچ وڑیں بزگی ءُ نیستیانی ءُ وتی دوست ءُ ھمبلانی بے مھری ءَ دل ءَ نہ کُت اَنت، تو گوں وتی زانت ءُ شھور ءَ دْراھیں ھبران ءَ پدر کُت منی ھمبلو، تو وت مرچی کتابے پمنی وڑیں نابزانتے ءَ دیم دات ۔۔۔اے ھبر ھم راستے کہ تو وانگجاہ ءَ نہ ونتگ اَت ، بلے تو نابزانتے نہ اَت ئے،تو اگہ بھگت سنگھ ءُ ڈاکٹر چے گویرا نہ ونتگ اَت، بلے بلوچ راجی جنز ءِ تہ ءَ منی نز ءَ تو بھگت سنگھ ءُ چے گویرا ءِ کِرد کُت ءُ پیشداشت ۔۔۔
ھو منصب جان تو مھروانے اَت ئے، تو انکلابی یے اَت ئے ،تو زمین زادگے یے اَت ئے،تو گوں وتی ماتیں سرڈگار ءَ مھر کنگ ءِ ارزشت زانتگ اَت ، تو گوں وتی زمین ءَ اشک کنگ ھم زانتگ ۔۔۔ھو منصب جان تو وتی ماتیں زمین ءِ پرز ءُ ھک ءِ جْوانیں وڑے ءَ سرپد اَت ئے کہ ماتیں زمین ءِ ھک چی یے ءُ چوں اَدا کنگ بیت……………. ؟
تو وتی پَدریچ ءُ راج ءِ ورنایان ءَ یک بے دَروریں راھے ءَ شون داتگ کہ مئے مِنزل ءِ سر کنوکیں راہ کجام اِنت ءُ مارا کجا راہ مِنزل ءَ سر کنت ءُ کجام راہ مارا زندگ کنت ءُ تو پہ بلوچ پُسگاں یک جُستے ایر کت ءُ ابدمان بوت ئے.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
