راجی آجوئی جُنزانی تہا فدائی اُرشکار
حنیف بلوچ
دی بلوچستان پوسٹ
وھدے ما جہانءِ ایر دستیں راجانی راجدپتر ءَ وانیں تہ ما اے گِندیں کہ ایردستیں راجاں مدام پہ وتی زمینءِ پہازگءَ بے کِساس کُربانی داتگ گُڈا نوں وتی آجوئی ءِ گِرگءَ سوب مند بوتگ اَنت۔ جَنگی رِپکانی تہا ایردستیں راجاں گیشاں چہ گیش فِدائی ارش اوں کتگ کہ مروچی آ راجدپتر ءِ تاکانی تہا اَبدمان اَنت۔
فِدائی ارش جنگانی یک سوبمندیں بہرے کہ آئیءِ بندات مارا چہ 1881 ءَ اگنیٹی گرینوسکی نیروس ءِ ارش ءَ چے دیما کئیت۔
یا کہ چہ آئیءَ پد سال 1947ءَ جاپانءِ ایئر فورسءِ سرا آ ہود ءِ جد ءُ جُہد کنوکیں فدائین ارش کارانی ابدمانیں ساھاں چہ مارا دست کپ اِیت۔ جاپانءِ ایئر فورسءِ سر ءِ ندر بوتگیں سراں دومی جِہانی جَنگءَ نوکیں راجدپترے ٹہینت۔
سال 1940ءِ درگتءَ جاپانءِ جدّ ءُ جُہد کنوکیں فدائی یاں ٹوپ ءُ بمباں گوں گونیں بالی گُراب امریکی نیول بیس ءُ کار پرل ہاربر ءِ سرا ایر گیپت ، وتی جانانی کربانی دات اَنت ءُ پرل ہاربرءِ نیول بیس نیست ءُ نابود کُت۔ اشیءَ چہ بید داں دومی جِہانی جنگ ءَ داں جاپانءِ فدائین آنی اُرش برجاہ اِتنت۔
ھمے ڈولءَ ویتنامءِ جنگءِ ھم ویتنامی سرمچارانی وتن دوستی ءِ جزبہ ءَ فدائین آنی ٹولی ودیگ کتگ۔
ویتنام ءَ سال 1950،1960بگر 1970 ءَ داں جنرل گیاف ءِ سروکیءَ فدائی آنی ٹولی اڑ دیگ بوتگ اَت ، اے فدائیاں وتی سرزمین ءُ راجی آجوئیءِ ھاترا وتءَ ندر کُت ءُ ویتنام ءُ ویتنامی راجءَ را آجوئیءِ پُلیں تاج سرا دات۔
ھمے ڈولءَ کیوبا ءِ آجوئیءِ جدّ ءُ جُہد ءِ درگتءَ چے گویرا فدائی آنی ٹولی یے اڑ دات ءُ آئیءِ تہا دُرستاں چہ پیش پہ فدائیءَ وتی نام گِچین کت۔ بلے آ دگہ سَنگتاں چے گویرا ءِ اے پیسلہ نہ منّ اِت ءُ گُشت کہ پہ فدائی ءَ پیسرا ما درست رو اِیں ءُ چمّا دُرستاں چہ پد گڈی نام تئی بہ بیت۔
ھمے پیم کیوباءِ فدائی آں ھم وتی یک مزنیں ءُ ابدمانیں کردے ماں راجدپتر تاکاں نکش کُرت۔
لاطینی امریکہ ءِ درستیں تحریک آنی تہا فدائی آنی کردار پدّر اَنت۔ ءُ یورپ ھم پہ وتی سرڈگار ءِ آجوئی ءِ ھاترا باسک اینڑ لبرٹی تحریکءِ نامءَ اسپین ءِ ھلاپءَ فدائی ارش کنت کہ چہ آئیءَ اسپین کونڈانی سرا نندگءَ لاچار بیت۔
ھمے ڈولءَ شمالی آئرلینڈءِ جُنز ءِ تہا فدائی آں برطانیہءِ ریاستی زوراکی جہانءِ دیما آشکار کت۔
ھمے پیم تاملانی جُنز مئے دیم سہرا اِنت کہ آھاں وتی جُنز ءِ دیمروئی ءَ اے جنگی رپک چتور کارمرز کرتگ اَت۔
ھمے ھسابءَ بلوچ راجی آجوئی جُنز ءِ تہا اے جنگی ترزِ ءِ کار بنداتءَ فِدائی شھید مجید بلوچ 2 اگست 1964 ءَ ماں شال ءَ بٹھو ءِ سر ءَ کنت۔ اے ارشءَ چہ راست یے کہ بُٹھو رکّھیت بلے جہانءَ یک کُلوھے سر بیت کہ بلوچ وتی زمین ءُ آئی ءِ آجوئیءِ ھاترا ھر چیز کُت کن اَنت۔ شھید مجید بلوچ یک کِشکے پہ بلوچ پُسّگاں گِچین کنت۔
ھمے کِشک ءِ نرمزاریں سراں چہ یک سرے شھید درویش بلوچ اِنت کہ آ سرڈگارءِ رکّینگءِ جُہدءَ ماں شالءَ شفیق مینگلءِ گِس ءِ سرا فدائی اُرشے کنت ۔چہ اے ارشءَ شفیق مینگل ءِ جِند رکّھیت ، بَلے آئی ءِ بازیں کاسگ چٹ یے مُردار ءُ ٹپّیگ بیت۔
مجید برگیڈءِ کِشک ءِ اُرش کنوکیں سیمی فدائی شھید ریھان جان اِنت کہ آ پاکستان ءُ چین ءِ ساز اِتگیں پندلانی بے سوب کنگ ءِ ھاترا ماں دالبندین ءَ چینی اِنجینئرانی سرا 11اگست 2018 ءَ فدائی اُرشے کنت ءُ پاکستان ءُ چین ءَ گوں ھَوار جہانءِ آ دگہ مہلوک ءَ پہ اے کلوہ ءَ رسین اِیت کہ بلوچ سرڈگار بے کَس نہ اِنت۔
گُلیں زمینءِ پُسّگ یک نہ یک دروشمےءَ دیم ھونی دیان ءُ دیمءَ جُنزان اَنت۔ مجید برگیڈءِ فدائی آں وھدے کہ پاکستانءِ دلبندءِ سرا ماں کراچیءَ چینی کونسل خانہءَ سوب مندیں ارشے کت تہ پاکستان ءُ چینءَ ھوار جہانءِ چم ھم سر ءِ توکءَ شُت اَنت۔راستیءَ ھمُک کس اے سرپد بوت کہ بلوچ سرمچار کجا ءُ چون کہ بلوٹ اَنت اُرش کت کن اَنت۔ چینی کونسل خانہءِ سرمچنڈیں فدائی شھید ازل جان، شھید وسیم جان ءُ رازق جانءَ وتی گِران بہائیں سر ندْر کت اَنت ءُ بلوچ راجدپتر ءَ اَبدمان بوت اَنت۔
بلے اے نوبت توام نہ اِنت چیا کہ بلوچ سرڈگار انگت سَنٹ نہ اِنت۔ شھید جنرل استاد اسلم ءِ شھید بوھگءَ رند دژمنءَ ھمے پہم اِت کہ اے نوبت نوں توام بوت بلے دژمنءَ اے شمشتگ اَت کہ استاد ءِ شَہزانتیں پِگر تاں جہان ھست اِنت مانیت ءُ زندگ اِنت۔ رہشون تہنا یک رہشونے نہ بیت بگند ئے آ یک مدامی ئیں پگرے بیت۔ سنگت ءُ مہلوکءِ وھم ءُ گُماناں ساڑی بیت۔ ھمک پگری سنگت سرزمینءِ پہازگءَ سرانی ندر کنگءَ ھمک دمان ساڑی اَنت۔
آجوئیءِ جُہد گوں مُہکمیں رِپک ءُ رھبنداں مرادانی منزلءَ سر بیت۔
ھمے رنگءَ گوادر ءَ پی سی ھوٹلءِ سرا ارش پہ پاکستان ءُ چینءَ کہرےءَ چہ کَمتر نہ اِنت۔ پیسرا دُژمنءَ انچو گُمان کتگ اَت کہ اول وا بلوچ جنگول گوادرءِ جندءَ داں سر بوت نہ کن اَنت ، پی سی ھوٹل دوریں ھبرے۔
بلے بلوچ فدائی آں ھمودا تاں 26ساھت پاکستانءِ لگوریں پوجءِ کمانڈوزانی دیم داشت اَنت ءُ جہان آشکار کُت کہ گوادر بلوچءِ سرڈگار اِنت اگاں بلوچ بلوٹ اِیت تاں پنڈیءَ اوں ارش کت کنت۔ پاکستان سرپد اِنت کہ چار بلوچ فدائی شہید حمل فتح بلوچ ، شہید اسد بلوچ ، شہید منصب بلوچ ءُ شہید کچکول بلوچءَ تاں 26ساھتاں جنگ دات ءُ وتی گُڈی تیر وتءَ جت ءُ زمین ءِ ھاترا ندْر بوت اَنت۔
جَنگانی تہا سِلاہ ءُ مردمانی کچ الم ارزشت دار اَنت بلے اِشیءَ چہ گیش جنگ ءِ رِپک ءُ رھبند ءُ نظریہ پُر ارزشت اَنت۔ انچش کہ ما مدام چہ وتی رھشوناں اے گپ اِش کتگ کہ سِلاہ جَنگ نہ کن اَنت مردم جنگ کن اَنت۔ جنگی رِپکار مدام ھمے چار ءُ بچار ءَ کنت کہ منی ھمک اُرش دژمنءَ سرین پروش بہ کنت۔ ھمے وڑا ما کیوبا ، ہندوستان ، ویتنامءَ دیستگ اَنت کہ آھوداں یک نیمگے زور آوریں تاگت بوتگ اَنت، کہ آھانی کِرّا جنگی ہیلی کاپٹر ، ٹینک ءُ سرجمیں جنگی اوزار بوتگ اَنت بلے اشیءَ چہ ابید اوں آھاں جنگ باھینتگ ءُ پدی بوتگ اَنت۔ ھمے ھاترا کہ گوریلا سنگتانی کِرّا شرّیں جنگی رِپک ءُ رھبند بوتگ ، ھمے سوب بوتگ کہ زورگیر لاچار بوتگ کہ چہ آھانی گلزمینءَ چہ در بئیت۔ بِزاں آجوئیءِ جُہدءَ درستاں چہ پیسر تئی واستءَ جنگی رِپک ءُ رھبند ارزشت دار اَنت۔
جَنگانی تہا نہ ترسی وت یک سوب مندی یے راج اوں مدام ھمے مار اِیت کہ گُلیں زمینءِ بچ زمینءِ پہازگءَ دیم ھونی دیگءَ اَنت۔راجی جُنزانی تہا مہلوکءِ ھمبراہ داری مزنیں ارزشتے دار اِیت کہ راج ءُ راجی سرمچارانی میانءَ برجاه بوتگیں چیز نرمزرانی دیم ھونی ئیگ اَنت۔
ھمے دیم ھونیانی سوب اِنت کہ مرچی بلوچ راج پاکستانءِ ھمک رنگیں زوراکی ، آپریشن، ٹارچر ءُ اذیتاں اوپار کنگءَ اَنت۔ ھمے دیم ھونیانی سوب اِنت کہ دومی نیمگءَ مئے راج پہاز دژمنءِ دیمءَ چو کوہءَ میلانک اَنت۔
ما ہنوگیں گوادرءَ بوتگیں ارشءِ ارزشتءَ بچار اِیں، چو کہ من پیسرءَ نبشتگ اَت کہ جنگی رِپک ءُ رھبند باز ارزشت دار اَنت۔ نوں ما چاریں کہ گوستگیں شش سالاں چہ چین بلوچستانءَ آھگءِ واھشت مند اِنت بلے چین بلوچستانءِ تہا اُرشانی دیمپان اِنت اشیءَ چہ ابید چین پشت کِنزگءِ وڑا نہ اِنت۔ بزاں اے پروجیکٹ چینءِ واستءَ چنچو پُر ارزشت اِنت۔ جہانءِ تہا ھچ ملک وتی مردمانی کُشت ءُ کوشءَ رازیگ نہ بیت داں آئیءَ ٹوھیں مکسدے مہ بیت۔ سۓ مزنیں فدائی ارشاں چہ ابید انگت چینءِ پگر بدل نہ بوتگ۔ اشی مطلب ھمیش اِنت کہ چین ادا ھر وڑ بہ بیت وتءَ برجاہ دارگ لوٹ اِیت۔ ھمے واستءَ بلوچ ءَ چینءِ پیمیں زورگیراں وتی تاگت ءِ پیشدارگ المی اِنت۔
دی بلوچستان پوسٹ: اس مضمون میں پیش کیئے گئے خیالات اور آراء لکھاری کے ذاتی ہیں، ضروری نہیں ان سے دی بلوچستان پوسٹ میڈیا نیٹورک متفق ہے یا یہ خیالات ادارے کے پالیسیوں کا اظہار ہیں۔
