دی بلوچستان پوسٹ کو موصول ہونے والی اطلاعات کے مطابق بلوچستان کے ضلع واشک کے علاقے بسیمہ سے لاپتہ علی احمد نو سال کا عرصہ گزرنے کے باوجود بازیاب نہیں ہوسکا۔
ذرائع نے ٹی بی پی کو بتایا کہ علی احمد ولد رسول بخش بسیمہ کے علاقے ساہوزئی کا رہائشی ہے جنہیں 24 ستمبر 2010 کو ان کے گھر سے پاکستان فورسز نے حراست میں لیکر نامعلوم مقام پر منتقل کردیا جس کے بعد وہ تاحال لاپتہ ہے۔
بلوچستان میں گذشتہ دنوں جبری طور پر لاپتہ ہونے والے کئی افراد بازیاب ہوئے ہیں لیکن دوسری جانب خواتین و بچوں سمیت متعدد افراد کی فورسز کے ہاتھوں جبری گمشدگیوں کے واقعات بھی پیش آئے ہیں۔
گذشتہ روز ضلع نصیر آباد کے علاقے ربی سے فورسز نے 4 خواتین کو 5 بچوں سمیت اغوا کیا۔ اس حوالے بلوچ ریپبلکن پارٹی کے ترجمان شیر محمد بگٹی کا کہنا تھا کہ شے حق بگٹی کے گھر پر فورسز نے چھاپہ مار کر گھر میں موجود چار خواتین اور پانچ بچوں کو اغوا کے بعد نصیر آباد کیمپ منتقل کردیا ہے۔
