شھید آگا آبد شاہ گوں سنگتاں ابدمان اِنت
نبشتہ کار: سفر خان بلوچ
دی بلوچستان پوسٹ
امروز یک انچیں جاگھے کہ اِد ءَ آیَگ ءُ روگ بس یک تجربھے، بنی آدم ءِ آیَگ ءُ روگ پدا بیگواہ بُوَگ۔ بَلے لھتیں انچیں انسان اوں اے امروز ءَ کیت ءُ روت کہ آیانی نام داں جھان است اِنت است بنت ۔ مروچی دنیا ءِ سر ءَ چشیں نام سک باز اِنت کہ آیاں سرجمیں دنیا زانت ءُ پجا کاریت ۔فیدرل کاسترو ،ڈاکٹر چے ،ماتما گاندھی، بھگت سنگھ، نیلسن منڈیلا، امیلکار کیبرال، لینن ، کارل مارکس اے دنیا ءِ جتا جتائیں ھند ءُ دمگ ءِ مردم اَنت، بگند ئے اے ھند ءُ دمگاں چہ امروز ءِ بندات ءَ بگر داں مروچیگ ءَ ھمنچو مردم اتکگ ءُ شتگ کہ آیانی کِساس ءَ اگاں تو زانگ بلوٹ ئے،بلکن ایشانی کِساس زانگ مہ بیت ۔بَلے لھتیں انچین نام است کہ آ جھان ءَ چیدگ اَنت۔
ھمے پیم بلوچ سرڈگار ءِ تہ ءَ ھم بازیں مردمے اتکگ ءُ شتگ کہ آیانی کِرد ابدمان اِنت ۔ واجہ گلام مھمد ، ڈاکٹرمنان جان ،رسول بکش مینگل، ھاجی رزاک، سَمد تگرانی ،ڈاکٹر ھالد ،آگا آبد شاہ،ماسٹر سَپیر ءُ ماسٹر ستار بلوچءُ دگہ سک باز انت ۔
ھماکہ چہ وت ءَ گیش وتی راج ءِ وتی چاگرد ءُ بزگیں لس مھلونک ءِ ھاتر ءَ جیڑ اِیت،آمردم زندگ بیت ۔ ھپت سال پیسر پنجگور چتکان بازار ءَ پاکستانی پوج ءُ چیریں ادارھاں سَے انچیں بلوچ پرزند بیگواہ کت کہ آیانی زند تھنا وتی ھاتر ءَ نہ بوتگ ۔ آیانی زند ءِ لوٹ چہ وت ءَ گیش وتی بزگ ءُ لاچاریں لس مھلونک ءِ وشیں باندات ءِ ھاتر ءَ بوتگ ۔
چیئرمین آگا آبد شاہ ،ماسٹر سپیر ءُ ماسٹر ستار بلوچ اے ھما مردم بوتگ اَنت کہ ایشاں پنجگور ءَ ھَوار سرجمیں بلوچستان ءِ بزگ ءُ لاچاریں مردمانی بزگی مارتگ ءُ دیستگ ۔
پنجگور بلوچستان ءِ ھما دمگ اِنت ۔بلوچ راجی جُھد ءِ تہ ءَ ایشی بنجائی کردار پیلو کتگ ،اِد ءَ چہ مزن نامین رھشون ءُ زانتکار دَر اتکگ ،واجہ شھید لالہ منیر بلوچ، آگا آبد شاہ ، ماسٹر سَپیر ،ماسٹر ستار، پراز کریم ماسٹر اَبدالرھمان ءَ ھوار بازیں چشین زانتکار ءُ ادیب گندگ ءَ کیت۔ آیاں وتی جان پہ گلزمین ءَ ندر کتگ یا انچیں لھتیں مردم گندگ ءَ کیت، آیانی زندگی ءِ لوٹ ءُ تما بس بلوچ ءُ بلوچ سرزمین اِنت۔ چیدگیں نام بی این ایم ءِ بنجائی کماش واجہ چیئرمین ھلیل بلوچ انت ۔
بلوچ جُھد ءِ بندات ءَ اگاں ما بچار اِیں، مارا سک باز انچیں مردم چہ پنجگور ءَ گندگ ءَ کیت آ بلوچ راجی جُھد ءِ اولی سرپ ءِ مردم بوتگ اَنت۔ پہ درور شھید لالہ منیر چہ سرڈگار ءِ راجی بامرداں یک مزنیں نامے ۔
وھدے کہ واجہ ڈاکٹر اللہ نِزر بلوچ کہ بی ایس او مھراب ءِ کونسل سیشن ءَ واک آوٹ کنت ءُ درکیت گُڑا واجہ ڈاکٹر اللہ نِزر ءِ ھمرائی ءَ آگا آبد شاہ ءُ دگہ لھتیں سنگت درکاینت بی ایس او ءَ وتی راستی گوناپ ءَ دے اَنت کہ مروچی بی ایس او آزاد راجی جنز ءِ دیم ءَ بروکیں مستریں گلاں چہ یک گَلے۔
انچش کہ من پیسر ءَ اے ذکر کت کہ آگا آبد شاہ ءِ سیاست ءِ بندات چہ بی ایس او ءَ بوتگ ءُ شھید آگا آابد شاہ بی ایس او آزاد ءِ مھکم کنگ ءَ آگا آبد شاہ ءِ بلائیں کردے بوتگ ۔آگا آبد شاہ بی ایس او ءِ وائس چیئرمینی ءَ ھَوار آئی ءَ بازیں اُگدَھانی سر ءَ کار کتگ ۔
وھدے کہ بی ایس او آزاد ءِ ہژدھمی کونسل سیشن بیت ۔ آگا آبد شاہ بی ایس او آزاد ءِ کونسل سیشن ءَ الیکشن کمیشن ءِ چیئرمین بیت ءُ کونسل سیشن ءِ تہ ءَ بشیر زیب ءُ سنگت ثناء چیئرمینی ءِ ھاتر ءَ اوشت اَنت ءُ بشیر زیب کَٹ اِیت ءُ سنگت ثناء بلوچ وتی کپگ ءِ جار ءَ وت جنت۔
آگا آبد شاہ پدا چہ بی ایس او آزاد ءَ وت ءَ پارگ کنت ۔ شھید آگا آبد شاہ گوں نبی بکش بلوچ ءُ ایندگہ سنگتاں ھَوار بلوچ راجی پارٹی بی این ایم ءَ گوں ھَوار بیت ۔
ایشی ءَ پد آگا آبد شاہ پنجگور ءَ ھوار سرجمیں بلوچستان ءَ بی این ایم ءِ فعال کنگ ءَ ھمک وھد ءَ سنگتانی ھمرائی ءَ یک پاد ءَ اوشتاتگ ۔ واجہ گلام مھمد ءُ سنگتانی شھادت ءَ رند بی این ایم ءِ تہ ءَ بازیں اختلافات ءُ سنگتانی چہ بی این ایم ءَ در آیگ ءُ وترا یک کر کن اَنت ۔ آگا آبد شاہ گوں سنگتانی ھمرائی ءَ بی این ایم ءَ بلوچستان ءِ چاریں کنڈاں مھکم ءُ سرجمیں زون ءُ ھنداں دورہ کن اَنت ءُ بی این ایم ءَ ھما پیش ءِ ھساب ءَ دار انت۔
15اگست 2010 ءَ پاکستانی پوج ءُ چیریں ادارہ رمزان ءِ ماہ ءَ روچ رھمانی مھلونک ءِ دیم ءَ چہ باست میڈیکل ءَ پنجگور سول اسپتال ءِ تہ ءَ آگا آبد شاہ ، بی این ایم پنجگور زون ءِ کماش ماسٹر سپیر ءُ ستار بلوچ ءَ بیگواہ کن اَنت ۔ ایشانی بیگوائی ءَ پد پنجگور ءِ لس مھلونک یک شل ءَ پاد کاینت ءُ زھرشانی کن اَنت، کساس ماھے ءَ میڈیکل ایسوسی ایشن ءُ تاجربرادری ٹرانسپورٹ ایسوسی ایشن زھرشانی تہ ءَ ھوار بنت ۔انچوکیں بلائیں زھرشانی ءَ پد ھم انسانی ھکّانی گَل ءُ پاکستانی رسانکدار وتی چماں بند کن اَنت ۔
کِساس نُھ ماہ ءَ پد11مئی2011 ءَ پنجگور سوراپ ءَ ایشانی کُنٹ ھما وھد ءَ گندگ بنت کہ ایشانی کھول ءِ مردم پنجگور ایف سی ءِ میجر ءِ ھلاپ ءَ کیس کن اَنت کہ ایشانی چست کنگ ءِ تہ ءَ پنجگور ایف سی ءِ میجر ھَوار بوتگ کہ ایشانی چست بُوَگ ءِ وھد ءَ لس مھلونک ھمے میجر ءَ پجا کار اَنت ءُ آمد گس ءَ گواھی ھم دے اَنت کہ اے میجر ایشانی چست کنگ ءَ گون بوتگ ۔ آمد گس ھکم دنت کہ ایشاں آوکیں پیشی ءَ پیش بکن اِت ۔ بَلے پنجگور ایف سی ایشان ءَ شہید کنت ءُ کَل اِش کنت، پدا پنجگور لیویز ءَ ھال دنت کہ ایشانی کُنٹ کجام جاگہ ءَ کَل اَنت ۔
آگا آبد شاہ ءَ ھپت سال سرجم اِنت کہ شھید بوتگ ءُ داں جھاں است شھید ءِ کرد ابد مانیت ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
