زمینی ھُدا
شامیر کلانچی
دی بلوچستان پوسٹ
دُنیا ءِ تہ ءَ مردماں آزاتی ھست کہ آ کجام ھم نیکراہ یا پِرکہ ءِ منوک بہ بیت ءُ آ کجام وڑ ءَ وتی زند ءَ پہ وش ءُ وشھالی ءَ گْوازینت کت کنت ،بلے اسلامی جمہوریہ پاکستان کہ اسلام ءِ نام ءِ سر ءَ جوڑ کنگ بیتگ ایشی ءِ تہ ءَ مدام یک پِرکھے دومی پِرکہ ءَ را کاپِر زاھر کنگ ءِ جھد ءَ کنگ ءَ اِنت. اے کسہ ءَ را مرچی نہ اِنت کہ بندات بیتگ، بلکیں اے پاکستان ءِ جوڑ بُوَگ ءَ رَند ھما مرد ءَ ( مھمد اَلی جنا)کہ پاکستان ءِ بُن ھِشت ایر کتگ آئی ءَ را اوں کاپِر اِش گُشگ ، بلے ھما پِرکہ ءَ کہ کاپِر کاپِر بندات کتگ آ وھد ءَ باز کم مردم ءِ تہ ءَ یک ٹولی یے بیتگ، بلے آھانی ھلاپ ءَ ھچ گامگیج زورگ نہ بیتگ. مرچی ھما ٹولی یک بلائیں جیڑھے جوڑ بیتگ ءُ ایشی ءِ زمہ وار پاکستان اِنت، پرچاکہ پاکستان ءِ جِند ءَ اے گپ منّ اِتگ کہ ما ۴۰ سال ءِ تہ ءَ باز ردی کتگ. منی ھیالءَ مستریں ردی ھمے زمینی
ھدا ءِ جوڑ کنگ اِنت کہ ایشاں دست ء وت آ وھد ءَ جوڑ اِش کتگ .اے زمینی ھُدا برے یک نیکراھے ءِ ھلاپ ءَ پتوا دے اَنت ءُ پتوا دیگ ءَ رَند ھما نیکراہ ءِ مردمانی سر ءَ اُرش کن اَنت۔
انچش کہ بلوچستان ءِ تہ ءَ شِیھایانی( ھزارہ) سر ءَ بیست سال اِنت کہ اُرش بُوَگ ءَ اِنت ءُ بلوچستان ءِ تہ ءَ زکری پِرکہ ءِ سر ءَ اوں اُرش کنگ بیتگ. اے ٹولی انچش زوراور کنگ بیتگ اَنت کہ ریاست ءَ را ھم چیلنج کن اَنت ،وال چاکنگ ، پمپلٹ بھر کن اَنت ءُ آئی ءَ رَند اُرش ھم کن اَنت، بلے کدی ھم اے ٹولی ءِ ھلاپ ءَ گامگیج زورگ نہ بیتگ، اگاں بیتگ گڑا زاھر نہ کنگ نہ بیتگ،گامگیج نہ زورگ ءِ سبب ءَ مرچی اے ٹولی سرجمیں ملک ءِ دمک ءُ دَراں رس اِتگ ۔
ایشی ءِ مستریں دَرور باچا ھان مزن شھدربر جاہ ءِ نودربر مشال ھان اِنت ءُ ایشی ءَ چہ پیش گوادر ءَ ملا بھرام ءُ استاد زاھد آ سکانی ھم شھید کنگ بنت. دگہ انچیں ھزارانی ھساب ءَ ڈاکٹر ، پولیسِ ، وکیل ءُ لَس مھوک ھمیشانی دستاں جَنَ بیتگ اَنت.
پشاور ءِ تہ ءَ دو سد چُک وانگجاہ ءَ شھید کنگ بیتگ اَنت.
اے ملک ءِ تہ ءَ کس پھریزوک نہ انت، من پرچی ءَ انچو پریات کنگ ءَ آں، من ءَ چی کار اِنت کہ من وتی انچو وھد پہ اشانی ھلاپ ءَ زوال بہ کناں ؟
من ءَ پمیشکا کار ھست کہ مرچاں ھمے ٹولی ءِ مردم ھر یک دمک ءُ میتگاں سر بیتگ اَنت ءُ منی ھم باز بر ءَ کراچی ءَ دیم ءَ کپتگ ءُ من ءَ ھمے جست اِش کتگ.
من کتابانی تہ ءَ ونتگ کہ من بزاناں ءُ منی ھدا بزانت، گڑا اے زمینی ھداھانی چے کار ؟
کتگیں جُست اش اَنت.
تئی کلمہ چی اِنت ؟
نماز چتور وان ئے؟
نی من اشاں زمینی ھدا مہ گشاں، گڑا چی بگشاں ءُ اشاناں چے پسو بدیاں، پرچاکہ اشاں گوں مئے ریاست ھم گپ جت نہ کنت ۔
من گوں پاکستان ءَ دست بندی کناں کہ اے زمینی ھداھانی ھلاپ ءَ گامگیج بزیر ءُ اے سوچ ءُ ٹولی بند بہ کن. اگاں اشانی ھلاپ ءَ گامگیج زیرگ نہ بوت، گڑا اے ملک مدام گوں سُھریں ھونان بیت ءُ ایشی زمہ وار ریاست بیت، پرچاکہ اے ملک ءِ مھلوک ءِ زمہ وار ریاست اِنت ءُ ریاست وتی مھلوک گون ءَ ھَد کتگ ءُ رھبند ءِ تہ ءَ مان اِنت کہ من مھلوک ءَ ھر ازاب ءَ چہ پھریزگ ءِ جُھد ءَ کناں ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
