مائی -تاج بشیر

مائی

نبشتہ کار: تاج بشیر

دی بلوچستان پوسٹ

مائی بزاں ؟
نزاناں ۰۰۰۰ ھاھاھاھا ۰۰۰۰ من ءَ دْرست ماھیکان گُش اَنت. تو پرچا من ءَ چو نیم نام کُتگ ؟
منی پت گُش اِیت داں تو نبوتگ ئے، منی زند سک تھار بوتگ، بلے ھما شپ ءَ کہ تو ودی بوتگ ئے. سک ماھیکانی بوتگ، گڑا من تئی نام ماھیکان کُتگ ،پد ءَ تو زان ئے منی پت چے گُش اِیت، ھما اِنت کہ تو ودی بوتگ ئے من تھاری نہ دیستگ ………… بلے تو ؟

مائی ءَ لوٹ اِت کہ من ءَ پسّو بدنت ،بلے گنٹی ءَ توار کُت ءُ وانگجاہ ءَ موکل بوت. ھشت سال یا ھشت کرن نزاناں چینچو مُدّت ءَ پد منی سر پد ءَ وتی میتگ ءُ بازار ءَ کپتگ………

یکرندے کراچی ءَ وانگجاہ ءَ من وتی سنگتے ءِ کتاب ءِ سر ءَ نبشتہ کُتگیں لھتیں لبز دیست my love دیم ءَ یک نامے نبشتہ اَت. من جُست کُت ایشی ءِ مانا چی اِنت؟

سنگت ءَ گُشت منی دوست.
من پد ءَ جُست کُت اگاں اے نام ءَ ءُ love ءَ کروج ئےِ گُڑا……..؟
سنگت ءَ کند اِت ءُ گُشت گُڑا ھاک پشت نہ کپ ایت بس ” مائی ” پشت کپیت۰۰۰۰۰۰ ھاک ءُ مائی ………گُش ئے اے لبزاں من ءَ وتی نیمگ ءَ چک اِت…….

ھما میتگ اَت بس لھتیں لوگ مَٹ بوتگ اَت ، دْرچک اوں پیر تر بوتگ اِت اَنت.لھتیں بچکند ءُ گوگائی توار دنز ءُ مجین اِت اَنت. بلے من وتی لیب ءُ گوازیانی کپتگیں پَد پجّا آورت آں .بلے سک ٹپیگ اِت اَنت. دْرستیں میتگ منی وش اتکی ءَ اتکگ اِت اَنت ءُ دْرست گُش ئے من ءَ انچو گُشگ ءَ اِت اَنت کہ ترا ھشت سال ءَ رند چوں مئے یات اتکگ…… بلے ھر یکّے ءِ چمّ ءِ چارگ ءَ رند من وت ءَ وت جُست کُت کہ وھدے تو کراچی ءَ چہ دراتک ئے، ترا بس یات آیگ ءَ اَت …..؟

ھاک ءُ مائی…..ھمُک وش اتک من ءَ دمتوس کنگ ءَ اَت،چیاکہ اے وش اتکانی تہ ءَ مائی ءِ آواز گون نہ اَت. لھتیں وھد گْوست، نزاناں سالے اگاں روچے. بس ھمینچو گُمان بوت سھُب مَٹ بوتگ.لوگ ءَ چہ دْراتک آں کہ وتی وانگجاہ ءَ چار آں.
وانگجاہ ءِ جاگہ ھما اَت.بلے وانگجاہ مٹّ بوتگ اَت ، ھاک ءِ ھِشتانی جاگہ ءَ سیمنٹ ءِ ھِشتاں گپتگ اَت ،بلے سیمنٹ ءُ ھِشتاناں بازیں تَرْک مان ات.مکتبی وانگ ءَ اِت اَنت.دْرست ناشُناسیں توار اِت اَنت .بلے یک توارے من دْرست کُت………مائی……… گنٹی ءَ توار کُت مکتبی لوگانی نیمگ ءَ رھادگ بوت اَنت .

من وانگجاہ ءِ پُشتی نیمگ ءَ شُتاں.من دیست مئے ھِشت ءُ ھاک ءِ وانگجاہ انگت ھست اِنت، بلے ایوک ءَ جُمپے بوتگ ءُ پشت کپتگ ءُ جُمپ ءِ سر ءَ یک زالبولے چیزے شوھاز کنگ ءَ اِنت.
تو اے جمپ ءِ سر ءَ چے شوھاز کنگ ءَ ئے؟

آ انچو سرپد بوت کہ کسّے من بازیں مُدتّے ءَ پَد چیزے جُست کنگ ءَ اِنت.لھتیں جُستاں ، لھتیں بچکندگ اَنت. ھمے جُمپ ءِ چیر ءَ چیرتر اتگ اَنت. کرنے بیت کہ ھمیشاں شوھازگ ءَ آنت،بلے ایوک ءَ ھر چیزے شوھاز گران اِنت. مائی۰۰۰۰ گُش ئے ھمے دوئیں چم اِت اَنت کہ من ءَ گُشت ئےِ،ترا ھشت کرن ءَ پد چوں اے ھاک گیر اتکگ؟
بلے منی پسّہ ءِ ودار ئےِ نہ کُت ءُ پد ءَ من ءَ جُست ئےِ کُت.شرّیں تو بہ گُش وانگ وشتر اِنت یا وانینگ ؟
پد ءَ اوں منی پسّہ ءِ ودار ئےِ نہ کُت ءُ گُشت ئےِ دْرست اے جمپ ءِ چیر ءَ بار گپت اَنت بَلے ھمے گِریوگ، ملوری، بزگی، واری، جُست، کُنّت ءُ ایوکی بس بار نہ گپتگ اَنت.

من پد ءَ وانگجاہ ءَ اتک آں کہ زھگاں وانین آں ءُ ایوکی ءَ بار دے آں، بلے نوں من رواں لوگ ءَ کہ لوگواجہ سُبارگ لوٹ اِیت……. لوگ واجہ…..؟ گُش ئے منی چمّانی جُست آئی ءَ پھم اِت ءُ گُشت ئے ھو منی لوگواجہ اِنت بَلے باریں من آئی ءِ لوگ بانک آں اگاں اِنّاں پرچاکہ من ءَ چہ پیسر آئی ءِ لوگ ءَ دگہ سے بانُک ھست اِنت. بَلے ما چار اِیں ایوک اِیں مارا زھگے اوں نہ بوتگ کہ ما ایوکی ءَ گوں بار بدے اِیں. ھمے گپاں گوں من رھادگ بوت آں .من گْوانک جت. تو زان ئے مائی ءِ مانا چی اِنت؟

من آئی ءِ پسّو ئےِ ودار نہ کُت ءُ پد ءَ گُشت……منی………آ پد ءَ روگ ءَ لگ ات…. من پد ءَ گْوانک جت.من باندا پد ءَ کایاں گُڑا کجا…..؟
ھمے جُمپ ءِ سر ءَ، پسّہ ئے دات.
اِد ءَ چے کن ئے؟ من جُست کت.
من ءُ تو ھوار بہ اِیں گار بوتگیں چیزاں شوھاز کن اِیں ءُ تئی پت ءَ گُشتگ تو ھما شپ ءَ ودی بوتگ ئے آ شپ سک ماھیکانی بوتگ من ھما شپ ءَ چارگ لوٹاں ،بلے گوں وتی چمّاں.

ھمے وھد ءَ جمبراں مانشانت موسم سک وش بوت. من آزمان ءِ نیمگ ءَ چار اِت داں من دیست شاھینے چہ رَم ءَ سستگیں مُرگے ءِ سرءَ کپتگ اَت ءُ جمبر اوں گروگ جَنگ ءَ ات ، جمبر سک گرندگ ءَ اِت اَنت ، ھَور یکشل ءَ رچگ ءَ اَت.باریں چینچو ماہ یا ساھت گْوستگ اَت کہ نوں من ءَ ھَور بیزار کنگ ءَ اَت.من پیسلہ کُت کہ نوں کراچی ءَ واتر باں.
منی بس ءِ وھد نزیک ات. ھَور ءَ اوں تھم کُتگ ات .من وتی بیگ زُرت ءُ دَگ ءِ نیمگ ءَ رھادگ بوتاں. بلے من دیست بازار ءِ دْرستیں مردم کبرستان ءَ یکجاہ اَنت ءُ دْرستاناں وتی چُکانی کُنٹ( لاش) گون اَنت، بلے دْرستیں سرڈگار آپ اِنت ، کسّے ءَ را ٹُکّرے ھُشکیں زمین نہ رسگ ءَ اَت کہ وتی چُکّاں کبر بہ کنت، بس آہ ءُ زاری ات، یک توارے اتک کہ اے سیمنٹ ءُ ھِشت ءِ وانگجاھے نہ بوت مئے واستا یک ازابے بوت مارا چہ چُکّ ءَ زِبھر ئےِ کت ما نہ زانت کہ اے سیمنٹ ءُ ھِشت ءِ وانگجاہ کپ اِیت مئے نیھالیں چکاں کُش اِیت.
من بس ءِ ودار ءَ اتاں. من دیست شاھینے ءَ مُرگی چُکے وتی پنجگاں کُتگ ، منی نزیک ءَ اتک منی دیم ءَ ئےِ دْور دات بَلے مُرگی چُک ساہ داتگ ات.من ھیران بوتاں کہ دْرستیں سرڈگار آپ اِنت من ایشی ءَ کُجا کبْر بکن آں….؟

بس اتک ھارن جنگ ءَ ات بلے منی گام دیم ءَ نہ شُت اَنت.بس شُت من ھمے مُرتگیں مُرگی چُک زُرت ءُ دَگ ءِ سر ءَ نشت آں. کرن گْوست اَنت بلے من ءَ ھُشکیں ڈگارے نہ رس ات.من روچ ءُ شپ پجّا نیاؤرت آں، بلے سک تھاری اَت،نہ ماھیکانی اتک نہ مائی…….