مَرگ ئےِ ھمباز کت
نبشتہ کار: نوھان نور بلوچ
دی بلوچستان پوسٹ
آ مدام بلوچ راج ءِ سر ءُ سوج دیگ ءَ اَت ءُ مدام پہ وتی راج ءُ ڈیھ ءِ وشھالی ءِ واستا برے اے میتگ برے آ میتگ اَت، نہ گرم ءِ سُد ءُ سما ئےِ ھستگ اَت نہ گْور ءُ گوریچ ئےِ ءُ نہ اے سلکاریں دژمن ءِ کہ مدام پہ آئی ءِ ھمے آشوبیں راہ ءِ گِسر کنگ ءِ واستا پُشت ءَ ئےِ کپتگ اَت کہ من کجام وڑ ءَ ھمے بامرد ءَ چہ وتی چمّانی دیم ءَ ءُ چہ وتی ھستی ءِ رکینگ ءِ واستا ایشی ءَ چوں دور بہ کن آں.
دژمن ءَ اے بامرد ءُ راج دوست ءَ را باز بر ءَ کھریں زندانانی تہ ءَ اوں بندیگ کتگ، وڑ پہ وڑیں ازاب اوں داتگ ءُ پد ءَ آئی ءَ را لب ءُ لالچ ءِ اوں سَلہ جتگ کہ تو وتی ھمے راج دوستی ءُ وتی ھمے آشوبیں راہ ءَ چہ گِسر بو.بَلے زمین زادگ ءُ ھانی ءِ پرزند ءِ دیم ءَ نہ سرکار ءِ داتگیں ازاب دیمپان بوتگ اَنت ءُ نہ لب ءُ لالچاں آئی ءَ چہ مادنیں راہ چہ پُشت ءَ دور داتگ.آ مدام چو کوہ ءِ البرز ءَ سرکار ءِ دیم ءَ اوشتوک بوتگ.
سرکار ءَ پہ اے سرڈگار ءِ شیدائی ءِ دیم ءَ ھر وڑیں پندل ساز اِت ءُ وتی داشتگیں ٹولیاناں اوں ھمے نرمزار ءِ ھلاپ کار بستگ کہ دانکہ من چہ آئی ءِ دل ءَ سرڈگار ءُ راج ءِ مھراں دَر بہ کن آں، بَلے آ چہ وتی اے کُلیں پندلاں بے سوب بیت. نہ آئی ءَ را زندان ءِ ازاباں اوشت ءِ آماچ کت کن اَنت ءُ نہ کہ بےسریں بُھتام.
سرکار ءَ چار اِت کہ اے مرد منی ھرچ پندلاں بے سوب کنگ ءَ اِنت گُڑا دْروگیں بُھتام ءِ جنگ ءَ بندات ئےِ کنت ءُ پَد ءَ ھمے سرڈگار ءِ آشک ءِ چمّانی تہ ءَ ھچ تْرسے نہ بیت آ سرکار ءِ بے سریں بھتامانی دیم ءَ اوشتگ ءِ جار ءَ جنت ءُ 3 کرّا( اپریل) 2009 ءَ کیچ ءَ کیت کہ من سرکار ءِ لجوزیں بھتاماں پدّر کن آں کہ تو دنیا ءِ تہ ءَ مسریں دْروگ بندے ئے.
ھانی ءِ بچ کیچ ءَ وتی وکیل ءِ جاگہ روت کہ باند ءَ منی پیشی اِنت ءَ ما سرکار ءِ بھتامانی دیم ءَ اوشت آں ءُ آئی ءِ ھریک بھتامے بے سوب کن آں، سرکار چار اِیت اے مرد اوشت ءِ آماچ بُوگ ءِ وڑ ءَ نہ اِنت ،گُڑا وتی راستیں شکل ءَ کیت ھانول ءِ پرزند ءَ گوں ھانول ءِ ایدگ ءَ دو بچ ءَ ھوار آوار جنت ءُ ششمی ءَ مھروانیں پرزندانی کُنٹاں ماں مُرگ آپ ءَ دور اِش دنت ءُ سرکار سک گَل ءُ شادمانی کنت کہ من وتی دیم ءِ داروک دور کتگ اَنت، نوں چُشیں مردم نیست کہ منی دیم ءَ بوشت اِیت.
9 کرّا ءَ ایوک ءَ بلوچستان ءَ اِنّاں سرجمیں دنیا ءَ تہ ءَ بلوچ پرزند زھرشانی بندات کن اَنت کہ پاکستان مئے رھشون گلام مھمد بلوچ ءَ گوں وتی دو سنگت ءَ لالا منیر بلوچ ءُ شیرمھمد ءَ ھوار شھید کرتگ اَنت ءُ آیانی تیر سپتگیں کُنٹ ماں کیچ مُرگ آپ ءَ چگل دیگ بوتگ اَنت.
بلوچستان ءِ تہ ءَ آس ءُ آسگْواری بندات بیت ھر یک بلوچ پرزندے وت ءَ گلام مھمد بلوچ ءَ گْوش اِیت من آں گلام مھمد بلوچ ،من آں بلوچ سرڈگار ءِ پرزند، من ءَ اوں زندانی بہ کن، من اوں شھید بہ کن تو چُنت گلام مھمد، لالا منیر ءُ شیر مھمد شھید کن ئے، مرچی ھریک پرزندے گلام ممھد، لالا منیر ءُ شیر مھمد اِنت.
پاکستان چار اِیت من وَ شرّیں کارے نہ کت اے راج گیشتر پاد اتک، بَلے سرکار نہ زانت گلام مھمد بلوچ یک پردے نہ بوتگ بلکین ءَ یک کندیلے کہ مدام رژبالین اِیت ءُ مدام وتی راج ءَ رژنائی ءِ نیمگ ءَ راھادگ کنت.
شھید گلام مھمد یک پگر ءُ لوٹے ءِنام اِنت، گلام مھمد یک مِنزلے ءُ کاروانے جوڑ بوتگ.
گلام مھمد یک پردے نہ بوتگ کہ بس ھتم بیت، گلام مھمد یک رھشونے بوتگ ءُ انگت یک رھشونے ءُ مرچی مئے رھشونی ءَ کنگ ءَ اِنت.مرچی اے گلام مھمد ءِ کاروان اِنت کہ بلوچ راج ءِ دلانی بند ءُ بوگ جوڑ بوتگ اَنت ءُ مرچی گلام مھمد ءِ کاروان ءَ را بلوچ راج ءَ وتی مرگ ءُ زند پھم اِتگ.
سرکار ءَ مرچی گلام مھمد ءِ کاروان ءُ رژن ءِ ھلاس کنگ ءِ باز جھد کتگ ءُ گلام مھمد ءِ کاروان ءِ ھزاراں سنگت ءُ رھشون شھید ءُ بیگواہ کنگ بوتگ، بَلے گلام مھمد ءِ کاروان سُست یا اُوشت ءِ آماچ نہ بوتگ بلکین ءَ گیش تونگِر ءُ مھکم بوتگ ءُ وتی مِنزل ءَ جُنزان اِنت.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
