پنی آ مزاحمتی شاعر مرید بلوچ نا شاعری نا اولیکو کتاب شنگ مس۔
دی بلوچستان پوسٹ نا حوالکار نا کلہو تا رِد ئٹ براہوئی زبان نا پنی آ شاعر مرید بلوچ نا شاعری نا اولیکو کتاب ’’رخصت اف‘‘‘ شینک مسونے۔
رخصت اف 128 پنہ غاتیا تالان ءِ و کتاب ءِ مرید بلوچ، لمہ یاسمین نا پن آ کریسہ نوشتہ کرینے: ’’پنا، سگ و حوصلہ غاتا چیدہ لمہ یاسمین نا۔‘‘ اندن کتاب نا ایسری پنہ غا لمہ یاسمین نا جنسار تون اوار شاعری اس تروک خننگک۔
رخصت اف اوار نا سرپنہ ءِ مش یار بلوچ ٹہیفین ءِ ہراٹی اسہ بندغس بلوچی دستار، پچ و چَوٹ بینوک پرہ غاتیتون آسمان ئٹ بال ئٹی خننگک۔
کتاب نا سرلوز کلہو تیٹ ’’مزاحمت نا استعارہ‘‘ نا سرحال تون پنی آ براہوئی ادیب خادم لہڑی، ’’راستی نا شاعر‘‘ نا سرحال تون بی ایس او آزاد نا گدرینگوکا چیئرمین بشیر زیب بلوچ، ’’سنگر نا شاعر’’ نا سرحال تون عمر راہی بلوچ، ’’وطن نا مرید‘‘ نا سرحال تون سنجد بلوچ و ’’مزاحمت زند ءِ‘‘ نا سرحال تون کتاب خواجہ مرید بلوچ تینا خیال آتا درشانی ءِ کرینو۔
